Порволымо ер-влак (заказник)
| Кундемысе ыҥан кугыжаныш пӱртӱсым аралыме «Порволымо ер-влак» заказник | |
|---|---|
| Тӱҥ информаций | |
| Кумдык | 19290,63 га |
| Ыштыме кече | 1977 ий 23 идым |
| Вуйлатыше организаций | Новгород кундемын администрацийже |
| Верланымаш | |
| 58°50′05″ с. ш. 33°50′31″ в. д.GЯO | |
| Эл | |
| Регион | Новгород кундем |
| Эн лишыл ола | Боровичи |
«Порволымо ер-влак» — Российын новгород кундемысе ыҥан кугыжаныш пӱртӱсым аралыме вер-шӧр (заказник).
Историй
Ондак пӱртусым аралыме кумдыкым (заказникым) 1977 ий 23 сентябрьыште почыныт.[1] 2012 ий 29 декабрьысе Новгород кундем администрацийын пунчалже дене кундемысе ыҥан (значениян) «Карстовый ер-влак» кугыжаныш пӱртӱс заказникым ыштыме.[2]
Ойыртемалтше палыже-влак
Заказник Новогород кундемын йӱдвел-эрвел ужашыштыже, Боровичи, Любытино да Хвойный муниципал район-влакын мланде кумдыкышто верланен. Заказникым лушкыдо порволышо ландшафтым аралаш да пайдалын кучылташ ман ыштыме: порволымо ер-влакын вӱд поянлык кышкаржым, мландӱмбалын вашталт толшо геоморфологий сынжым, чодырасе биоценозын вӱдым аралымыжым, тыгак биологий тӱрлылыкым аралымаш, тӱвыра поянлыкын объектше-влакым да порволымо ландшафтын карстовый ландшафтым рекреацийлен туризмыште пайдаланымым шотыш кондаш ыштыме.
Поснак аралыман вер-влаклан шотлалтыт:[2]
- Порволымо ер-влакын гидрогеологий кышкарже чот шот денат, тӱрлӧ улмышт денат ойыртемалтеш, мланде ӱмбалсе да мланде йымалсе вӱдкорно ваш кылдалтыныт, мландым мушшо йогын моткоч куатлын пашам ышта, нунын йошкыным мушмо кумдыкын кугытшо да чӱчкыдын мланде йымаке кайымышт дене ойыртемалтыт.
- Утларак кумдан палыме порволымо ер-влаклан тыгай ер-влак шотлалтыт: Городно, Ямное, Съезжее, Шерегодро, Люто, нуно сылне пӱртӱс, тӱрлӧ кол поянлык, шуэн вашлиялтше кушкыл да чонан-влакын илыме верышт семын ойыртемалтыт.
- Порволымо ландшафт-влак
- Биоценотике тӱрлылык — тыглай огыл мландымбалне улмыжо, мланде кӧргысӧ вӱд поянлык да рок, кугу ийготан кожер ден пӱнчер, моркысо (тайгасе) экокышкарым ыштат, тиде акрет годсо пӱртӱсын илыш кышкаржым шарныкта, шкешотан олык, мланде порволымо дене лийше ер-влак ушем да нунын ден кылдалтше шуэн вашлиялтше вер-влак улыт.
- Шуэн вашлиялтше кушкыл-влак да нунын кушмо верышт: Новгород кундемыште кушшо да Йошкар книгаш пуртымо, шуэн вашлиялтше пучан (сосудитстый) куд тӱрло кушкылым да йомшаш лӱдыкшыштӧ улшо (подвидын, популяцийын) ир янлык ден ир кушкылым, поҥгым шотыш налын возымо (регистрироватлыме): лӧчкашудо/ рдест волосовидный (Potamogeton trichoides Cham. et Schlecht), кияк / осока сытевидная (Carex bohemica Schreb.), йожгашудо / осока волосистая (Carex pilosa Scop.), кӱдыроҥгыр / прострел раскрытый (Pulsatilla patens (L.) Mill.), мераҥковышта / молодило шароносное (Sempervivum globiferum L.) [syn. Jovibarba globifera (L.) J.Parn.], кишкышинча / фиалка коротковолосистая (Viola hirta L.).
