Прокопьева, Алина Альбертовна

Алина Прокопьева
Чумыр увер
Шочмо кече да вер	16 сорла 1985(1985-08-16) (41 ий) Морко кундем, Марий Автоном Совет Социализм Республик, РСФСР, СССР
Гражданстве	СССР  Россий
IAAF	238515
Шке рекорд-влак
3000 м	9:12,16 (2011)
5000 м	15:24,96 (2012)
10 000 м	31:57,38 (2012)
10 км	34:05 (2008)
Полумарафон	1:13:18 (2013)
Марафон	2:28:59 (2016)
Тӱнямбал медаль-влак
Универсиаде-влак Ший Озаҥ 2013 10 000 м Ший Озаҥ 2013 полумарафон

Алина Альбертовна Прокопьева (шоч. 16 сорла 1985, Морко кундем, Марий Автоном Совет Социализм Республик), ӱдыр годымжо Алексеева — российысе куштылго атлетке, кужу дистанцийыш куржталмаш да марафон дене специалист. Наганосо марафонышто сеҥыше, Озаҥыште кеҥежымсе Универсиадын ший призёржо, Пекинысе тӱнямбал чемпионатын участникше. Российын тӱнямбал классан спорт мастерже (2012).

Илыш корно

Алина Алексеева 1985 ий 16 августышто Марий АССР Морко район Арын селаште шочын. Варажым Чувашийыш, Чебоксар олаш эрелан илаш куснен.

Новочебоксарскыште олимпий резервын 3-шо №-ан Лӱмын почмо йоча да самырык-влаклан спорт школышто куштылго атлетике дене тыршен, тренер-влак М. П. Кузнецов дене В. Н. Григорьев деке коштын. Олимпий резервын Чебоксарысе лӱмын почмо кыдалаш училищым, Капкультур, спорт, самырык-влак да туризм шотышто российысе кугыжаныш университетын Новочебоксарскысе филиалжым (2012) да Озаҥыште капкультур, спорт да туризм шотышто Юл кундемысе кугыжаныш академийым тунем пытарен (2015) .

Российысе таҥасымашлаште Моско область ден Чуваш Республик верч ӱчаша.

Шкенжым икымше гана 2007 ийысе тургымышто ончыктен, тунам Дебреценыште самырык-влак коклаште Европысо чемпионатыште 10 000 метр дистанцийыш куржмаште той медальым сеҥен налын. Тыгак Торо олаште кросс дене Европысо чемпионатыште самырык-влакын зачётыштышт таҥасен, тушто шкалан ончык лекмаште индешымше лийын да шочмо эл гыч пырля улшо таҥасыше ӱдыр-влак дене пырля ший медальым налын.

2008 ийыште Жуковский олаште кросс дене Российын шошымсо чемпионатыштыже 6 км дистанцийыште ший призёр лийын.

2009 ийыште ынде Прокопьева фамилий дене Жуковский олаште кросс дене Российын шошымсо чемпионатыштыже 6 км дисциплиныште той медальым сеҥен налын. Тидын годымак Чебоксарыште Российын тӱҥ чемпионатыштыже 5000 да 10 000 метрыш куржмаште кудымшо да кандашымше лийын.

2012 ийыште Москошто 10 000 метр дистанцийыш куржмо дене Россий чемпионатыште той медальым налын (варажым сеҥыше Елизавета Гречишниковам квалификаций деч посна кодымылан кӧра иктешлыше протоколышто кокымшо верыш куснен). Тиде тургымышто марафон дистанцийыш икымше гана ушнен — Сингапурысо марафонышто 2:38:34 лектыш дене кумшо лийын.

2013 ийыште Москошто 10 000 метрыш куржмо дене Россий чемпионатыште уэш той призёр лийын. Студент улмыж годым Озаҥысе кеҥеж Универсиадыште элын чапшым арален, тушто 10 000 метрыш куржмаште да пелемарафонышто ший медаль-влакым сеҥен налын — тиде сеҥымашыжлан Россий Федераций Президентын тауштымашыжым сулен налын.

2014 ийыште 2:30:56 лектыш дене Наганосо марафонышто сеҥен, но тунамак Иокогамысе тӱнямбал ӱдырамаш марафоным 2:29:18 жапыште куржын эртен да шымше верым налын.

2015 ийыште Гамбургысо марафонышто визымше лийын (2:29:18). Россий национальный сборныйын тӱҥ составышкыже логалмеке, Пекинысе тӱнямбал чемпионатыште элын чапшым аралаш правам сулен налын — тыште 2:32:44 лектышым ончыктен, таҥасымашын иктешлыше протоколыштыжо 15-ше верыш лектын.

2016 ийыште Волгоградыште марафон дене Россий чемпионатыште Прокопьева ший медальым сеҥен налын, тыгодым шкенжын рекордшым шынден — 2:28:59. Но Российысе куштылго атлет-влакым тӱнямбал таҥасымашла деч кораҥдымылан кӧра, тиде тургым гыч тӱҥалын кугу стартлашке ушнаш йӧнжӧ лийын огыл, тыгак Рио-де-Жанейросо Олимпий модмашымат кодашыже логалын — тудын олмеш Сибирьысе тӱнямбал марафонышто куржын да 2:37:56 лектыш дене финишыш кокымшо толын.

2017 ийыште Волгоградыште марафон дене Россий чемпионатыште уэш ший призёр лийын (2:30:53). Тыгак тиде тургымышто Озаҥысе марафонышто кокымшо лийын (2:31:23) да Екатеринбургысо марафонышто сеҥышыш лектын (2:41:54).

2018 ийысе Россий чемпионатыште 2:30:24 лектыш дене кумшо гана почела ший медальым налын.

2019 ийыште Озаҥыште Россий чемпионатыште 2:34:11 лектышым ончыктен да той медальым налын.

2023 ий майыште марафон дене Россий чемпионатыште 2:30:57 лектыш дене сеҥышыш лектын.

Палемдымаш

Литератур

• Мочаев В. А. Прокопьева (Алексеева) Алина Альбертовна // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 355. — 606 с. — 1500 экз. — ISBN 978-5-905314-35-3.