Сергий (Дружинин)
| Епископ Сергий | ||
|---|---|---|
._%D0%A2%D1%8E%D1%80%D0%B5%D0%BC%D0%BD%D0%B0%D1%8F_%D1%84%D0%BE%D1%82%D0%BE%D0%B3%D1%80%D0%B0%D1%84%D0%B8%D1%8F._1937_%D0%B3%D0%BE%D0%B4..jpg) | ||
|
||
| 1924 ий 23 ноябрь — 1927 ий 30 декабрь | ||
| Ончыч лийше | Геннадий (Туберозов) | |
| Алмаштыше | Евсевий (Гроздов) | |
|
|
||
| Шочмо годым лӱм | Иван Прохорович Дружинин | |
| Шочмаш |
20 пеледыш (2 сӱрем) 1863 |
|
| Колымаш |
17 идым 1937 (74 ий)
|
|
 РУВИКИ.Медиаште медиафайл-влак | ||
Сергий епископ (тӱняште Иван Прохорович Дружинин; 20 пеледыш [2 сӱрем] 1863, У села[d], Бежецк район[d] — 17 идым 1937, Йошкар-Ола) — Российысе православий черкын епископшо; 1924 ий 23 ноябрь гыч Нарва епископ, Ленинград епархийын викарийже. Руш черкыште иосифлянство толкыным негызлыше да вуйлатыше-влак кокла гыч иктыже.
2020 ий 11 мартыште Руш православий черкыште священномученик семын канонизироватлыме.
Илыш корно
Поян кресаньык ешеш шочын. Мӧҥгысӧ шинчымашым налын. Черкыште юмылан кумалмашым йӧратен; кушкын шумеке, монастырьлашке кошташ тӱҥалын. 1931 ийыште йодыштмо годым тудо каласен: «Мемнан ешыште монастырьыш кайыше родо-шочшо-влак шуко лийыныт, да мый шкежат 12 ияш гычак авамын родо-шочшыжо-влакын илыме пӧръеҥ монастырьлаште лияш тӱҥальым.»
1881 ийыште латкандаш ияш годымжо тукым ака-шӱжарже-влакын — Петербургышто «Воскресенский Новодевичий монастырьысе монахине-влакын — темлымышт да пеҥгыдын йодмышт почеш» Валаам Спасо-Преображенский монастырьыш послушник семын пурен, тушто икмыняр ийым эртарен. Иван Дружининын Валаамыште кузе илымыже да могай послушанийышке коштмыж нерген свидетельстве-влак кодын огытыл. 1931 ийыште Сергий шарналтен: «тиде монастырьыште послушаний условий-влак пеш неле лийыныт» да тудлан «тазалыкше начар улмылан кӧра неле лийын». Валаам монастырьын настоятельжын темлымыже почеш Стрельна посёлок воктенсе Сергий пустыньыш куснаш шонен пыштен.
1887 ий 9 сентябрьыште тудым налыныт да, пеҥгыдемдыме радам почеш, обительыште кок ий мирянин семын илен, юмылан кумалмашыш тыршен коштын да тӱрлӧ монастырьысе послушаний-влакым шуктен. 1893 ий 24 сентябрьыште Иван преподобный Сергий Радонежский лӱмеш Сергий лӱм дене монах лияш постригым налын. 1894 ий 20 ноябрьыште иеродиаконлан, а 1898 ий 24 апрельыште — иеромонахлан сайлалтын. 1894 ий сентябрь гыч — ризничийын полышкалышыже, 1902 ий 9 январь гыч — Шнуй-Троицкий Сергий пустыньын ризничийже.
1900 ий гыч Константин Константинович да Дмитрий Константинович кугу князь-влакын, тыгак Константин Константинович кугу князьын йочаже-влакын духовникышт лийын. Пеҥгыде ӱшанан монархист. Шуко ий эртен, ОГПУ-што йодыштмо годым ойлен: «Кугыжан престол деч кораҥме уверым мый кугу чаманымаш дене вашлийым, Юмын помазанникше верч ойгырышым, молан манаш гын мый династийын кӱлешлыкше дене эн чак кылдалтынам да кугыжаныш стройлан чылалан тауштышаш улам».
1904—1905 ийлаште пашам ыштыше армийыш, Маньчжурийыш, сарзе священник семын колтымо.
