Руандысе геноцидым шарныме тӱнямбал кече
Руандысе геноцидым шарныме тӱнямбал кече ( ООН-ын моло официал йылмыла дене: англ. International Day of Reflection on the Genocide in Rwanda, араб. اليوم الدولي للتفكر في الإبادة الجماعية التي وقعت عام في رواندا, исп. Dia Internacional de Reflexion sobre el Genocidio cometido en Rwanda, кит. 卢旺达境内灭绝种族罪行国际反思日, фр. Journee internationale de reflexion sur le genocide au Rwanda ) — 2004 ий гыч тӱҥалын 7 апрельыште палемдалтеш (A/RES 58/234 № резолюций). ООН-ын Генерал Ассамблейже 2003 ий 23 декабрьыште увертарен (A/RES 58/234 №-ан резолюций). Шарнымаш кече Руандыште геноцид тӱҥалмылан лу ий темме дене кылдалтын.
Руандыште геноцид 100 кече наре шуйнен, 800 тӱжем утла еҥым пуштыныт.
ООН-ын Генерал секретарьже Пан Ги Мун 2010 ийысе серышыштыже каласен: ме илышым йомдарыше 800 000 наре титакдыме еҥ-влакым шарнена. Ме тыгак тиде туткарым илен лекше еҥ-влак пелен улына, кӧн мондаш лийдыме шарнымашыже мыланна лийше трагедийын кумдыкшым умылаш полша, кудыжым чарен шогалташ лиеш ыле.
Ий еда ямдылыме теме-влак
- 2016 ий — «Геноцидын идеологийже дене кучедалмаш».
- 2014 ий — «Шарнымаш, иктеш ушнымаш, уэмдалтмаш».
- 2012 ий — «Тыныс ончыкылык верч историй урок гыч».