Попов, Игорь Геннадьевич
| Игорь Геннадьевич Попов | |
|---|---|
| Игорь Геннадьевич Попов | |
 | |
| Шочмо кече | 1990.04.16 |
| Шочмо вер | РСФСР, Марий АССР, У Торъял район Човыксола ял |
| Эл | |
| Пелаш | Татьяна Попова |
Игорь Геннадьевич Попов шоч. 16 вӱдшор 1990, Човыксола, Марий Автоном Совет Социализм Республик — марий журналист, поэт[1].
Илыш корныжо
Игорь Попов 1990 ий вӱдшор тылзын 16-шо кечынже Марий АССР У Торъял район Човыксола ялыште шочын.
2008 ийыште Немда кыдалаш школым тунем лектын.
2013 ийыште Марий кугыжаныш университетыште «журналист» специальность дене кӱшыл шинчымашым налын.
2011—2013 ийлаште «Кугарня» газетыште обозревательлан пашам ыштен.
2014 ий гыч — «Ончыко» журналын ответственный секретарьже[2].
2017 ий гыч — «Ончыко» журналын тӱҥ редакторжо[2].
Ешан, пелашыже Татьяна Попова дене ик ӱдырым куштат.
2020 ий шыжа тылзын 2-шо кечынже «Россий писатель-влак ушемын» Марий Эл регионысо пӧлкаже И. Поповын кандидатурыжым 2019—2020 ийлан «Литератур, сымыктыш да архитектур» аланыште Олык Ипай лӱмеш Самырык-влаклан Кугыжаныш премийлан темлен.
Игорь Поповын пытартыш жапыште усталык пашаже сайынак воранен толеш. Сылнымут корнылаже тӱрлӧ образлан, таҥастарымашлан поян. Тудо таче эн ойыртемалтше да ӱшаным сулышо самырык автор гыч иктыже. Игорь Попов чон шижмашыжым почаш кӱлеш мутым муэш, лудшын чонышкыжо намиен шукта. Шочмо вер, пӱртӱс, ача-авам, ешым йӧратымаш, шӱм шижмашым тыматлын ончыктымаш да илыш нерген келгын умылымаш творчествыжым сӧрастарат.
Игорь Попов 2020 ийыште «Поч омсатым» сборникшылан Олык Ипай лӱмеш премий дене палемдалтын.
Суаптар
- Антонов Ивук лÿмеш «Ямде лий» газетын премийже (2007);
- Вяч. Абукаева-Эмгак лÿмеш «Кинде-шинчал» поэзий премий (2014);
- Марий Эл Республикысе тÿвыра, печать да калык-влак кокласе кыл шотышто министерствын Чап грамотшо (2019);
- Олык Ипай лӱмеш премий (2020).
Сылнымутшо
- Поро эр, ош куэр: почеламут-влак. Йошкар-Ола, 2013. 96 с.
- Скоро вернусь; Кузница; «Пишет ли о чём поэт…»: стихи / пер. Г. Смирнова // Современная литература народов России. Поэзия. Антология. М., 2017. С. 274—275.
- Поч омсатым: почеламут-влак. Йошкар-Ола, 2018. 160 с.
Палемдымаш
- ↑ Попов Игорь - Марийский язык - все произведения автора (руш.). Россия для всех. Тергыме кече: 26 шыжа 2025.
- ↑ 1 2 Попов Игорь Геннадьевич – Издательский дом «Марийское книжное издательство», 2019-12-03, <https://maribook12.ru/popov-igor-gennadevich/>. Тергыме: 26 шыжа 2025.
 |
|---|
