Бирюков, Александр Васильевич
| Александр Васильевич Бирюков | |
|---|---|
 | |
| Шочмо кече | 16 пургыж 1976 (50 ий) |
| Шочмо вер | |
| Гражданстве | |
| Профессий | актёр, директор |
| Суаптар | |
Александр Васильевич Бирюков (шоч. 16 пургыж 1976, Тамшэҥер, Марий Автоном Совет Социализм Республик) — совет да россий актёр, мер пашаеҥ. 2025 ий гыч Республикысе марий тӱвыра рӱдерын директоржо. 2020 ий гыч марий юмыйӱла ушемым вуйлатыше. Марий Эл Республикын сулло артистше (2014).
Илыш корно
1976 ий 16 пургыжышто Марий АССР Шернур вел Тамшэҥер ялеш шочын. Кӱшыл шинчымашым М. С. Щепкин лӱмеш кӱшыл театр училищын актёр факультетыштыже, калыкле труппо кышкарыште налын (Владимир Монаховын курсшо).
1998 ийыште М. Шкетан лӱмеш марий калыкле драме театрыш пашаш налме. 20 ий жапыште 70 утла рольым модын, нунын коклаште — «Ачийжат-авийжат…» (1998, 2008) спектакльыште Йыванын рольжо, «Кеҥеж йӱд»-ыште (2001, 2009) Одокимын, «Тулар ден тулаче»-ште (2017) Чоктаевын, «Окса тул»-ышто (1999) Карасийын да молат[1][2].
2014 ийыште Александр Бирюковлан «Марий Эл Республикын сулло артистше» чаплӱмым пуымо[1].
2018 ийыште Марий кугыжаныш университетын магистратурыжым «Менеджмент» специальность дене тунем пытарен[1].
2018—2025 ийлаште Марий самырык театрын директоржо лийын[1].
2025 ий апрель гыч Республикысе марий тӱвыра рӱдерын вуйлатышыже улеш[3].
Мер паша
2020 ийыште Александр Бирюков Марий Эл Республикысе Марий юмыйӱлан Рӱдӧ ушемжым вуйлаташ тӱҥалын; 2016 ий гыч «Марий кумалтыш» общинын йыжъеҥже лийын[4].
Александр Бирюков Марий Эл Республикысе Мер палатын кудымшо кышкарысе йыжъеҥже улеш (2022—2025)[5].
Ешыже
- Пелашыже: Алина Николаевна Егошина — Марий Эл Республикын сулло артисткыже (2009). М. С. Щепкин лӱмеш кӱшыл театр училищым тунем лектын (1998)[6].
- Кум йочаже уло: Данила (2000 шоч.), Михаил (2016 шоч.), Мария (2017 шоч.).
Палемдымаш
- ↑ 1 2 3 4 Бирюков Александр Васильевич (руш.). Марийский театр юного зрителя. Тергыме кече: 23 идым 2024.
- ↑ Бирюков Александр Васильевич (1976). Сернурская ЦБС. Тергыме кече: 23 идым 2024.
- ↑ Кидшер (2025-08-31), Бирюков Александр Васильевич, <https://kidsher.ru/ru/dossier/51548/>. Тергыме: 1 шыжа 2025.
- ↑ В Марий Эл выбрали нового главу традиционной религии. МариМедиа (8 идым 2020). Тергыме кече: 23 идым 2024.
- ↑ Анна Швецова (14.03.2022), В Марий Эл утвержден новый состав Общественной палаты, <https://www.marpravda.ru/news/zhizn-v-mariy-el/v-mariy-el-utverzhden-novyy-sostav-obshchestvennoy-palaty/>. Тергыме: 23 идым 2024.
- ↑ Заслуженная артистка Республики Марий Эл Алина Егошина: «Когда не знаешь, что делать, – иди в народ», <https://www.marpravda.ru/news/religiya/zasluzhennaya-artistka-respubliki-mariy-el-alina-egoshina-kogda-ne-znaesh-chto-delat-idi-v-narod/>. Тергыме: 10 шыжа 2025.