Моско кугыжаныш университетын политологий факультетше
| Политологий факультет | |
|---|---|
| М. В. Ломоносов лӱмеш Моско кугыжаныш университет | |
 | |
| Англичанла лӱм | Faculty of Political Science of Moscow State University |
| Ыштыме ий | 2008 |
| Декан | Андрей Юрьевич Шутов |
| Верланымаш | 119992, Моско, Ломоносов проспект, 27 пӧрт, 4корпус, МГУ-н Шуваловский корпусшо |
| Сайт | polit.msu.ru |
Моско́ кугыжа́ныш университе́тын политоло́гий факультетше (руш. Факультет политологии МГУ)[1] — М. В. Ломоносов лӱмеш Моско кугыжаныш университет кышкарысе факультет, «политологий» да «конфликтологий» специальность дене студент-влакым ямдыла, тыгак аспирантур ден докторантур гоч политологий дене кӱшыл шинчымашан шанче-педагогике пашаеҥым ямдылыме пашам вӱда.
Историй
Моско кугыжаныш университетыште политологий факультетым почаш шонымаш 2008 ий кеҥежым шочын. Факультет МГУ-н философий факультетысе политологий кафедре-влак негызеш чоҥалтын, нуно у тӱшкаш чумыргаш пунчалыныт. «Единая Россия» партий факультетын пашаштыже чолган тыршаш шонымыж нерген ойлен. Икмыняр СМИ-н увертарымыж почеш, факультетым виктараш Кугыжаныш Думын спикерже Борис Грызловым палемдыме улмаш[2][3]. Варарак МГУ-н ректоржо Виктор Садовничий ты уверым йоҥылышлан шотлен да тыге ойлен: «Пагалыме Борис Вячеславович вуйлатыме шотышто нимогай кылымат ок кучо. Тудо да моло политик-влак лекцийым лудын кертыт»[4].
Факультетым чоҥымо нерген раш пунчалым Москосо университетын Шанче каҥашыже 2008 ий 29 августышто луктын. Факультетын деканжылан философий факультетын кугыжаныш политике кафедрын ончычсо вуйлытышыже, профессор Андрей Шутовым шогалтыме[5]. Тудын мутшо почеш, факультет, 1755 ийыште политике кафедрым негызлыше М. В. Ломоносовын тӱҥалме, Моско университетыште политике шанчым туныктымо йӱлам шуя[6][7]. Икымше ийыште факультетыш 120 наре студентым погымо[7]. 2008 ий шыжым политологий факультетыште кӱлеш йодыш-влакым тӧрленыт: кафедрын кышкаржым рашемденыт да шинчымашым пуымо программе-влакым чоҥеныт. 2011 ийыште факультетыште политике ончылъеҥ-влакым ямдылыме программе почылтын[8].
2013 ий кеҥежым факультетын икымше выпускшо лийын. Дипломым 92 студент налын[6].
2025 ий 1 сентябрь гыч Российыште икымше гана социал архитектур дене магистр программе-влакым почыныт, тиде МГУ-н политологий факультетыштыжат уло. Тунемме планыш политике стратегий, увер-аналитике полыш, социал архитектурышто моделирований да проектым ямдылымаш, тыгак граждан идентичностьым чоҥымаш шотышто дисциплине-влакым пуртеныт. Магистрант-влак теорийымат, практикымат тунемаш тӱҥалыт, политологий, социологий, коммуникаций да мер проект-влакым виктарыме аланыште шинчымашым налыт. МГУ-со политологий факультетын деканже Андрей Шутовын мутшо почеш, магистратурым тунем лекше-влак моткоч кӱлешан пашаеҥ-влак лийыт, нуно мер илышын, кучемын да бизнесын иктеш ушнымаште пашам ыштен, кӱлешан мер проект-влакым чоҥымаште тыршен да тӱрлӧ социал калык коклаште кылым чоҥен кертыт[9].
М. В. Ломоносов лӱмеш МГУ-со политологий факультетын кышкарже
Кызытсе жапыште МГУ-н политологий факультетыштыже шанче да шинчымашым пуымо паша шым кафедрыште эрта:
- Историй да политике теорий кафедре
- Социал-политике шинчымашын историй кафедрыже
- Российысе политике кафедре
- Политикын социологий да политике кафедрыже
- Таҥастарыме политологий кафедре
- Кугыжаныш политике кафедре
- Калык-влак кокласе интеграций кыл шотышто кафедре
Политологий факультетыште вич лабораторий пашам ышта, нуно студент ден аспирант-влак кокла гыч самырык шымлызе-шамычым фундаментал, прикладной шанче шымлымашым эртараш да шанче-практик ой-каҥашым ямдылаш ӱшаныме механизм семын лийыт.
- Политикым шымлен иктешлымаш да ончыкылык нерген шинчымашым математике йӧн дене шотлен лукмаш лабораторий
- Коммуникаций системын да увер технологийын лабораторийже
- Политикым прикладной йӧн дене шымлыше лабораторий
- Политике-правам шымлыше лабораторий
- Историй-политике тӱвыр лабораторий
Факультетыште аспирантур ден докторантур, ешартыш шинчымашым пуышо, калык-влак кокласе кыл пӧлка-влак пашам ыштат.
Палемдымаш
- ↑ Факультет политологии МГУ. Тергыме кече: 1 шыжа 2025. Архивлыме 15 вӱдшор 2015 ий.
- ↑ Юлия Таратута. В МГУ появится факультет, близкий к партии власти. Коммерсантъ (4 сорла 2008). Тергыме кече: 1 шыжа 2025. Архивлыме 4 ӱярня 2016 ий.
- ↑ "Яблоко" против участия единороссов в работе школы политологии МГУ. РИА Новости (6 сорла 2008). Тергыме кече: 1 шыжа 2025.
- ↑ Ректор Садовничий: Грызлов не будет иметь никакого отношения к руководству школы политологии МГУ. web.archive.org. Тергыме кече: 1 шыжа 2025.
- ↑ Юлия Таратута. "Единая Россия" вступила в МГУ. Коммерсантъ (30 сорла 2008). Тергыме кече: 1 шыжа 2025. Архивлыме 4 ӱярня 2016 ий.
- ↑ 1 2 Валентина Матвиенко: «Современной России нужен взвешенный взгляд на политическую науку». Парламентская газета (1 сӱрем 2013). Тергыме кече: 1 шыжа 2025.
- ↑ 1 2 Марина Муравьёва. Андрей Шутов: «На факультете политологии МГУ выступают за политический плюрализм». strf.ru (3 идым 2008). Тергыме кече: 1 шыжа 2025. Архивировано из оригинала 24 идым 2015 ий.
- ↑ В МГУ будут учить на премьеров и президентов. Коммерсантъ (27 пеледыш 2011). Тергыме кече: 1 шыжа 2025. Архивлыме 4 ӱярня 2016 ий.
- ↑ В России впервые стартовали магистерские программы по социальной архитектуре, 2025-09-01, <https://vz.ru/news/2025/9/1/1356826.html>. Тергыме: 5 идым 2025.