Царегородцев, Геннадий Иванович

Геннадий Иванович Царегородцев
Шочмо кече	26 теле 1931(1931-12-26) (94 ий)
Шочмо вер	Вершинята, Ӧрша ял шотан илем[d], Советский район, СССР
Шанче алан	философий
Образований	Н. К. Крупская лӱмеш Марий кугыжаныш педагогике институт
Шанче степень	философий шанче доктор (1964)
Шанче званий	профессор (1965)
Награде ден премий-влак

Генна́дий Ива́нович Царегоро́дцев (шоч. 26 теле 1931, Вершинята, Советский район) — совет шанчызе, медицине философий да социологий аланыште туныктышо, философий шанче доктор (1964), профессор (1965). СССР Медицине шанче академийын Н. А. Семашко лӱмеш премийын лауреатше (1974).

Илыш корныжо

1931 ий 26 декабрьыште Марий АССР-ысе Вершинята ялеш шочын.

1946—1951 ийлаште марте Н. К. Крупская лӱмеш Марий кугыжаныш педагогике институтын историй-философий факультетыштыже тунемын. 1951—1954 ийлаште В. И. Ленин лӱмеш Москосо кугыжаныш педагогике институтын аспирантурыштыжо тунемын.

1954—1960 ийлаште Кокымшо Москосо кугыжаныш медицине институтышто ассистент, кугурак туныктышо да доцент лийын, 1958—1960 ийлаште — тиде институтынак философий кафедре вуйлатышын сомылжым шуктен. 1960 ий гыч СССР МША-ште (1991 ий гыч — Российысе медицине шанче академий) шанче-шымлыме пашам шуктен, 1962 ий гыч — тиде академийын философий кафедрыжым вуйлатыше.

Шанче-педагогике да мер-профушем паша

Г. И. Царегородцевын тӱҥ шанче-туныктымо пашаже медицине философий да социал аланысе йодыш-влак дене, йот элласе реакционный тазалык аралыме да медицине теорий-влакым, медицине этикым шылталыме проблеме-шамыч дене кылдалтын. Г. И. Царегородцев совет да российысе медицинын этико-деонтологий да социал-философий йодышлам тӧрлымаште тыршен.

Г. И. Царегородцев — Илыш да тазалык йӧным тунемме шотышто Тӱнямбал медицине ассоциаций (International Medical Association for the Study of Living Conditions and Health, IMASLLCH) совет калыкле комитетын председательже, Пашазе-влакын тазалыкыштым аралыме да социал страхований шотышто комиссийын председательже, ВЦСПС Президиумын йыжыҥъеҥже да Совет социологий ассоциацийын (ССА) «Медицине социологий» секцийын председательже.

1954 ийыште «Категории сущности и явления» теме дене кандидатлык диссертацийым, 1964 ийыште «Диалектический материализм и медицина» теме дене философий шанче доктор шанче чаплӱмым налашлан диссертацийым арален, 1965 ийыште тудлан профессор шанче чаплӱмым пуымо. Г. И. Царегородцевын вуйлатымыж почеш кумшӱдӧ наре шанче паша, монографий возалтын. 1974 ийыште «Общество и здоровье человека» пашажлан Г. И. Царегородцев СССР МША-н Н. А. Семашко лӱмеш премий дене палемдалтын. Г. И. Царегородцев Кугу медицине энциклопедийын «Философские вопросы биологии и медицины» редакций пӧлкан редакторжо лийын.

Библиографий

Тӱҥ важ:

• Диалектический материализм и медицина. — Москва : Медгиз, 1963. — 432 с.
• Диалектический материализм и медицина. — 2-е изд., перераб. и доп. — Москва : Медицина, 1966. — 451 с.
• Здоровье — общественное богатство / Г. И. Царегородцев, проф. — Москва : Знание, 1967. — 32 с. — (Б-чка «Философские проблемы медицины»/ Всесоюз. о-во «Знание» Вып. 2. № 5).
• Наука и религия о здоровье и болезнях человека. — 3-е изд., испр. — Москва: Медицина, 1969. — 67 с.
• Философия медицины : учебник для аспирантов : учебник для студентов старших курсов медицинских и фармацевтических вузов, интернов и ординаторов, слушателей факультетов дополнительного профессионального образования, аспирантов и соискателей научной степени кандидата медицинских и фармацевтических специальностей / Г. И. Царегородцев. — Москва : Изд-во СГУ, 2011. — 440 с. ISBN 978-5-8323-0760-2

Палемдымаш

Литератур

• Большая медицинская энциклопедия / гл. ред. Б. В. Петровский. — 3-е изд. — М.: Советская энциклопедия, 1986. — Т. 27. — 576 с.