Иванова, Людмила Викторовна
| Людмила Иванова | |
|---|---|
| Людмила Викторовна Иванова | |
 | |
| Шочмо годсо лӱм | Людмила Викторовна Гурьянова |
| Шочмо вер |
 Марий Эл, Маскасола кундем |
| Гражданлык |
 Россий |
| Паша сомыл | марий мурызо |
| Икшыве-влак | Ксения, Виктор |
| Награде да премий |
Марий Эл Республикын сулло артисткыже (2008 ий) |
Людмила Иванова (30 Ага 1963 ий, Маскасола кундем Яныкай-сола ял) — марий мурызо. Тӱҥ шотышто академический вокал дене йоҥгалтарымыж дене чапланен. Марий Эл Республикын сулло артисткыже (2008 ий). Эстраде марий муро-влакымат мура.
Илыш корныжо
30 Ага 1963 ийыште Маскасола кундем Яныкай-сола ялеш шочын. Пашаверым Марий кугыжаныш филамонийыште муын: хор капеллыште мура. «Марий Эл Радион» эфирыштыжат уста мурызын мурыжо-влак чӱчкыдын йоҥгат. Ача-аваже музыкым йöратеныт, ачаже ялыште эн тале гармоньчо лийын, аваже пеш мураш йöратен, сылне яндар йÿкан лийын. Верысе кандашияш школым тунем пытарымекыже, вес кундемыш илаш кусна. Тыге Людмила кыдалаш школым Рязань областьын Спасский районысо Кирицы посёлкышто тунем лектеш.
Тыштак муро деке утларак шÿмаҥеш. Школысо вокально-инструментальный ансамбльыште гитар дене шокташ тунемеш. Школым тунем пытарымеке, ÿдырым кӧргӧ чонжо уэш Марий Элыш конда. Ты гана 1980 ийыште Людмила Йошкар-Оласе Палантай лÿмеш музыкальный училищын вокальный отделенийышке тунемаш пура. Специальность дене Л. И. Мишуринан классыште тунемеш. 1984 ийыште училищым тунем пытарымеке, хоровой капеллыш пашам ышташ толеш. Тунам коллективым М.Ю.Капланский вуйлатен. Капеллыште рушла да марла у деч у произведений-влакым муреныт, Россий мучко тÿрлӧ олалашке гастроль дене коштыныт. Людмила Иванова молын семынак утларакшым хорышто мурен. Чыла оласе йочасадлаште, школлаште капеллын изирак группа дене концертым ончыктеныт. Йоча-влаклан лÿмын ямдылыме программе дене районласе школышкат коштыныт, Людмила шкежак концертын вÿдышыжö лийын.
Илен толын икымше гана солист семын 1999 ийыште руш калык муро дене сценышке лектын. Тылеч вара шкетын мурымо номер дене чÿчкыдынрак выступатлаш тÿҥалеш. Шкенжын репертуаржым марий муро-влак дене пойдара. Тудын кугу сценыште шкетын мурымыжо 2000 ийыште «Чолга шÿдыр» республиканский фестиваль годым лийын. Тунам Сеҥымашын XXX идалыкше лÿмеш тӱвыра полатыште композитор В.Куприяновын мурыжым курыкмарла йоҥгалтарен. Варарак Марий телевиденийыште икымше клипше лектеш. Композитор Валерий Кульшетовын «Мый мием чоҥештен» мурыжым калык ончыко луктеш.
Вара Людмила Иванова композитор-влак В.Алексеев, В.Захаров, В.Кульшетов, С.Маков, Ю.Бурдаков дене творческий кылым пеҥгыдемда. Людмилан ачаж ден аваже шӧртньӧ сÿаным палемденыт. Тиде юбилейлан композитор Юрий Бурдаков лÿмын «Шӧртньӧ сÿан» мурым возен. Тудым Людмила телевиденийын «Шÿмсем пӧлек» передаче гоч ача-аважым саламлыме семын йоҥгалтарен.
Еш
Мурызо ешан, марийланже икмыняр йоҥгалтарыме мурым пӧлеклен. Йочаже-влак: Ксения, Виктор, Ксения. Ача-аваже: Виктор Афанасьевич ден Татьяна Ивановна.
Йоҥгалтарыме мурыжо-влак
- Людмила Иванова – Авием - аваем
- Людмила Иванова – Айда йолташ
- Людмила Иванова – Илыш шонанпыл тÿсан
- Людмила Иванова – Лий эре пеленем (марийжылан мурым пӧлеклен)
- Людмила Иванова – Салам
- Людмила Иванова – Эртыше йӧратымаш
Кылвер-влак
- Газетов В.М. Колымшо курымысо марий мурызо-влак («Марийские певцы двадцатого века»). Йошкар-Ола, 2004. — 60 с.
- В.Крылов. Артисты Республики Марий Эл. Очерк // «ОНЧЫКО», 2002 ий, №6 (468).