1915 ий 6 май гыч — Петербург воктенсе Сергий пустыньын настоятельже, архимандрит. 1917 ийысе революцийым, тудын мутшо почеш, «эллан эн неле азап семын умыленам, кудыжо ончычсо Российын пӧртылтыдымӧ колымашыжым ончыкта». 1919 ий тӱҥалтыште монах-влак тудым монастырь гыч поктен луктыныт (илыше-влакын ик ужашышт тудым пеҥгыде улмыжлан йӧратен огытыл) да Александр Невский лаврыш куснаш логалын.
1920 ий гыч — Шнуй-Троицкий Сергий пустынь деч 3 уштыш мӱндырнӧ верланыше Андрей Критскийын приход черкыжын настоятельже. Прихожан-влак коклаште пагалымашым сулен. 1924 ийыште тудын епископ хиротонийже верч йодмашым сайлан шотлен икмыняр тӱжем кидпалым погымо. Туге гынат епархийын Епископ каҥашыже тореш лийын (очыни, кандидатын богословий шинчымашыже уке улмылан кӧра).
Епископ
1924 ий 23 ноябрь гыч — Нарва епископ, Ленинград епархийын викарийже. Хиротонийым Тихон Патриарх вуйлаташ тӱҥалын.
Шке храмыштыже умбакыже служен, 1926—1927 ийлаште — Троицкий Измайлов соборышто, ончычсо Синодальный подворьен храмыштыже, Боровой уремысе Покров черкыште да поснак Христос ылыжме кафедрал соборышто.
1927 да 1928 ий тӱҥалтыште икмыняр тылзе Копорье епископ маналтын, а вара уэш Нарва епископ.
Иосиф (Петровых) митрополитын сторонникше. Сергий (Страгородский) митрополитын декларацийже ваштареш лектын, 1927 ий 26 декабрьыште, «тудын лукмо руш черке илышын у корныж ден радамжым кораҥдаш, вашталташ ок лий» манын пален налмек, Димитрий (Любимов) епископ дене пырля митрополит Сергий деч ойырлымо нерген актеш кидпалым пыштен. Тудо ийынак 30 декабрьыште Сергий митрополит тудлан службым шукташ чарен. Кӱчык жаплан шке оппозиционностьшо деч кораҥын, но 1928 ий январьыштак ончычсо шонымашышкыже пӧртылын да службым шукташ чарыме дене кӧнен огыл.
«Иосифлян» толкынын ик лидерже лийын. 1928 ий 12 октябрьыште владыка Димитрий дене пырля Максим (Жижиленко) епископлан хиротонийым шолып ыштен. 1929 ий ноябрьыште Димитрий владыкым арестоватлыме деч вара иосифлян Ленинград епархийым виктарыше лийын.
Арест, тюрьмаш шындымаш, ссылке
1930 ий 7 декабрьыште арестоватлыме. ОГПУ Коллегийын 1931 ий 8 октябрьысе пунчалже почеш епископым вич ийлан эрык деч посна кодаш судитлыме. Монархист ӱшанымашыжым шылтен огыл, следствий годым шкенжым патырын кучен. Увертарен: «Чылалан, мом большевик-влак ыштеныт да умбакыже ыштат, духовенствым да христос черкын ӱшанле еҥ-влакым лӱен пуштмыштлан, черкым шалатымылан, элнан тӱжем дене пытарыме эргыже-влаклан большевик-влак мутым кучаш тӱҥалыт, да руш православий калык нунылан тидым ок проститле. Мый шонем, кызытсе жапыште властьыш уло тӱня гыч христос верам поктышо-влак погыненыт. Руш православный калык тиде властьын нелытше да поктымыжо йымалне орлана…»
._%D0%A4%D0%BE%D1%82%D0%BE%D0%B3%D1%80%D0%B0%D1%84%D0%B8%D1%8F_%D0%B8%D0%B7_%D1%81%D0%BB%D0%B5%D0%B4%D1%81%D1%82%D0%B2%D0%B5%D0%BD%D0%BD%D0%BE%D0%B3%D0%BE_%D0%B4%D0%B5%D0%BB%D0%B0..jpg)
Срокым Ярославльысе посна ыштыме тюрьмаште шинчен. 1935 ий 7 октябрьыште НКВД пеленсе Посна Каҥаш кум ийлан Марий автоном областьыш ссылкыш колташ судитлен, Йошкар-Олаште илен, епископ шолып служен, верысе калык тудым шнуй коча семын пагален.
1935 ий 21 январь гыч 26 апрель марте Бутырский тюрьман эмлыме верыштыже лийын. 1935 ий 7 октябрьыште 3 ий ссылкыш колташ судитлыме да 5 декабрьыште Марий автоном областьысе Йошкар-Олаш колтымо, тушто шолып юмылан кумалмашым эртарен.
