Мосунов, Михаил Юрьевич
| Михаил Юрьевич Мосунов | |
|---|---|
 | |
| Тӱҥ увер | |
| Тичмаш лӱм | |
| Шочмо кече | 1963 ий 27 кылме (62 ий) |
| Шочмо вер | Йошкар-Ола, Марий АССР, РСФСР, СССР |
| Эл |
 Россий |
| Профессий | вокалист, композитор |
| Ыштыме жап | 1983 — кызытсе жап марте |
| Могай йӱк | тенор |
| Семӱзгар | гитар, синтезатор |
| Жанр | эстраде, поп-музык, рок-музык, оспел |
| Коллектив | «Впечатление» группо, «Апперкот» рок-группо |
| Награде |
Марий Эл Республикын калык артистше (2005) Марий Эл Республикын сулло артистше (1998) |
Михаил Юрьевич Мосунов (шоч. 27 кылме 1963, Йошкар-Ола) — совет да Россий эстраде мурызо, мурын авторжо, музыкант. Яков Эшпай лӱмеш Марий кугыжаныш филармонийын солист-вокалистше (1998 ий гыч). «Песня России» Российысе телевидений конкурсын лауреатше (1996), салтак мурылан пӧлеклалтше «Виктория» Российысе телевидений фестивальыште кок гана сеҥыше (1999, 2001). Марий Эл Республикын калык артистше (2005), Марий Эл Республикын сулло артистше (1998).
Илыш корно
1963 ий 27 ноябрьыште Марий АССР-ысе Йошкар-Олаште шочын. Йошкар-Оласе 10-шо №-ан кыдалаш школым да 13-шо №-ан ГПТУ-м «Электрик» специальность дене тунем пытарен. Совет армийыште службым эртен. «Торгмаш» заводышто водительлан пашам ыштен[1][2][3].
1983 ий гыч — музыкант-профессионал. 1993 ийыште Н. К. Крупская лӱмеш Марий педагогике институтын историй факультетшым заочно тунем пытарен. 1998 ий гыч Яков Эшпай лӱмеш Марий кугыжаныш филармонийын солист-вокалистше[1][2][3].
Кызыт Йошкар-Олаште ила да пашам ышта[1][2].
Семлык паша
Музыклан Йошкар-Оласе 10-шо №-ан кыдалаш школышто тунеммыж годым шӱмаҥын, вет тунеммыж годым школысо вокал-инструмент ансамбльыш коштын да школ хорышто мурен[1][2].
1980-ше ийла кыдалне Йошкар-Оласе М. И. Калинин лӱмеш тӱвыра полат пеленысе «Впечатление» музык группын вокалистше лийын. Тиде группын составыше дене «Юрмала-87» всесоюзный телевидений эстраде конкурсын участникше лийын[1][2].
2010 ийлан кокымшо пелыштыже Йошкар-Оласе «Апперкот» рок-группын вокалистше лийын. Кызыт ты музык коллектив шке мурыжымат, руш йылмыш кусарыме кумдан палыме тӱнямбал рок-версийымат йоҥгалтара. Тӱшка Эрик Сапаев лӱмеш Опер да балет театр дене дене пырля «Рок в опере» лӱман икмыняр концертым пуэн[1][2].
8 утла муро альбомын авторжо[3].
Тыге, 1994 ийыште Эстонийысе (Таллин) да Финляндийысе (Форса ола) студийлаште «Дорога» магнитофон альбомым луктын. Тыгак духовой музык дене 3 альбомым возымо[1][2].
1990-ше ийлаште Эстонийыште да Финляндийыште гастроль дене лиеден. Ятыр муро конкурсын да фестивальын участникше. 1996 ийыште «Зимний карнавал» муро дене Москошто «Песня России» Российысе телевидений конкурсын лауреатше лийын[3]. Салтак мурылан пӧлеклалтше «Виктория» Российысе телевидений фестивальыште кок гана сеҥышыш лектын: 1999 ийыште Юрий Зорин дене пырля «За того парня» мурым мурен да калык симпатий призым сеҥен, а 2001 ийыште ты фестивальыштак Гран-прим сеҥен налын[1][2][3].
Марий Эл Республикыште да республик деч ӧрдыжтӧ поро кумылым ончыктышо концерт-влак дене чӱчкыдын лектеда. «Чолга шӱдыр» («Немеркнущая звезда» Республикысе муро фестивальын участникше[1][2].
Шке шочмо вержылан, Йошкар-Олалан, икмыняр мурым пӧлеклен[1][2][4].
Шкенжын аклымыже почеш шуко многоактивный тенор дене мура.
Чаплӱм ден суаптар-влак
- «Песня России» Российысе телевидений конкурсын лауреатше (1996)[1][2][3];
- Марий Эл Республикын сулло артистше (1998)[3];
- Салтак мурылан пӧлеклалтше «Виктория» Российысе телевидений фестивальын сеҥышыже (1999, 2001)[1][2][3];
- Марий Эл Республикын калык артистше (2005)[3].
Еш
Ешан, икшыве ден уныкаже улыт[5].
Палемдымаш
- ↑ 1 2 3 4 5 6 7 8 9 10 11 12 Неизвестное об известном / Популярный в Марий Эл певец Михаил Мосунов: «Настоящий музыкант должен кайфовать от своего выступления» (руш.). yoshkarola.bezformata.com. Тергыме кече: 3 шыжа 2025. Архивлыме 14 сӱрем 2021 ий.
- ↑ 1 2 3 4 5 6 7 8 9 10 11 12 Михаил Мосунов: от пелёнок до Юрмалы (руш.). gorod-12.livejournal.com. Тергыме кече: 3 шыжа 2025. Архивлыме 18 теле 2017 ий.
- ↑ 1 2 3 4 5 6 7 8 9 Мочаев, 2017, с. 291.
- ↑ Михаил Мосунов подарит йошкаролинцам новую песню (руш.). МариМедиа. Тергыме кече: 3 шыжа 2025. Архивлыме 1 ага 2015 ий.
- ↑ Популярный в Марий Эл певец Михаил Мосунов: «Настоящий музыкант должен кайфовать от своего выступления», <https://www.marpravda.ru/news/religiya/populyarnyy-v-mariy-el-pevets-mikhail-mosunov-nastoyashchiy-muzykant-dolzhen-kayfovat-ot-svoego-vyst/>. Тергыме: 3 шыжа 2025.
Литератур
- Мочаев В. А. Мосунов Михаил Юрьевич // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 244. — 2032 экз. — ISBN 5-87898-357-0.
- Мосунов Михаил Юрьевич // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 556. — 872 с. — 3505 экз. — ISBN 978-5-94950-049-1.
- Мочаев В. А. Мосунов Михаил Юрьевич // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 291. — 606 с. — 1500 экз. — ISBN 978-5-905314-35-3.