Васильева, Наталия Леонидовна

Наталия Леонидовна Васильева
Наталия Леонидовна Васильева
Шочмо кече	15 теле 1984 (41 ий)
Шочмо вер	Тыгыде Морко, Волаксола ял шотан илем[d], Морко кундем, Марий Автоном Совет Социализм Республик, РСФСР[d], СССР;
Эл	СССР; Россий;
Паша сомыл	бухгалтер, суртоза

Ната́лия Леони́довна Васи́льева (шоч. 15 теле 1984, Тыгыде Морко, Марий Автоном Совет Социализм Республик) — 2024 ийыште Россий Федераций президентын кӱштыкшӧ дене «Талешке-ава» чаплӱмым сулышо шуко шочшан ава^[1].

Илыш корныжо

Наталия Васильева 1984 ий 15 декабрьыште Марий Эл Республикысе Морко кундем Тыгыде Морко ялеш шочын. Шуко шочшан ешыште кушкын, тудын деч посна эше вич йоча лийын. Ялозанлык техникумышто бухгалтерлан тунем лектын. Ончыкылык пелашыже Владимир дене шочмо ялыштыже, йолташ-влак тӱшкаште, палыме лийын, тушко тудо Самара область гыч коваж деке унала толын улмаш. 2002 ий 30 ноябрьыште нуно ушненыт. Ондак еш Самарыште, вара Татарстаныште илен, тушто Наталия Васильева Зеленодольск оласе колхозышто бухгалтерлан пашам ыштен. Варажым куд йочан еш Марий Элыш шочмо верышкыже пӧртылын. 2011 ийыште нуно Волжский районысо Березники ялыште 130 квадрат метр кумдыкан пӧртым налыныт.

Наталия Васильева мӧҥгысӧ сомылым ышта. Васильевмыт еш кугу озанлыкым куча. Мӧҥгысӧ шӧр гыч торыкым, ӱйым, лайым да йогуртым ыштен ужалат. Наталиян пелашыже тыгак сырым шолта. Еш 35 сотык кумдык мландыште пакча-саскам кушта. Тӱкан кугу да тыгыде вольыкым ашнат, шылым ужалат. Александр Васильевын шке тракторжо уло, садлан тудо шкежак пакчам куралын да шудым ямдылен кертеш.

Наталия Васильеван акаже колымеке, вич йоча тулыкеш кодын, Наталия Владимир пелашыж дене тукым шольо-шӱжар-влакым йоча пӧртыш колташ огыл, а шке деке налаш шонен пыштеныт. Наталия Васильева шке икшыве ден ашнаш налме йоча коклаште ойыртемым ок уж, чыланат ик семын лишыл улыт манын палемда. Еш опеке органыш (руш.) (мар. йодмашым возен, да нунын йодмыштым шуктеныт, йоча-влакым ашнаш налаш йӧным ыштеныт манын ойлен. Тыге, Наталия ден Владимир Васильевмыт 16 йочам ончен куштат: латик йоча — шкеныштын, визыт — ашнаш налме^[2]^[3]^[4]^[5].

Йоча-влак

Васильевмытын 11 шочшышт гыч куд ӱдыр (Елизавета, Светлана, Юлия, Анна, йыгыр-влак Виктория ден Анжелика) да вич эрге (Александр, Владимир, Дмитрий, Михаил, Илья). Тыгак 18 ияш деч изирак вич тукым шольо-шӱжар — Максим, Кирилл, Ксения, Вероника, Дарья.

Наталия Васильева, тудын Александр пелашыже, йоча-влак. 2024 ий.

Кугурак йоча-влак, Елизавета ден Александр, ача-ава сурт гыч каеныт да шке илышыштым Озаҥыште чоҥат. Елизавета пашам ышта, а Александр Озаҥысе педагогике колледжыште тунемеш, ты тӧнежым тыгак тудын акаже тунем пытарен. Васильевмытын моло икшывышт «Тӱшка шинчымашым пуышо Помар кыдалаш школышто» тунемыт. Тудым тунем пытарымеке, южо йочашт Озаҥ олаште педагогике шинчымашым налаш шонат^[2]^[3].

