Бендериаде

Васюки Фест
Васюки Фест
	фестиваль[d]
Эртараш тӱҥалме	1995
Верланымаш
Эртарыме вер	Чыкма;
Эл	Россий;

«Бендериаде» — тиде 1995 ий гыч Марий Эл Республикын Чыкма олаштыже ий еда эртаралтше воштылчык да мыскара фестиваль.

Фестиваль Ильф ден Петровын романласе геройын — Остап Бендерын лӱмжӧ дене кылдалтын.

2025 ийыште ребрендинглан кӧра фестивальын лӱмжым вашталтыме, ынде тудо — «Васюки Фест», пайремын форматшым вашталтыме огыл^[1].

Историй

Ильф ден Петровын «12 стульев» произведенийыштышт 1927 ий 22 июньышто кугу комбинатор Остап Бендер Васюки олаш толын. Лачак тыште чапланыше шахмат таҥасымаш (турнир) эртен. Остап Бендер чыланыштым ӧрыктарыше ойжым каласен: кузе тоштемше, рӱдӧ ола деч ӧрдыжтӧ улшо (провинцийысе) олам тӱнян сылне рӱдолашкыже савыраш. «12 стульев» сылнымут произведенийыште Васюки ола шотеш Чыкма олан сынже лийын^[2].

«Бендериада» воштылчык да мыскара фестиваль нерген шонымашым историк-краевед Арнольд Муравьёв, Чыкман мэрже Юрий Тарасов да «Пачемыш» («Оса») воштылчык да мыскара журналын тӱҥ редакторжо Виталий Шкалин темленыт. Архив да историй шотышто полышым Чыкмасе историй-сылнысымыктыш тоштерын пашаеҥже-влак Владимир Шерстнёв да Николай Просвирин пуэныт^[3].

Йӱла почеш фестивальыште Остап Бендерын тӱҥ рольжым Российын сулло артистше, Г. Константинов лӱмеш руш драме академий театрын актёржо Юрий Синьковский модеш.

«Бендериадын» эртымыже

Пайрем Остап Бендерын, Киса Ворбьяниновын, мадам Грицацуеван, Фёдор ачан да Эллочка-людоедкын теплоход дене пайремлын ийын толмышт дене тӱҥалеш. Нуно серышке волат, вашлийше калыкым саламлат да олаш каят, тиде жап гыч ола Васюкиш савырна. Ола уремла мучко «Таза авантюризм шӱлышым ылыжтарена!» таҥтошкал (карнавал) ошкылмаш эрта, тушко оласе еҥ да толшо уна-влак ушнат^[4].

«Стасик, курж, курж!» спорт лӱман таракан куржталмаш, «Планете кокласе шахмат конгрессым пуа!» шахмат дене писын модмо турнир, «Антилопа Гну» конкурс программе-влак, «Остап Бендер — кугу Кутюрье» театр шоу, «Бендериадка» йоча модыш таҥасымаш, гармонист да такмакым йоҥгалтарыше-влакын конкурсышт, мурен-куштымаш да кава йымалсе концерт-влак эртаралтыт. Йӱла почеш Остап Бендер «12 стульев» аукционым эртара. Кажне кумылан шке пиалжым терген кертеш — пӱкеным оксала але уш-акыл викториныште модын налаш лиеш. Ик пӱкеныш бриллиантым шылтен ургымо^[5].

Остап Бендер лӱмеш воштылчык да мыскара тоштер

Чыкмаште Остап Бендерын тоштерже уло, тудо тошто купеч полатын кокымшо пачашыштыже верлана. Тушто «12 стульев» роман дене кылдалтше шуко арвер аралалтеш. Мутлан, скульптор Николай Леденейкинын ыштыме шун шахмат модыш. Тоштерыште «12 стульев» романысе герой-влакын вургемыштым чиен ончаш лиеш: Бендерын, Киса Воробьяниновын, Эллочка Щукинан але мадам Грицацуеван. Тыгак романысе ик персонажын эртарыме экскурсийым йодаш лиеш^[6].

Палемдымаш

Кылвер-влак

К:Рувики:Изолированные статьи (страна: Q159)Q132241Бендериаде

[1] MariMedia.ru

[2] Туризм в Республике Марий Эл

[3] «Бендериада» в Козьмодемьянске

[4] Марийская правда

[5] Марийская правда

[6] Почему в Марий Эл особенно любят Остапа Бендера

[1]

[2]

[3]

[4]

[5]

[6]