Абукаев, Валерий Александрович
| Валерий Александрович Абукаев | |
|---|---|
 | |
| Шочмо кече | 1960 ий 22 идым (65 ий) |
| Шочмо вер | Башкир АССР, Мишкан кундем, Токтар ял |
| Гражданлык |
 СССР Россий |
| Паша сомыл | серызе, журналист, драматург |
Валерий Александрович Абукаев (шоч. 22 идым 1960, Токтар, Мишкан кундем, Башкир Автоном Совет Социалистик Республик, РСФСР[d], СССР) — марий серызе, журналист, драматург. Вес кумдан палыме серызе Вячеслав Абукаев-Эмгакын шольыжо[1].
Илыш корныжо
Валерий Абукаев 1960 ий идым тылзын 22-шо кечынже Башкир АССР Мишкан кундем Токтар ялеш кресаньык ешеш шочын[1]. Верысе кандашияш школым тунем пытарымеке, Бураевысо да Тынбаевысо кыдалаш школлаште шинчымашым поген. 1978—1980 ийлаште колхозышто пашам ыштен, клубым вуйлатен. Совет Армий радамыште службым эртен. 1984—1989 ийлаште Марий кугыжаныш университетын историй да филологий факультетыште кӱшын шинчымашым налын.
Дипломым налмеке, «Марий коммуна» газет редакцийыш ушнен[1]. 1992 ийыште «Кугарня» газетын пашаеҥже, вара Пошкырт Республикыште «Кугарнян» шкенле корреспондентше. Жап эртыме дене Валерий Абукаев шочмо кундемышкыже пӧртылын. Мишкан кундемысе «Келшымаш» («Дружба») газетын тӱҥ редакторын алмаштышыжлан шогалын[1]. Мишкан районный «Эрвел памаш» сылнымут клубым вуйлата[1].
Сылнымут корно
Почеламут, ойлымаш, кӱчык драматургический произведений-влакым В. Абукаев школышто тунеммыж годымак возкалаш тӱҥалын[1]. «Ямде лий» газет дене пеҥгыде кылым кучен, туштак тудын икымше почеламутшо да ойлымашыже-влак савыкталтыныт[1]. Сылнымут мастарлыкым студент пагытыште шуко поген. Тунамак тудын ойлымашыже-влак «Марий коммуна», «Ончыко» журнал да «Эрвий» альманахаште савыкталтыныт[1].
Тиде жапыштак Валерий Абукаев проза да драматургий деке лишкырак лийын. 1992 ийыште Марий театр юного зрителя ыште «Чоя мераҥ» йомак-пьесыж почеш спектакль, а Марий кугыжаныш университетын студент театрыштыже «Стипендий» повестьше почеш тыгай лӱманак спектакль шындалтын[1].
2008 ийыште IV Драматург-влакын Республик кӱкыштысӧ конкурсышто тудын «Токтар-патыр» йомак-пьесыже I степенян диплом дене палемдалтын[1].
Тӱҥ произведенийже-влак
- Нӧлпӧ вуян чонан курчак : ойлымаш // Ончыко. 1985. № 1. С. 107—108
- Нӧнчык патыр : С.Эманын йомакше негызеш возымо йомак-пьеса / Вал. Абукаев, В.Абукаев-Эмгак // Эрвий. Шочмо кече. Йошкар-Ола, 1988. С. 130—154
- Стипендий : повесть // Эрвий. Юзо памаш. Йошкар-Ола, 1989. С. 3—64.
- Искусство тӱняшке корно : очерк // Эрвий. Эр пеледыш. Йошкар-Ола, 1990. С. 83—86.
- Унала — вес тӱняшке : ойлымаш; Кож вожын тайныже : изи повесть // Мишкан — мыйын шулдыр. Йошкар-Ола, 1998. С. 39—70.
- Йылмыдыме кувай : повесть ден ойлымаш-влак. Мишкан, 2008. 192 с.
Палемдымаш
Литератур
- Васинкин, А.А.; Абукаев, В.А. (и др.). Писатели Марий Эл: биобиблиографический справочник. — Марийское книжное издательство, 2008. — P. 29–30.