Иванов, Валерий Вячеславович
| Валерий Вячеславович Иванов | |||
|---|---|---|---|
 | |||
| Шочмо кече | 1975 ий 29 кылме | ||
| Шочмо вер | Волжск | ||
| Колымо кече | 1995 ий 19 ага (19 ий) | ||
| Колымо вер | |||
| Пурымаш |
 СССР → Россий |
||
| Службо жап | 1993—1995 | ||
| Званий | гвардий рядовой | ||
| Награде да премий |
|
||
Валерий Вячеславович Иванов (1975 ий 29 ноябрь, Волжск — 1995 ий 19 май) — Россий Федерацийын сарзыеҥже, гвардий рядовой, Россий Федерацийын Талешкыже.
Илыш корныжо
1975 ий 29 ноябрьыште Марий Эл Республикысе Волжск олаште пашазе ешеш шочын. Йоча пагытше Волжск районысо Кугу Олыкъялыште эртен.
1993 ийыште Волжск оласе 2-шо №-ан школым тунем пытарен. Школыштак спорт дене чолган келшен, Йошкар-Оласе капорол-влакым ямдылыше школым тунем лектын. Армийыш налме марте йоча клубышто тренерлан пашам ыштен.
1993 ий 8 декабрьыште Волжск районысо сарзе комиссариат Россий армийыш налын. Калининград олаште служитлаш тӱҥалын, 1994 ий сентябрь гыч — Йӱдвел Кавказыште. Чечен Республикыште сар пашам шуктен.
1995 ий 19 майыште кокымшо артиллерий дивизион тушманын тул точкыжым пытарыме шотышто сар кӱштыкым шуктен. Дивизионын позицийже-влак тушманын миномёт тул дене лӱйылтыныт. Тидлан кӧра самоход саргурал ылыжын, тудын экипажыштыже гвардий рядовой Иванов лийын. Салтак, муткучымашым пӱтынек шке ӱмбакыже налын да лӱддымылыкым ончыктен, саргуралым тул позиций гыч ӧрдыжкӧ кораҥден. Тул дене ылыжмылан кӧра саргурал пудештын. Тале салтак колен, но шке патырлыкше дене шуко йолташыжын илышыжым утарен.
Россий Федераций Президентын 1995 ий 1 декабрьысе кӱштыкшӧ дене сарзе пашам шуктымаште патырлыкым да талылыкым ончыктымыжлан гвардийысе рядовой Иванов Валерий Вячеславовичлан Россий Федерацийын Талешкыже лӱмым пуымо.
Тудо Марий Эл Республикын Россий Федерацийын Талешкыже чаплӱмым налше икымше шочшыжо лийын. Талешкын лӱмжӧ дене тудын тунемме школжым, Волжск олан ик уремжым лӱмдымӧ.
Литератур
- Иванов Валерий Вячеславович // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 389. — 872 с. — 3505 экз. — ISBN 978-5-94950-049-1.
- Краснов П. В., Мочаев В. А. Иванов Валерий Вячеславович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 165. — 606 с. — 1500 экз. — ISBN 978-5-905314-35-3.
Кылвер-влак
- Валерий Вячеславович Иванов (руш.). Сайт «Герои страны». Тергыме кече: 9 пеледыш 2014.