«Мемнан ешыште ик пеҥгыде йӱла уло: „Ава-ачан мутшо — закон“. Йоча-влак тидым изинек палат да колыштыт. Эсогыл шке семын илыше кугу ӱдырнат мемнан каҥашнам шотыш налеш. Пеҥгыдын титаклымаш мемнан уке, ме йоча-влакым нигунам кид дене огына тӱкӧ. Нунын дене шукырак мутланаш, умылтараш тыршена, мо лиймым пырля каҥашена да кузе ышташ кӱлеш ыле манын шонена. Тиде кычкырлен, кӱзанӱштӧ дене кырыме деч ятырлан пайдалырак. Но эн тӱҥжӧ — нуным йӧраташ кӱлеш, вет йӧратыше ешыште гына пиалан йоча-влак кушкыт».
— Наталия Васильева^[3].

Суаптар-влак

2024 ий шошым Россий Федерацийын президентше В. В. Путин Васильева Наталиялан «Еш институтым пеҥгыдемдымаште да йоча-влакым ончен куштымаште суаплан» ой дене «Талешке-ава» чаплӱмым пуэн. Суаптар бриллиантан тисте ден шӧртньӧ шӱдыр покшелне, эмаль дене леведме, элысе гербымым ончыкта; тудын пелен 1 млн теҥге кугытан окса премий пуалтеш.

2024 ий июльышто Марий Эл Республикын вуйлатышыже Юрий Зайцев Наталия Васильевалан Тӱвыра да каныме рӱдӧ паркыште орденым кучыктен^[5].

Палемдымаш

↑ Указ Президента Российской Федерации от 26.11.2022 № 858 ∙ Официальное опубликование правовых актов ∙ Официальный интернет-портал правовой информации (руш.). web.archive.org. Тергыме кече: 19 идым 2025.
↑ ¹ ² Мать-героиня из Марий Эл воспитывает 16 детей: “Не дала сдать ребятишек в детдом” (руш.). www.pg12.ru. Тергыме кече: 19 идым 2025.
↑ ¹ ² ³ Мать 16 детей из Марий Эл: «У нас в семье действует одно железное правило: "Слово мамы и папы – закон"» (руш.). www.marpravda.ru. Тергыме кече: 19 идым 2025.
↑ Мать-героиня из Марий Эл воспитывает 16 детей (руш.). www.marpravda.ru. Тергыме кече: 19 идым 2025.
↑ ¹ ² Глава Марий Эл вручил орден «Мать-героиня» жительнице Волжского района Наталии Васильевой (неопр.). www.vpgazeta.ru. Тергыме кече: 19 идым 2025.

Кылвер-влак

Глава Марий Эл вручил орден «Мать-героиня» жительнице Волжского района Наталии Васильевой.

[1] Указ Президента Российской Федерации от 26.11.2022 № 858 ∙ Официальное опубликование правовых актов ∙ Официальный интернет-портал правовой информации (руш.). web.archive.org. Тергыме кече: 19 идым 2025.

[«автоссылка"-2] ¹ ² Мать-героиня из Марий Эл воспитывает 16 детей: “Не дала сдать ребятишек в детдом” (руш.). www.pg12.ru. Тергыме кече: 19 идым 2025.

[«автоссылка1"-3] ¹ ² ³ Мать 16 детей из Марий Эл: «У нас в семье действует одно железное правило: "Слово мамы и папы – закон"» (руш.). www.marpravda.ru. Тергыме кече: 19 идым 2025.

[4] Мать-героиня из Марий Эл воспитывает 16 детей (руш.). www.marpravda.ru. Тергыме кече: 19 идым 2025.

[«автоссылка2"-5] ¹ ² Глава Марий Эл вручил орден «Мать-героиня» жительнице Волжского района Наталии Васильевой (неопр.). www.vpgazeta.ru. Тергыме кече: 19 идым 2025.

[1]

[2]

[3]

[4]

[5]