Яндимиров, Максим Миронович

Максим Миронович Яндимиров
Максим Миронович Яндимиров
Шочмо кече	8 ага 1963
Шочмо вер	Ӱлыл Регеж, Йӱледӱр ял шотан илем[d], Кужэҥер кундем, Марий Автоном Совет Социализм Республик, РСФСР[d], СССР;
Колымо кече	21 сӱрем 2011 (48 ий)
Колымо вер	Шарм-эль-Шейх, Египет;
Эл	СССР; Россий;
Паша сомыл	актёр
Награде да премий

Максим Миронович Яндимиров (8 ага 1963, Ӱлыл Регеж, Марий Автоном Совет Социализм Республик — 21 сӱрем 2011, Шарм-эль-Шейх, Египет) — совет да россий театр актёр. Россий Федерацийын сулло артистше (1999)^[1].

Илыш корныжо

Максим Яндимиров 1963 ий 8 агаште Марий АССР Кужэҥер район Ӱлыл Регеж ялеш шочын. Кужэҥер район Шорсола ялыште ача деч посна кушкын. Изиж годым тыгыде оксам чондайыш поген, маныт. «Молан погет?» йодмылан вашештен: «Шернур пазарыш каемат, ачайым налын толам…»^[1]

1970—1980 ийлаште Шорсола кыдалаш школышто тунемын.

1980 ийыште Луначарский лӱмеш ГИТИС-ыш (П. О. Хомскийын курсшо; III калыкле студий) тунемаш пурен. Кумшо курсышто тунеммыж годым моско ӱдырым марлан налын, Кирилл эргышт шочын. 1985—1986 ийлаште Совет Армийыште служитлен.

1986 ий гыч пытартыш кечыж марте Вячеслав Спесивцевын Москосо самырык театрыштыже тыршен. Актёрын икымше рольжо (дебютшо), Чингиз Айтматовын романже почеш шындыме, «Плаха» спектакльыште Петрухан рольжо лийын. Режиссёр самырык артистын усталыкшым пеш кӱкшын аклен:

Максим Яндимиров — икымше артист, кӧн тӱҥ рольым модмыжо мыланем моткоч келшен.

Ты театрын труппыж дене Россий да йотэл гастрольышко лектын коштын. Россий Федерацийын сулло артистше Дмитрий Аксёнов «Сто лет одиночества» спектакль дене Мексикыш коштмышт нерген тыге шарнен:

Вот тиде гастроль ыле! Пӱтынь Мексикым шерын лектынна. Эн кугу сеҥымашна Максимлан кӧра лийын. Ончышо-влак тудым йӧратен шынденыт. Гвадалахараште сеньорита-влак Мелькиадесын чыла плащ полдышыжым кӱрыштыныт, ош шляпажымат поген налыныт. Тыгаяк шокшо вашлиймаш Кубышто лийын.

Театрыште 20 ий утла тыршыме жапыште 50 утла рольым модын. Тӱҥ рольжо-влак: Г. Гарсиа Маркесын романже почеш «Сто лет одиночества» спектакльыште Мелькиадес, «Ромео и Джульетта» спектакльыште Ромео, В. Максимовын «Семь дней творения» спектакльыште Лёва Храмов, «Евгений Онегин»-ыште Гремин, «Бесприданница»-ште Кнуров да молат^[1].

2005 ийыште Йошкар-Олаште ончышыжо-влак Максим Яндимировым Москосо самырык-влак театрын труппыж дене пырля кугу куан дене вашлийыныт.

Илыш гыч кайымыже

2011 ий 14 сӱремыште Яндимиров египетысе Шарм-эш-Шейх курортыш чоҥештен толын. Толмеке, актёрын вигак вӱргорныжо кӱрышталтын (разрыв аневризмы) да инсульт лийын, тудым International Hospital-ын верысе клиникышкыже пыштеныт. Ушым йомарен, нелын черланымым шотыш налде, эмлымверыште операцийым ыштен огытыл. Кок кече гыч эмлыше-влак вуйторыкын колымыж нерген каласеныт, 21 сӱремыште Максим Яндимиров илыш гыч каен^[2]. Тудо 48 ияш лийын.

27 июльышто Москосо самырык-влак театр гыч, 28 июльышто Марий Элысе М. Шкетан калык драме театр гыч пытартыш корныш ужатеныт. Кужэҥер вел Шорсола ял шӱгарлаште аваж пелен тойымо.

2014 ийыште Россий Федерацийын сулло артистше Дмитрий Акёнов Йошкар-Олаште, Максимым шарныме лӱмеш, «Шухер» моноспектакльым модын. Кирилл эргыже ий еда Петро кечын (12 июль) ачажын да коважын шӱгарже деке толеш.

Ешыже

Аваже: Марфа Никитична Яндимирова.
Пелашыже: Ирина.
Эргыже: Кирилл.

Театрысе пашаже-влак

«Плаха» (Ч. Айтматов) — Петруха
«Сто лет одиночества» / «Шӱдӧ ий шкет лийме» (Г. Гарсиа Маркес) — Мелькиадес
«Ромео и Джульетта» / «Ромео ден Джульетта» (Шекспир) — Ромео
«Семь дней творения» / «Усталыклан шым кече» (В. Максимов) — Лёва Храмов
«Евгений Онегин» (А. С. Пушкин) — Гремин
«Бесприданница» «Кузыкдымо»(А. Н. Островский) — Кнуров
«Москва — Петушки» (В. Ерофеев) — Митрич
«Осень патриарха» / «Патриархын шыжыже» (Г. Гарсиа Маркес) — посол
«Тавро Кассандры» / «Кассандран тамгаже» (Ч. Айтматов) — Роберт Борк

Йоча-влаклан спектакльлаште

«Щелкунчик»
«Храбрый портняжка» / «Тале ургызо»
«Маленькая Баба-Яга» «Изи Вувер кува» — ведьма
«Руш калык йомак-влак» — мераҥ.

Палемдымаш

↑ ¹ ² ³ Марийская биографическая энциклопедия-2, 2017, с. 525.
↑ Артист московского театра умер в Египте, не дождавшись помощи и отправки на родину (неопр.). web.archive.org. Тергыме кече: 30 идым 2025.

Литератур

Мочаев В. А. Яндимиров Максим Миронович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 525. — 606 с. — 1500 экз. — ISBN 978-5-905314-35-3.

Кылвер-влак

Яндимиров Максим | Московский Молодёжный Театр под руководством В. Спесивцева (неопр.). web.archive.org. Тергыме кече: 30 идым 2025.

[_524a40ecd4589aa0-1] ¹ ² ³ Марийская биографическая энциклопедия-2, 2017, с. 525.

[2] Артист московского театра умер в Египте, не дождавшись помощи и отправки на родину (неопр.). web.archive.org. Тергыме кече: 30 идым 2025.

[1]

[2]