Волжскын ойыпшо

Волжскын ойыпшо
Рашлык
Пеҥгыдемдыме	2002 ий 10 шыжа
Щит	француз сынан, пурла могыр гыч шӧрын велыме ший да кандалге тӱсан
Моло ужаш	ший сака да нужгол
Автор-влак
И. В. Ефимов, В. Г. Беседин

«Волжск ола» ола округын ойыпшо — Волжск олан официал символжо, верысе шкевиктышын да муниципал кӱкшытын тамгаже улеш.

Кызытсе ойып 2002 ий 10 шыжаште Волжск оласе погынын пунчалже дене пеҥгыдемдалтын да Марий Эл Республикын Геральдике регистрышкыже пурен.

Ойыпын сынже, тамган негызше

Пурла могыр гыч шӧрын велыме ший да кандалге тӱсан щит, ты тӱсыштӧ кӱш чоҥештыше сака кайык йолжо дене пӱгырналше ший нужголым кучен. Сакан нерже, шинчаже, йолжо, тыгак нужголын шинчаже да пӱйжӧ шӧртньӧ тӱсан.

Ойыпын негыз да ешартыш тӱсшӧ-влак олан Юл серыште верланымыжлан келшен толыт, тыгак олам чоҥышо ыштыкверын эртымгорныж дене — Марбумкомбинатын да оласе моло ыштыквер-влакын ойыртемыштым ончыктат.

Эртымгорно

1997 ийыште ола администраций ойыпын эн сай проектшылан конкурсым увертарен. Конкурсын лектышыже почеш Вадим Геннадьевич Бесединын ыштыме проектше ойыралтын. Щитын рӱдыштыжӧ сӱретче чоҥештыше сака кайыкым вераҥден. Щитын тӱсшӧ, авторын мутшо почеш, «поро металлын — ош да шемемше шийын — тӱсшым» ушештара. Щит шӧрын кореш дене кандалге да ужар тӱс дене пайлалтын. 1999 ийыште Вадим Беседин ойыпын чоҥалтмыжым изиш вашталтен, яра ужашыште йошкар марий ырес ешаралтын. Ойыпын официалне пеҥгыдемдыме нерген увер уке. Кагаз пӱтыртыш 1938 ийыште пашаш колтымо Марий целлюлоз-кагаз комбинатым — олам ыштыше ыштыкверым — ончыктен. Тиде ойып Волжск олан кызытсе ойыпшылан негыз лийын.

У жап

Кызытсе ойып Волжск оласе погынын 2002 ий 10 шыжаште лекше 143 №-ан «Марий Эл Республикын «Волжск ола» муниципал образованийын ойыпшо нерген» пунчалже дене пеҥгыдемдалтын, тушто Волжск олан тӱҥ тамгажын права кӱкшытшӧ, тудын возыктымаште да кучылтмаште радамже палемдалтын. Ойыпын авторжылан Вадим Геннадьевич Беседин ден Измаил Варсонофьевич Ефимов — Марий Эл Республикын Президентше пелен тӱҥ герольдмейстер — шотлалтыт.

Палемдымаш