Кугарня (газет)
| Марий Эл Республикысе «Кугарня» газет кугыжаныш казна унитарный предприятий | |
| газет | |
|
|
|
| ГАУК РМЭ «Информационное агенство «Марий Эл» | |
| Степанова Ирина Вильевна | |
| 13 еҥ | |
| 5 сӱрем 1991 | |
| марий йылме | |
| арнялан ик гана | |
| Савык пӧрт | |
| 4700 | |
|
|
|
| Сайт: кугарня24.рф |
Кугарня (руш. Пятница) – Йошкар-Олаште олыкмарий йылме дене савыкталтше самырык-влаклан газет. Марий Эл Республикысе Олык Ипай лӱмеш Кугыжаныш самырыктукым премийын лауреатше (2010).[1] Редакций Савыктыш пӧртыштӧ. «Марий Эл» увер агенствышке пура.
Газет нерген
- Негызлыше – Марий Эл Республикын Тӱвыра, савыктыш да калык паша шотышто министерствыже.
- Лукталташ тӱҥалын – 1991 ийын сӱрем тылзын 5-ше кечынже кугарня кечын.
- Лукталтеш – арнялан 1 гана.
- Тиражше – 4700 экземпляр.
Кузе шочын
Колымшо курымын индешлымше ийлаште вашталтыш пагыт лийын: перестройко, гласность, демократий шӱлыш озаланен. Саде у саман калыклан варажым ятыр нелылыкым конден. Лач тиде пуламыр саман дене пайдаланен, самырык литератор-влакын «У вий» ушемышт 1930-шо ийлаште репрессий саман тӱҥалме дене петыралтше самырык-влакын газетыштым угыч лукташ тӱҥалаш ойым пидын.
Такшым эше 1985 ийыштак саде самырык ушемын активистше-влакын вуйыштышт тыгай газетым лукташ тӱҥалме нерген шонымаш шочын. Студент ден марий интеллигенцийын самырык да чолга еҥже-влак у газетым почаш кӱлмӧ шотышто кидпалым погаш калыкыш тутыш лектын коштыныт. Варажым Москошко, тыгак республикысе тӱрлӧ кӱшыл кабинетлаш, вуйым савен, ик гана веле огыл пурен-лектеденыт. Тудо жапыште саде суапле шонымашым илышыш шыҥдараш неле лийын. Пошкырт кундем Мишкан район Тӧҥгак ялышет лудшо-влак дене вашлиймаш. 1992 ий.
1991 ий. Тунам пӱтынь эл мучко вуйлатыше орган-влак Коммунист партий деч ойырлаш тӱҥалыныт. Марий республикыштат сӱрет тугаяк лийын: Верховный Совет ден Коммунист партий реском кундемыште лектын шогышо газет-влакым шке коклаштышт пайленыт. Тыге Верховный Совет рушла савыкталтше «Республика» ден марла лектын шогышо «Марий коммуным» шке шулдыр йымакыже налын. А РСФСР Компартий Марий рескомлан рушла лекше «Марийская правда» газет веле логалын. Тудлан тунам марла лекше изданият кӱлын. Тидлан кӧра «Кугарня» газетлан шочашыже йӧн лектын. Жапым шуйкалыде, Компартий Марий реском у газетым лукташ тӱҥалме нерген пунчалым луктын. Тӱҥ редакторлан Александр Абдуловым пеҥгыдемденыт. А 5 июльышто, кугарня кечын, «Кугарня» газетын икымше номерже калык деке миен шуын.
Тӱҥ редактор-влак
- Абдулов, Александр Саликович (1991 – 1994)
- Алексеев И.И. (1994 – 1997)
- Козлов, Владимир Никифорович (1997 – 1998)
- Соловьев, Юрий Ильич (1998 – 2001)
- Иванов, Сергей Иванович (2001 – 2002)
- Семёова, Лидия Васильевна (2002 – 2003)
- Петров, Эрик Алексеевич (2003 – 2004)
- Петров, Александр Алексеевич (2004 – 2010)
- Матвеев, Михаил Иванович (2010 – 2015)
- Иманаев, Эдуард Аркадьевич (2015 – 2021)
- Аптулаев, Владимир Васильевич (2021 – 2021)
- Степанова, Ирина Вильевна (2021 – кызыт марте)
Таче
Тачысе кечылан «Кугарня» газет редакцийыште 13 еҥ пашам ышта. Коллектив самырык.
Газетым Марий Элыште веле огыл, тыгак Пошкырт, Киров, Одо, Татарстан, Урал кундемлаште изижат-кугужат уло кумылын лудын шогат. Тылеч посна «Кугарням» электрон йӧн денат лудаш лиеш.
Газет самырык-влакын йодмыштым шукташак тырша: лаштыклаштыже кугезе йӱлам арален кодымо шотышто ятыр материалым савыкта, кушкын толшо самырык тукымын илыш ончалтышыжым вияҥдаш полша да Шочмо элым, марий кундемым утыр йӧраташ таратен шога.