Мигрант-влакын тӱнямбал кечышт
Мигрантын тӱнямбалысе кечыже ( ООН-ын моло официал йылмыла дене: англ. International Migrants Day, араб. اليوم الدولي للمهاجرين, исп. Día International del Migrante, кит. 国际移民日, фр. la Journée internationale des migrants ) — Генерал Ассамблейын темлымыж почеш (A/RES55/93 № резолюций) 2000 ий гыч ий еда 18 декабрьыште палемдалтеш. Тиде кечын 1990 ийыште ООН-ын Генерал Ассамблейже Пашазе-мигрант-влакын да нунын ешыштын праваштым аралыме нерген тӱнямбал конвенцийым пеҥгыдемден.
Генерал Ассамблейын резолюцийыштыже ООН-ышто улшо чыла кугыжаныш-влаклан, правительстве да правительстве огыл организаций-влаклан айдемын праваж нерген да мигрантын тӱҥ эрыкше нерген шинчымашым шарыме дене, опытым да нуным аралыме шотышто паша дене Мигрантын Тӱнямбал кечыжым палемдаш темлыме.
Мигрантын кечыжлан пӧлеклыме посланийлаштыже ООН-ын Генерал секретарьже чыла кугыжанышым-влакым мигрант шемер-влакын праваштым аралыме нерген Конвенцийыш ушнаш ик гана веле огыл ӱжын. Тудо ончыктен: тӱнямбал экономике утларак да утларак мигрант пашаеҥ-влак деч шога, мигрант-влак деч посна мер калыкын илышыже обществын ятырлан нужнаҥеш ыле.