Аракан калыкле кечыже
Аракан калыкле кечыже (молд. Ziua Naţională a Vinului) — молдаван пайрем, тудо арака да аракам ыштыме пашалан пӧлеклалтын. Йӱла почеш республикыште виноградым погымо деч вара, октябрьын икымше каныш кечынже Кишинёвын рӱдыверыштыже, Куатле калыкле погынын кумдыкыштыжо эрта.
Негызлыше умылымаш-влак
Молдавийыште Аракан калыкле кечыжым 2002 ийыште Республикысе правительствын 1005-XV номеран пунчалжылан келшышын пайремлаш тӱҥалме. Пайремым тыгай шонымаш дене шочыктымо: арака сатум шот дене ыштен лукташ, тудым шуктымо йӱлам пеҥгыдемдаш, элын тӱнямбал сынжым ойырен палемдаш, аракам йӱмӧ шот-радамым (культурым) калыкыш шыҥдараш, турист-влакым кумылаҥдаш.
2003 ий 25 сентябрьыште Молдавий парламент йотэлысе граждан-влаклан льготым пуышо тӧртыкым луктын: оксам тӱлыде, 15 кечым Молдавийыште илаш. Лачак кече-влак Аракан национальный кечыж деч 7 кече ондак да шым кече вара лийшаш улыт.
Пайрем кышкарыште тӱрлӧ аракам шуктен ямдылыме нерген ончер эртаралтеш, тыште Молдавийын компанийже-влак шке йӱыш сатуштым ончыктат. Ончер тӱҥ шотышто таҥасыме радам дене эртаралтеш.
Йотэлсе граждан-влак, пайремыш толаш кумылан улыт гын, нунылан визе яра пуалтеш (тидыже нунылан кӱлеш гын)[1].
2005 ий
2005 ийысе пайремыште театр сынан парад лийын: пӱтынь эл мучко виноградым ончен-куштышо да аракам ыштен лукшо-влак Кишинёвын тӱҥ уремже дене мурен-куштен, кумылым нӧлтен эртеныт. Тыгак фольклор ансамбль-влакын концертышт, калык усталыкым вияҥдыше ярминга, «Zdob şi Zdub» группын выступатлымаш эртеныт.
2006 ий
2006 ийыште Аракан калыкле кечыже 7–8 октябрьыште эртен. 7 октябрьыште пайрем почылтын, аракам ыштен лукшо-влакын пайремле таҥтошкал эртымаш, концерт лийыныт. Тиде кечынак тӱрлӧ конкурышто сеҥыше-влакым саламленыт, аракам тамлымаш (дегустаций) лийын. Ты жапыштак "Аракан корныж дене" экскурсий-влак эртеныт, Молдавийын сылне вер-шӧржым, арака завод-влакым ончыктеныт. 8 октябрьыште аракам ыштен лукшо конкурслаште сеҥыше-влакым посна премийым пуэден чапландареныт, пайремым мучашлыше концерт да фейерверк лийыныт.
2006 ийысе пайремыште 40 тӧнеж шке куатшым ончыктен, нунын коклаште «Крикова», «Малые Милешты», «Золотой аист» да моло комбинат-влак лийыныт.
2017 ий
2017 ийысе Аракан калыкле кечыже[2] Молдовышто октябрь тылзын икымше каныш кечынже эртаралтын. Ты гана пайрем экологий верч мутым кучышо лийын. Сандене пайремын унаже-влакым йырым-йырысе йырвелым пагален ончаш, чапле аракам шоненалтен шот дене тамлаш ӱжыныт.
Палемдымаш
- ↑ Cetăţenii străini pot intra gratuit pe teritoriul Republicii Moldova - NOI.MD - Mai mult decît știri. Тергыме кече: 3 шыжа 2011. Архивировано из оригинала 22 теле 2011 ий.
- ↑ Newsmoldova. Каждый год в Молдове проводится Национальный День Вина. Национальный день вина в 2017 году будет экологически ответственным. » » Newsmoldova.info (рум.). Newsmoldova.info. newsmoldova.info (29 идым 2017). Тергыме кече: 6 шыжа 2017. Архивлыме 6 шыжа 2017 ий.