Токташева-Виногорова, Эльвира Александровна

Эльвира Токташева
Эльвира Токташева
Тӱҥ увер
Тичмаш лӱм
Шочмо кече	11 пеледыш 1985 (41 ий)
Шочмо вер	Морко, Марий Автоном Совет Социализм Республик, РСФСР[d], СССР;
Эл	СССР; Россий;
Награде	Олык Ипай лӱмеш Кугыжаныш премий

Эльви́ра Токта́шева (Виного́рова (Токта́шева), Эльви́ра Алекса́ндровна шоч. 11 пеледыш 1985, Морко, Марий Автоном Совет Социализм Республик) — марий мурызо, Марий Эл Республикысе Олык Ипай лӱмеш Кугыжаныш самырыктукым премийын лауреатше (2012).

Илыш корныжо

1985 ий 11 июньышто Морко посёлкышто шочын. Школышто тунеммыж годымак шкенжым шкесемешке тӱвыраште (художественная самодеятельность) чолган ончыктен: школысо йоча хорышто, тӱвыра пӧрт пеленысе «Энсул» вокал-семӱзгар ансамбльыште мурен^[1].

Школым тунем пытарымеке, И. С. Палантай лӱмеш Марий республикысе тӱвыра да сымыктыш колледжыш «Эстраде сем сымыктыш» пӧлкаш тунемаш пурен. Умбакыже — Марий кугыжаныш университетын тӱвыра да сымыктыш факультетын студенткыже^[1].

Шке паша корныжым Марий Эл Республикын «Республикысе марий тӱвыра рӱдер» Кугыжаныш тӱвыра тӧнежыште художественный вуйлатыше семын тӱҥалын^[1].

Медведево посёлкысо тӱвыра да каныш рӱдерын илышкыл-тӱвыра усталык пӧлкан вуйлатышыжлан пашам ыштен. Тыгодымак «Эр ÿжара» фольклор ансамбль дене пашам ыштен^[1].

2007 ий гыч Марий Эл Республикын «Калык усталык да тӱвыра-каныш паша шотышто республикысе шанче-методике рӱдер» Кугыжаныш бюджет тӧнежыштыже кадр пӧлкан вуйлатышыжлан тырша^[2].

Усталык пашаже

Эльвира Токташева марий эстраде муро-влакым устан мурымыж дене чапланен. Икмыняр гана «Марий Эл Радио» калыкле радиостанцийын эртарыме «Идалыкысе муро» фестивальын лауреатше лийын^[3]. Солист семын шке усталыкшым Коми Республикысе Сыктывкар олаште этносем да финн-угор калык кочкышын «Варенье кече» Россий кӱкшытан фестивальыштыже (2011); Могилёв олаште Россий ден Белоруссий кундем-влакын V форумыштышт (2018); Йошкар-Олаште Эмгак-влакын Россий кӱкшытан кеҥежымсе Спартакиадыштышт (2019) ончыктен. Тудо гастроль пашам чолган шукта, марий муро-влакым республикыште гына огыл, Россий Федерацийын кундемлаштыжат (Татарстан, Пошкырт, Одо, Коми, Чуваш республик-влак, Свердловск да Киров кундемла) чолган йоҥгалтара. Тудын репертуарыштыже марий муро классик, шкевуя композитор-влакын 50 утла семаршашышт, марий калык муро-влак улыт.

Еш

Максим эргыже (2007 ийыште шочын)
Юлия ӱдыржӧ (2013 ийыште шочын) — мураш йӧрата. Тудын репертуарыштыже «Коваем» да «Кеҥеж» муро-влак улыт. «У ий дене» да «Малтыме муро» муро-влакым аваж дене пырля йоҥгалтара. «Идалыкысе муро — 2024» фестивальын лауреатше.

Сеҥымаш-влак

Марий Эл Республикысе Олык Ипай лӱмеш самырык-влаклан кугыжаныш премий (2012)
Марий Эл Республикысе Тӱвыра, печать да калык-влакын пашашт шотышто министерствын Таумутшо (2011, 2018, 2019)
Тӱвыра пашаеҥ-влакын Общероссийский профсоюз председательын Таумутшо (2021)
Марий Эл Республикын Тӱвыра, печать да калык-влакын пашашт шотышто министерствын Чаптаныкше (2016)
Марий Эл Республикысе Вуйлатышын Таумутшо (2023)^[2]

Палемдымаш

↑ ¹ ² ³ ⁴ Семейная династия Виногоровых (Токташевых) – гордость культуры республики. (руш.). VK. Тергыме кече: 8 идым 2025.
↑ ¹ ² Структура Центра (руш.). Республиканский научно–методический центр народного творчества и культурно–досуговой деятельности. Тергыме кече: 8 идым 2025.
↑ ВКонтакте | ВКонтакте (луг.-мар.). vkvideo.ru. Тергыме кече: 8 идым 2025.

Кылвер-влак

Эльвира Токташева (руш.). Яндекс Музыка. Тергыме кече: 8 идым 2025.
Эльвира Токташева on Apple Music (англ.). Apple Music - Web Player. Тергыме кече: 8 идым 2025.
Альбомы и дискография Эльвира Токташева | Last.fm (руш.). Last.fm. Тергыме кече: 8 идым 2025.

[vk-1] ¹ ² ³ ⁴ Семейная династия Виногоровых (Токташевых) – гордость культуры республики. (руш.). VK. Тергыме кече: 8 идым 2025.

[rcnt-2] ¹ ² Структура Центра (руш.). Республиканский научно–методический центр народного творчества и культурно–досуговой деятельности. Тергыме кече: 8 идым 2025.

[3] ВКонтакте | ВКонтакте (луг.-мар.). vkvideo.ru. Тергыме кече: 8 идым 2025.

[1]

[2]

[3]