Ибулаев, Борис Илинбаевич

РУВИКИ-ште тыгай тукымлӱм дене вес еҥ нерген статьям лудаш лиеш: Ибулаев.

Борис Илинбаевич Ибулаев
Марий АССР ялозанлыкын министрже
1979 — 1986
Шочын	1934 ий 16 теле(1934-12-16) Баймурзино, Мишкан район, Пошкырт АССР, РСФСР, СССР
Колен	1995 ий 16 теле(1995-12-16) (61 ий) Йошкар-Ола, Марий Эл Республик, Россий
Партий	КПСС
Шинчымаш	Пошкырт ялозанлык институт
Профессий	колхоз председатель, райкомын икымше секретарьже
Награде

Борис Илинбаевич Ибулаев (1934 ий 16 декабрьыште, Ардаш, Мишкан район, Пошкырт АССР, РСФСР, СССР — 1995 ий 16 декабрь, Йошкар-Ола, Марий Эл, Россий) — совет кугыжаныш да партий пашаеҥ, ялозанлык пашаеҥ. Марий АССР-ысе ялозанлык министр (1979—1986), «Марийхлебопродукт» фирмын генеральный директоржо (1986—1995). РСФСР ялозанлыкын сулло пашаеҥже (1985). Марий АССР Кӱшыл Каҥашын 10 да 11 созыв-влакын депутатше (1980—1990). КПСС йыжыҥъеҥ.

Илыш корныжо

1934 ий 16 декабрьыште кызытсе Пошкырт кундем Мишкан район Ардаш ялысе марий кресаньык ешеш шочын.

1956—1957 ийлаште ВЛКСМ Мишкан райкомын икымше секретарьже лийын. 1957 ий гыч Карл Маркс лӱмеш уэмден кугемдыме колхозын председательжылан тыршен, вара — районысо ялозанлык виктемым вуйлатен. 1962—1965 ийлаште пашазе-влакын Мишкан районысо депутат-влак Каҥаш исполкомын депутатшылан да йыжъеҥжылан сайлалтын.

1964 ийыште Пошкырт ялозанлык институтым тунем пытарен.

1966 ий гыч КПСС Марий обкомын икымше секретарьже П. В. Ураевын ӱжмыж почеш — Марий АССР-ыште: 1967—1970 ийлаште — КПСС Советский райкомын икымше секретарьже, 1972—1974 ийлаште — КПСС Шернур райкомын, 1976—1979 ийлаште — КПСС Кужэҥер райкомын.

1979—1986 ийлаште — Марий АССР ялозанлыкын министрже. 1986—1995 ийлаште — «Марийхлебопродукт» фирмын генеральный директоржо. Пеҥгыдын йодшо, чыным аклыше вуйлатыше лийын, калыкым пашалан кумылаҥден моштен, ялозанлыкын йодышыж-влакым сайын пален да тӧрлымӧ корным раш ужын.

1980—1990 ийлаште Марий АССР Кӱшыл Каҥашын 10 да 11 созывласе депутатшылан сайлалтын.

1995 ий 16 декабрьыште Йошкар-Олаште колен.

Чаплӱм да суаптар-влак

• РСФСР ялозанлыкын сулло пашаеҥже (1985)
• «Почёт Тамга» орден (1966, 1971)
• «Чапле пашалан. Владимир Ильич Ленинын шочмыжлан 100 ий темме лӱмеш» медаль (1970)
• Пошкырт АССР Кӱшыл Каҥаш Президиумын Чапкагазше (1960)
• Марий Эл Республикын Чапкагазше (1994)

Палемдымаш

Литератур

• Опарина Т. Т. Ибулаев Борис Илинбаевич // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 140. — 2032 экз. — ISBN 5-87898-357-0.
• Ибулаев Борис Илинбаевич // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 388. — 872 с. — 3505 экз. — ISBN 978-5-94950-049-1.
• Опарина Т. Т. Ибулаев Борис Илинбаевич // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 163. — 606 с. — 1500 экз. — ISBN 978-5-905314-35-3.