1936 ий февральыште полышым йодын Е. П. Пешкова деке лектын, кудын адресшым тудлан митрополит Сергийын почешъеҥже Авраамий (Чурилин) епископ пуэн. Серышыште тудо шке положенийже нерген тыге возен[1]:
«Мый кызыт Мар<ий> областьысе Йошкар-Ола олаште улам, мыйым тышке кум ийлан колтеныт, но коеш, Юмо мый декем эше Поро. Мыланем ик йорло монашенке лукым пуэн, да теве тудо мыйым онча. Мый шке нимомат ом керт, кидем мыланем начарын служат. Корнышто мыйым тӱрыснек толеныт, да мый шокшо вургем деч посна кылмен колем ыле. Тау поро еҥ-влак лектыныт да мыйым черке марте ужатеныт, а Озаҥыште мый вучыдымын Епископ Авраамийым вашлийым, тудо тиде ола гыч Архангельскыш ссылкыш кая ыле, да тудо мыланем адресым пуэн. Лач сандене мый толын шуым, а уке гын икверыште кылмыше комыля гай кием ыле.»
Арест да мученик семын колымаш
1937 ий 7 сентябрьыште арестоватлыме, титаклымаш тыгай лийын: «к-р. (контрреволюционный) пашалан ссылкыште улшо семын, …шкенжым олаште к-р. монархист-черке элемент семын палемден, калык коклаште к-р. пашам вӱда, тыгак шке вуйлатымыж почеш МАССР-ыште ИПЦ-н (Чын православий черкын) чыла к-р. группировкыжым уша». Шкенжым титаканлан шотлен огыл, ик лӱмымат каласен огыл. 1937 ий 11 сентябрьыште Марий АССР НКВД Управленийын Тройкыжо дене эн кӱшыл наказанийлан судитлыме. 1937 ий 17 сентябрьыште Йошкар-Оласе тюрьман подвалыштыже лӱен пуштмо.
Канонизаций да пагалымаш
1981 ий ноябрьыште РПЦЗ-н (Россий деч ӧрдыжсӧ Руш православий черкын) шуктымо у мученик да исповедник-влакым канонизироватлымашым ямдылыме годым, тудын лӱмжӧ российысе у мученик да исповедник-влакын черновой лӱмым ончыктыман спискышкышт пуртымо. РПЦЗ-н у мученик да исповедник-влакын лӱмым ончыктыман спискышт, кушко епископ Сергийы лӱмжат пурен, 1990-ше ийла мучаште гына савыкталтын Кострюков А. А. Черке да жап. Шанче-богословий да черке-мер журнал / А. А. Макарова. — Моско: Москосо Патриархатын тӱжвал черке кыл-влак пӧлкаже, 2020. — Т. XСI..
2020 ий 11 мартыште Руш православий черкын Шнуй Синоджын пунчалже дене еписком Сергийым Руш Черкын у мученик да исповедник-влакын соборышкышт епископ Максим (Жижиленко) да РПЦЗ-ште пагалыме эше икмыняр подвижник-влак дене пырля пуртымо, шарнымаш кечым 4/17 сентябрьыште пеҥгыдемдыме[2].
Палемдымаш
- ↑ Голоса АрхипеЛАГа. «Питаюсь исключительно подаянием добрых людей…» Письмо свщмч. Сергия (Дружинина). web.archive.org. Тергыме кече: 29 ага 2026.
- ↑ Журналы заседания Священного Синода от 11 марта 2020 года / Официальные документы / Патриархия.ru. Тергыме кече: 29 ага 2026. Архивлыме 7 шорыкйол 2022 ий.
Литератур
- Шкаровский М. В. Епископ Сергий (Дружинин). — Вестник ПСТГУ. Серия II: История. История Русской Православной Церкви, 2005. — С. 116—140.
- Сануков К. Н. Дружинин, Иван Прохорович (епископ Сергий) // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 112—113. — 2032 экз. — ISBN 5-87898-357-0.
- Сануков К. Н. Дружинин, Иван Прохорович (епископ Сергий) // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 129. — 606 с. — 1500 экз. — ISBN 978-5-905314-35-3.
- Шкаровский М. В. Сергий (Дружинин) // Православная энциклопедия. — М., 2021. — Т. LXII : «Свенская Печерская икона Божией Матери — Сергий». — С. 745—746. — 752 с. — ISBN 978-5-89572-069-1.