Кульшетов, Валерий Дмитриевич
| Валерий Дмитриевич Кульшетов | |
|---|---|
 | |
| Шочмо кече | 1952 ий 17 шыжа |
| Шочмо вер | |
| Колымо кече | 2022 ий 2 шыжа (69 ий) |
| Колымо вер | Йошкар-Ола, Россий |
| Эл | |
| Паша сомыл | композитор |
| Награде да премий |
|
Валерий Дмитриевич Кульшетов (17 шыжа 1952, Марий Турек, Марий Автоном Совет Социализм Республик — 2 шыжа 2022, Йошкар-Ола)[1]) — марий композитор, СССР композитор Ушемын йыжъеҥже (1979), Марий Эл Республикын сымыктышын сулло пашаеҥже (1995), Россий сымыктышын сулло пашаеҥже (2004).
Биографий
1959 ийыште П. И. Чайковский лӱмеш йоча сем школыш тунемаш пурен.
Москосо консерваторий деч вара Валерий Кульшетов Йошкар-Оласе сем училищыште теорий дисциплиным туныктен (1977—1983), Республикысе курчак театрын сем ужашыжым вуйлатен (1978—1981), Марий композитор ушемын усталык йодыш шотышто консультантлан тыршен (1983—1988), Марий телевиденийын семлык редакторжо (1988-1996), Я. Эшпай лӱмеш марий филармонийыште «Мари» студий вуйлатыше, Тӱвыра да сымыктыш колледжын «Эстраде сем сымыктыш» предмет-цикл комиссийым вуйлатыше да туныктышо (1999 ий гыч) лийын.
2006 ийыште Валерий Дмитриевич Кульшетов Марий Эл Республикын композитор ушемжым вуйлатен.
Усталык пашаже
Композиторын усталык пашаже тӱрлӧ жанрым авалтен. Тиде симфоний произведений-влак, йӱк-семӱзгар произведений-влакат. Тудын усталык погыштыжо эстраде муро посна верым айлен. Эше 1988 ийыште Йошкар-Оласе муро конкурсышто Валерий Дмитриевич 1-ше премийым сулен. Туге гынат тудлан эстраде мурын кӱкшытшӧ келшен огыл, самодеятельностьлан келшыше ман аклен, вет Марий Эл Республикыште ик тунемме тӧнежыштат эстраде артистым ямдылен огытыл. Тидлан кӧра 1999 ийыште Валерий Дмитриевич Кульшетовын темлымыж дене Тӱвыра да сымыктыш колледжыштыже «Эстраде сем сымыктыш» пӧлкам почмо.
Валерий Кульшетов 200 утла мурым возен, 400 наре аранжировкым ыштен.
Критике
Валерий Кульшетов 2021 ийыште марий сем алан огеш вияҥ, ик верыште тошкыштеш ман ойлен. Композиторын ойжо почеш, марий семсавыртышын интонацийжым аралыме пашам ыштыман, тудыжо йомеш: «Содоки верыште тошкыштмаш улак…» Марий сем сымыктышыште ончык сай ошкылым ыштыманак", — ойлен тудо[2].
Палемдымаш
- ↑ Умер композитор Валерий Кульшетов, 2022.10.02, <https://web.archive.org/web/20221002191125/https://kidsher.ru/ru/news/39381/>. Тергыме: 2 шыжа 2022.
- ↑ Председатель Союза композиторов Марий Эл заявил о застое в национальной музыке, 2021.11.26, <https://web.archive.org/web/20221003180337/https://kidsher.ru/ru/culture/33326/>. Тергыме: 3 шыжа 2022.
Литератур
- Кузнецова В. Г., Кульшетова Л. И., Чеснокова В. И. Композиторы и музыковеды Республики Марий Эл. — Йошкар-Ола: Типография Правительства Республики Марий Эл, 2006. — С. 65—70. — 266 с. — 1000 экз. — ISBN 5-87898-318-4.
- Кульшетов Валерий Дмитриевич // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 471. — 872 с. — 3505 экз. — ISBN 978-5-94950-049-1.
- Артищева Р. В. Кульшетов Валерий Дмитриевич // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 240. — 606 с. — 1500 экз. — ISBN 978-5-905314-35-3.