Келшымаш (стадион)
| «Келшымаш» стадион | |
|---|---|
 | |
| Верланымаш |
 Йошкар-Ола, Машиностроитель ур., 55 |
| Почылтын | 1961 |
| Реконструироватлыме | 2008 |
| Архитектор | Яков Калинин |
| Тынар еҥ пура | 12 500 |
| Верысе команде | «УОР-СШОР» |
| Пасу кугыт | 103×69 м |
| Шартыш | пӱртӱслӧ огыл (искусственный) |
«Келшыма́ш» стадио́н (руш. Стадион «Дружба») — Йошкар-Олан рӱдӧ ужашыштыже верланыше стадион. Тудо верысе «УОР-СШОР» футбол клубын мӧҥгысӧ стадионжо улеш.
Историй
1950-шо ийла мучаш — 1960-шо ийла тӱҥалтышыште олаште тӱҥ кугу стадионым чоҥаш кӱлешлык лийын. Верым Машиностроитель урем ден Свердлов бульвар корнывож воктене ойыреныт. 1961 ийыште тудо жаплан келшыше у, сӧрал стадион почылтын. Проектым архитектор Я. К. Калинин ямдылен да чоҥен. 2008 ий марте, уэмден чоҥымо деч ончыч, «Келшымаш» стадионын озаже Марий машина чоҥышо завод лийын[1]. Стадионышто ончышо-влаклан кок трибун лийын, тцшто еҥ-влакым шындаш 14 тӱжем вер лийын.
2007 ийыште стадионым уэмден ачалаш петыреныт.
Уэмден ачалымеке, «Келшымаш» стадион чыла шотыштат йодмо стандартлан келыштаралтын, да эн кӱкшӧ йодмашан таҥасымаш-влакымат эртараш йӧнан лийын. «Келшымаш» стадион универсал спорткомплексыш савырнен, тудын трибунжо 12 тӱжем утла еҥым шыҥдара. Стадионын тӱҥ ареныштыже пӱртӱслӧ огыл (искусственный) петыртышым шарен йӧнештарыме, тушто футбол да куштылго атлетике дене таҥасымаш-влакым эртараш йӧн уло[1][2]. Тыгак стадионышто посна шинчыме вер-влак, кок VIP ложо, комментатор кабин да 4 да 8 метран уверым шарыше кок экран уло. Экран-влак стадионын йӱдвел да кечывалвел могырыштыжо верланеныт. Модмо пасу 6 сантиметр кӱкшытан пластик шудо дене петырыме. Эрвел могырысо ончымо вер-влак леведыш йымаке пурталтыныт.
Стадионышто куштылго атлетике да футбол дене таҥасымаш-влак, тыгак концерт-влак эртаралтыт.
Стадионын ойыртемже-влак
- Модмо пасун кумдыкшо — 103 × 69 м.
- Шудо леведыш — пӱртӱслӧ огыл (искусственный)
- Шинчыме верын чотшо — 12 500.
- Тӱрыснек пластик шинчыме вер дене йӧнештарыме.
- VIP ложо-влак — 50 вер.
- Видеом ончашлан экран — тӱрлӧ тӱсан (8*4 метр).
- Куржталаш корно-влак — 400 метран 8 йыргешке корно.
- Тӧрштылмӧ вер-влак.
Кӱлешан событий-влак списке
- 2008 — Пӱтынь Российысе VII кеҥежымсе ялысе спорт модмаш-влак[3].
- 2019 — Эмгак-влакын пӱтынь Российысе III кеҥежымсе спартакиадышт[4].
Палемдымаш
- ↑ 1 2 Стадион Дружба, Йошкар-Ола (руш.). news.sportbox.ru. Тергыме кече: 24 теле 2025.
- ↑ Cтадион "Дружба", Йошкар-Ола (руш.). lsfc.e-champs.com. Тергыме кече: 24 теле 2025.
- ↑ Гости увезли с собой тепло марийской земли. Тергыме кече: 24 теле 2025. Архивлыме 25 сӱрем 2015 ий.
- ↑ 17 мая в Йошкар-Оле прошёл первый этап III Всероссийской летней Спартакиады инвалидов (руш.). mari-el.gov.ru. Тергыме кече: 24 теле 2025.
Литератур
- Энциклопедия Республики Марий Эл. — Йошкар-Ола, 2009. — С. 201—202. — 872 с. — ISBN 978-5-94950-049-1.