Нефёдов, Михаил Кузьмич
| Михаил Кузьмич Нефёдов | |
|---|---|
 | |
| Шочмо кече | 12 кылме 1936 (89 ий) |
| Шочмо вер | |
| Жанр | пейзаж, натюрморт, историй тӱссерыш, религий тӱссерыш, портрет, мифологий тӱссерыш |
| Тунеммаш | Абай лӱмеш Кугыжаныш педагогике институтын сылнысӱрет-графике факультетше |
| Стиль | импрессионизм, руш тӱссерыш |
| Сайт | nefedof.ru |
Михаил Кузьмич Нефёдов (шоч. 12 кылме 1936, Семиозёрка[d], Татар Автоном Совет Социалистик Республик) — живописец, Российысе сӱретче-влак ушемын йыжъеҥже.
Илыш корныжо
Михаил Кузьмич Нефёдов 1936 ий 12 кылмыште Татар АССР Семиозёрка ялеш шочын[1]. Ачажын кумылжым ончыде, сылнысӱрет шинчымашым налын[2], 1952 ийыште Озаҥысе сылнысӱрет училищым[1], вара Алма-Атасе Абай лӱмеш Кугыжаныш педагогике институтын сылнысӱрет-графике факультетшым тунем лектын[3]. Алма-Аташте 1963 ийыште тудын икымше шке ончерже эртен[2]. 1960 ий гыч 1975 ий марте Ленинск (Байконур) олан тӱҥ сӱретчыжлан пашам ыштен. 1975 ий гыч — СССР сӱретче-влак ушемын йыжъеҥже[1]. 1975 гыч 1998 ий марте Михаил Нефёдов Йошкар-Олаште илен да пашам ыштен, 1983 ийыште Российысе сӱретче-влак ушемыш пурен[2], а 1998 ийыште Раиф Богородице пӧръеҥ монастырь воктенысе Раифа илемыш илаш куснен[3].
Сымыктыш паша
Михаил Нефёдов Российын историйже («Дмитрийын колымыжо», «Марфа-посадница», «Петр I», «Княгиня Ольга», «Ӧпке олма»)[2] да религий теме дене жанр сӱрет-влакым воза. Озаҥысе сымыктышым шымлыше Мария Ильинан шонымашыж почеш, тематике сӱрет-влак неле жанрлан шотлалтыт гынат:
|
…Нефедовын сӱретше-влак ончалтышым йывыжа, поро чурий, шарналт кодшо ӱзгар дене огыт куандаре. Автор салонысо сымыктышын йодымыжым ок шукто, шке сӱретше дене тудо ончышым кутыраш ӱжеш, эртымгорным шарналташ, ту «жапысе шӱлышым» умылаш темла. | 
|
Сӱретче шкеже руш юмоҥам сӱретлымашым да руш реалист живописьым уэш шочыкташ кӱлешлан шотла, Васнецов школын сӱретчыж ден передвижник-влак касвел-европо сымыктыш деке моткоч лишыл лийыныт ман шона[2].
Михаил Нефёдовын сӱретше-влак Чуваш кугыжаныш сылнысӱрет тоштерыште[4] да Озаҥысе «Ак Барс» галерейыште улыт. Тудо 30 утла олаште кундемысе ончерлаште шке пашажым ончыктен, тыгак Москошто, Йошкар-Олаште, Озаҥыште. Тудын сӱретше-влак Парижысе Друо аукционышто ончыкталтыныт[1].
Шке ончерже-влак
- Абай лӱмеш институтын сылнысӱрет-графике факультетше, Алма-Ата, 1963 ий[2].
- «Куэмысе историй-влак», Озаҥ[2].
- Раиф илемын уэш шочмыжлан лу ий темме лӱмеш выставке, Озаҥ[2].
- «Живопись сымыктышыште 50 усталык ий», Марий республикысе сылнысӱрет сымыктыш тоштер, Йошкар-Ола, 2008 ий.
Палемдымаш
- ↑ 1 2 3 4 Михаил Нефёдов в галерее «Ак Барс». Тергыме кече: 23 кылме 2025. Архивлыме 4 ӱярня 2016 ий.
- ↑ 1 2 3 4 5 6 7 8 Распад души предотвратив (руш.). Тергыме кече: 23 кылме 2025.
- ↑ 1 2 Примите наши поздравления! (руш.). raifa.ru. Тергыме кече: 24 кылме 2025.
- ↑ Чувашский государственный художественный музей - Третий Рим. web.archive.org. Тергыме кече: 23 кылме 2025.
Литератур
- Полифония холста во времени. Михаил Нефёдов // Русская галерея XXI век № 2. — 2011.