Бодров, Александр Владимирович

Александр Владимирович Бодров
Кокымшо думын депутатше, 1907 г.
Шочмо кече	17 вӱдшор 1860(1860-04-17)
Шочмо вер	Вӱрзым, Вӱрзым уезд, Виче губерний, Россий империй
Колымо кече	29 сорла 1931(1931-08-29) (71 ий)
Колымо вер	У Торъял, Марий Автоном Совет Социализм Республик, Горький край, РСФСР, СССР
Гражданстве	Россий империй  СССР
Паша	земстве эмлызе, Виче губерний деч II Кугыжаныш Думын депутатше
Шинчымаш	Виче пӧръеҥ гимназий[d] Императорысо Озаҥысе университет[d]
Верам кучымаш	православий
Партий	Россий социал-демократий пашазе партий

Александр Владимирович Бодров (17 вӱдшор 1860, Вӱрзым, Вӱрзым уезд, Виче губерний, Россий империй — 29 сорла 1931, У Торъял, Марий Автоном Совет Социализм Республик, Горький край, РСФСР, СССР) — земстве эмлыше, Виче губерний деч II-шо Кугыжаныш думын депутатше.

Илыш корно

Дворян тукым гыч. Владимир Фёдорович Бодров (службо гыч кайыше поручик, Виче губернийын тӱрлӧ уездлаштыже служышо чодыразе) ден Александра Григорьевнан (ӱдыр тукымлӱмжӧ — Кулакова) ешыштышт шочын. Ик увер почеш — Вӱрзым олаште, весыж почеш — ачажын илемыштыже, Вӱрзым уездысе Ондан почингаште . Ача-аваже ондакак коленыт, Александрым ик акаже куштен. Озаҥысе прогимназийыште тунемын. 1881 ийыште Виче гимназийым тунем пытарен. Озаҥ университетыш тунемаш пурен, но 1882 ий 29 октябрьыште, студент-влакын пудыранчыкыштышт лиймылан кӧра, ик ийлан тунеммаш гыч луктын колтеныт. Вӱрзымыш увертарыде эскерыман ссылкыш колтеныт. 1885 ий 27 январьыште эскерымашым кораҥденыт. 1883 ий 1 сентябрьыште, «тетла погынымашке ом мий да нунын верч агитироватлаш ом тӱҥал» манын сӧрен возымеке, университетыште угыч тунемаш тӱҥалын. 1887 ийыште Озаҥ университетын медицине факультетшым тунем пытарен, эмлызе лӱмым налын. Эмлызе Бодров виолончельым шокташ йӧратен, шахмат дене модын, кеҥежым тошкыморва дене кудалыштын, телым коньки дене коштын .

Эмлызе Бодров (пурла гыч кокымшо) квартет дене.

Эмлызе Бодров (шола гыч кокымшо) тошкыморва дене кудалыштеш.

1887 ий 1 декабрь гыч 1888 ий июнь марте Виче губерний Нолинск уездыште земстве эмлызылан служиен. 1888 ий 25 июньышто Вӱрзым уездысе Лаж эмлымверын земстве эмлызе олмыш куснен. 1889 ий сентябрь гыч 1894 ий март марте — Шернур земстве эмлымверын эмлызыже. Вара Нартас эмлыме верыш куснен, тушто, Нартас селаште, Бодровын чолган тыршымыж дене, 1894 ий 3 ноябрьыште у эмлымвер почылтын. 1896 ий 1 июнь гыч 1897 ий 15 июнь марте Виче губернийысе земстве эмлымверыште шинчаэмлышылан пашам ыштен, вара угыч Вӱрзым уезд земствыш пӧртылын. Тушто 1898 ий 1 январь гыч тудлан У Торъял эмлыме кумдыкым вуйлаташ пуэныт. Шинчаэмлыше семын чапланен, тудын дек шинчам эмлаш губернийысе рӱдер гычат толыныт.

Виче губерний деч II Кугыжаныш Думын депутатше-влак.
Шогат: И. А. Наумов, А. В. Бодров, М. Г. Зайцев, В. А. Вахрушев, Н. В. Алашеев, В. И. Шешин;
Шинчат: С. Н. Салтыков, Л. А. Ефремов, Я. С. Шабалин, Ф. В. Тихвинский, Д. И. Деларов, Х. А. Масагутов, И. Л. Финеев

Россий социал-демократий пашазе партийыште шоген. 1904 ийыште Шеваржак ялыште (кызыт Виче кундем) йышт маёвкым эртарен. 1907 ий 25 январьыште Вӱрзым оласе курий дене сайлыше-влакын погыныштышт эмлызе Н. В. Чемоданов дене пырля губернийысе сайлыме погыныш сайлышылан сайлалтын (Бодров — 285 йӱк, Чемоданов — 266 йӱк, чылаже 412 еҥ лийын). Тидын деч вара полиций нунын дек обыск дене толын.

1907 ий 14 февральыште Виче губерний сайлыме погынымашын сайлыше тӱшкаж гыч II-шо Кугыжаныш думыш сайлалтын (196 сайлыше гыч 114 йӱк). Социал-демократ фракцийыште шоген.

1917 ий майыште Вӱрзым уезд земствын кугу (чрезвычайный) сессийыштыже Германий дене сарым умбакыже шуйымо верч ойлен, поян еҥ-влакым кугыжаныш казнам пойдараш манын, «Эрык заём» («Заём свободы») облигацийым налаш ӱжын, Жаплан шогалтыме Виктер могырышто лийын.

1924 ий марте У Торъял эмлымверыште пашам ыштен. Совет кучем Бодровлан Пашан Талешкыже чаплӱмым пуэн.

1931 ий 29 августышто У Торъялыште илыш дене чеверласен, 31 августышто эмлымверын кумдыкыштыжо тоеныт — шуко калык чумырген. Ош кӱ памятникеш тыге возымо: «У Торъял эмлымверым негызлыше Александр Владимирович Бодровлан».

Еш

А. В. Бодров ӱмыржӧ мучко шкет илен.

• Акаже — Зинаида (1848—?)
• Акаже — Варвара (1849—?)

Палемдымаш

Литератур

• Бодров Александр Владимирович // Марийская история в лицах
• Земский врач Бодров Александр Владимирович (1860—1931)
• Государственная дума Российской империи: 1906—1917. Б. Ю. Иванов, А. А. Комзолова, И. С. Ряховская. Москва. РОССПЭН. 2008. С. 62 (руш.). tez-rus.net. Тергыме кече: 7 пургыж 2026.
• Боиович М. М. Члены Государственной думы (Портреты и биографии). Второй созыв. М. 1907. С. 66

Архив

• Российский государственный исторический архив. Фонд 1278. Опись 1 (2-й созыв). Дело 45; Дело 601. Лист 2.