- Новгород кундемысе да Россий Федерацийысе Йошкар книгалашке пуртымо шуэн вашлиялтше чонан радамыш кок тӱрлӧ кайыкым шотыш налын возымо: колвараш / скопа (Pandion haliaetus L.), европысо шем шӱян тыкте / европейская чернозобая гагара (Gavia arctica arctica L.), шӧрым кочшо чонанын ик видше Новгород кундемысе Йошкар книгаш пурталтын: летешка / летяга (Pteromys volans L.).
- Тӱвыра поянлык пого-влак.
Пӱртӱс поянлыкым аралыме верын чумыр кумдыкшо 19290,63 гектар. Ты вер шым тӱрлӧ кумдыкым уша:
- «Городно ер» кластер
- «Молодильнысе ер тӱшка» кластер
- «Ямное ер» кластер
- «Шерегодросо ер» кластер
- «Люто ер» кластер
- «Сухое ер» кластер
- «Боровысе ер» кластер
Сӱретлымаш
Пӱртӱсым аралыме кумдыкыш тыгай кугу ер-влак пурат: Городно, Чёрное, Дубно, Клетно, Ямное, Съезжий, Шерегодро, Люто, Борово, тыгак 18 уштыш шуйнышо Молодильно тӱшкасе ер-влак тыштак улыт. Ер-влак 1977 ийыште Новгород кундемысе исполкомын пунчалже почеш посна аралалымашке налалтыныт. Мланде порволымо дене лийше, ваш-ваш кылдалтше тӱрлӧ кумдыкан ер-влак кышкар — пӱтынь Йӱдвел-Касвел Российын шкешотан поянлыкше. Тыште серводородан памаш-влак улыт, тыгайже Новгород младыште пеш шуэн вашлиялтеш. Ер-шамыч, доломит ден ошкӱ (известняк)-шамычын кийыме верешышт шочыныт, нуным эркын-эркын вӱд мушкын шулыктарен да шканже мландыйымалне у корным почын. Порволымо дене лийше ерлаште вӱдын келгытше жапын-жапын вашталтеш, южгунам нуно пӱтынек мланде йымаке каят.
18 километрыш шуйнышо Молодильно чеп манме ер-влак Юл эҥерын бассейнышкыже ушнат. Тудо латкандаш ерым ушен — Кужу / Долгое (32 га), Шемъер / Чёрное (70 га, южное), Рогавиц (85,6 га), ыресан / Крестоватое (33 га), Пӱкшерме / Орехово (37 га), Изи да Кугу Клетно (72,7 га), Съезжее (154 га), Дубно (103,6 га), Шемъер / Чёрное (55 га, северное), Дриздино (7,2 га), Стахинын вӱдлакыже / Стахина лужа да Карасёвын вӱдлакыже / Карасёва лужа (46 га), Ошалге / Беленькое (46 га), Тресно, Глухое (12 га), Кӱ ер / Каменик, Клепалище, тыгак ӧрдыжтӧ шарлыше Вялец ер (53,4 га). Порволымо ер вӱдын кӱкшытшым ыштен шогышо мландырож (поноро)-влак Кужу / Долгое, Шемъер / Чёрное, Рогавица, Съезже ерлаште улыт. Нине ер-влак вӱдын кӱкшытшӧ нӧлталтме годым ик ерыш савырнен кертыт. Ямное ер чӱчкыдынак мланде йымаке порвола. Гродно ер вӱдын кӱкшытшӧ волымо годым икмыняр ужашлан шелалтеш. 20 ийыште ик гана вӱд тичмашнек кая да ер нуршерыш, вольыкым кӱтӱш коштыктымо верыш, савырна.[3]
Палемдымаш
- ↑ Заказник Карстовые озера — Заповедная Россия (недоступная ссылка — история).
- ↑ 1 2 Постановление от 29 декабря 2012 года № 889
- ↑ КАРСТОВЫЕ ОЗЁРА. Тергыме кече: 11 кылме 2016. Архивлыме 14 кылме 2016 ий.