Заболотских, Яков Николаевич

Яков Николаевич Заболотских
Яков Николаевич Заболотских
Шочмо кече	29 пеледыш 1929 (96 ий)
Шочмо вер	Юмочка, Хлебниково ял шотан илем[d], Марий Турек район, Марий автоном область, Угарман область[d], РСФСР[d], СССР;
Эл	СССР; Россий;
Награде да премий

Яков Николаевич Заболотских (1929 ий 29 июнь, Юмочка ял, Марий автоном область) — паша ветеран, спортсмен. «1941–1945-ше ийлаште Кугу Ачамланде сарыште Сеҥымашлан 80 ий темме лӱмеш» лӱмгече медаль дене суапландаралтын (2025).

Илыш корныжо

Яков Заболотских 1929 ий, пеледыш тылзын 29-ше кечынже, Марий Турек вел Юмочка селаште шочын. Сар нерген митингыште пален налын. Тунам ялыште радио туныктышыжын гына лийын. Тудын деке чылан сарысе уверым колышташ куржталыныт. Сар тӱҥалме годым Яковлан 12 ий лийын. Фашист-влак дене кредалаш шонен илен. Сарыште улшо кугурак изажын бронепоездшым тушман кырен шалатен. Тудо Чувашийысе олмыктымо верыште лийын. Яков Николаевич тушко каен, тудын пелен кодаш шонен, но пырля каяш шонышо молат лийыныт да тудым налын огытыл.

Неле да шужен сар ийласе йоча жап Яковын ончыкылык илышыжым вашталтен. Яков Заболотскихын паша корныжо сар жапыште тӱҥалын, ончыч тудо пӧрт ӱмбал леведышым ачален коштын, кӱварым олмыктен, вара имне дене пашам ыштен. Ик суткаште 70 сотыкым курал савыра улмаш. Яков 60 килограмман неле мешак-влакым кондыштын. «Мыйын изам сар деч ончыч трактористлан пашам ыштен. Тудо колхозышто пашадар шотеш паша кечылан шурным налын, а вара сарыш каен. Ме тудын ыштен налме киндыжым пеш аныклен кочкынна. Леваш йымал шудышто маленна. Электровий тунам лийын огыл, пеш вашке керосинат чылаштын пытен. Мый вӱдан вол ӱмбалне (изике) чырам ылыжтен, ӱдырамаш-влаклан волгалтаренам, нуно фронтлан, сеҥымаш верч пидыныт, ургеныт, шӱдыреныт». Яков Николаевичын сар ийлаште тыршен пашам ыштымыже, лӱддымылыкшӧ пеҥгыде койыш-шоктышан айдеме лияш йӧным ыштен.

Яков спортышто кӱкшӧ сеҥымашыш шуын. Тудо ветеран-влак коклаште ече дене куржталмаште Россий первенствын 7 гана сеҥышыже да 14 гана призёржо лийын. 85 ияшыж годым Яков тӱнямбал чемпион лийын. Сар деч вара пединститутын историй факультетыштыже тунемын, школын вуйлатышылан тыршен, вара партий пропагандистлан тыршен. Кеч-могай игечыштат тӱрлӧ яллашке шуко уштышым йолын, ече дене коштын.

95 ияш Яков Заболотских кажне кечын кап-кылым тазаҥдыше зарядкым ышта. Садыште тырша, пареҥгым кӱнча, емыжым кушта, вареньым шолта. Кызыт скандинав коштмаште шке вийжым терга. Тудо ӱмыр корно гыч кораҥаш ок шоно.

Суаптарже-влак

«1941–1945 ийласе Кугу Ачамланде сарыште чолга пашалан» медаль (1946)^[1]
«1941–1945-ше ийлаште Кугу Ачамланде сарыште Сеҥымашлан 80 ий темме лӱмеш» лӱмгече медаль (2025)^[1]

Палемдымаш

↑ ¹ ² Труженику тыла Якову Заболотских вручили медаль к 80-летию Победы

Кылвер-влак

[dzen-1] ¹ ² Труженику тыла Якову Заболотских вручили медаль к 80-летию Победы

[1]