Якаева, Ирина Геннадьевна
| Ирина Геннадьевна Якаева | |
|---|---|
| Ирина Якаева, Ирсан | |
 | |
| Шочмо кече | 1983 ий 1 пургыж (43 ий) |
| Шочмо вер | РСФСР, Марий АССР, Шернур кундем, Шернур ола сынан посёлко |
| Гражданлык |
 СССР Россий |
| Паша сомыл | радиовӱдышӧ, мурызо |
| Пелаш | Андрей |
| Икшыве-влак | Анна |
| Награде да премий |
|
Ирина Геннадьевна Якаева (шоч. 1 пургыж 1983, Шернур, Марий Автоном Совет Социализм Республик) — российысе марий мурызо, радиовӱдышӧ, тӱвыра пашаеҥ. 2025 ий апрель тылзе гыч — Тимофей Евсеев лӱмеш Марий Эл Республикысе калыкле тоштер директорын сомылжым жаплан шуктышо.
Илыш корныжо
1983 ий 1 февральыште Марий АССР Шернур вел Шернур посёлкышто шочын[1].
2005 ийыште Марий кугыжаныш университетым «журналистике» специальность дене тунем пытарен, 2014 ийыште юриспруденций дене кокымшо кӱшыл шинчымашым налын.
Паша корныжым «Пульс-Радио» ЗАО-н корреспондентшылан пашам ыштыме дене тӱҥалын (2005—2008), Марий Эл Радио тунам тиде организацийын пӧлкаже лийын. Иринан шарнымыж почеш:
Дипломым кидыш налмеке, Марий Эл Радиош логалынам. Радион икымше кечылаж гычак тыште пашам ыштем. Каласем: паша йӧратыме, вес вере шкемым омат шиж, омат уж, вес профессий дене пашажым ыштенат ом керт, очыни. Илышем радио дене кылдем манын шонен омыл. Журналистике пӧлкаш тунемаш пуренам гын, чынжымак, журналист лиям манын ӱшаненам, но кушто ышташ тӱҥалам манын, эше пален омыл. Университетым тунем пытарыме жап радиом почмо дене келшен толын, тугеже тышке толмем пӱрымаш.
Радио шуко оҥай, творческий шӱлышан еҥ-влакым ушен. Ончыч нелырак лийын гынат, пырля келшен, кыртмен, ик шонымаш дене тыршыме пайдам конден:
"Тӱҥалтыште ятыр нелылыкым чытен лекташ логалын. Тӱрлӧ техникым тунемме, программе-влакым шке гыч погымо, шонымо. Тӱрлӧ джинглым, заставке-влакым ямдылаш кӱлын, сандене куд шагат эр гыч пелйӱд марте паша верыште чыланат шинченна. Айлыме кумдыкнажат изирак лийын, ешланат жапым шагалрак ойырымо, туге гынат, нимом ончыде, йӧратен, тиде пашам шуктенна.
2010 ий гыч 2017 ий марте «Марий Эл Радио» автоном тӧнежыште тӱрлӧ олмым айлен: рекламе да коммерций проект-влак дене менеджер, эфирым вӱдышӧ, коммерций йодыш дене директорын алмаштышыже.
2018 ий гыч 2020 ий марте Марий Эл Республикын Тимофей Евсеев лӱмеш калыкле тоштерыштыже экскурсоводлан, туризм пӧлкам вуйлатышылан тыршен.
2020 ий гыч 2022 ий марте «РОСИЗО» кугыжаныш тоштер-ончер рӱдерын мер кыл шотышто службын пашаеҥже лийын.
2022—2024 ийлаште Марий Эл Республикын Тимофей Евсеев лӱмеш калыкле тоштерын редакций-савыктыш, маркетинг да ужалымаш пӧлка-влакын вуйлатышыже лийын.
2024—2025 ийлаште Республикысе марий тӱвыра рӱдерын директоржылан пашам ыштен.
2025 ий 1 апрельыште Марий Эл Республикын Тимофей Евсеев лӱмеш калыкле тоштер директорын сомылжым жаплан шуктышылан шогалтыме[1].
Сымыктыш паша
Марла эстраде муро-влакым да такмак-влакым мура. Тыгак Ирсан псевдоним дене палыме[2][3][4].
Еш
- Марийже — Якаев Андрей Петрович;
- Ӱдыржӧ — Якаева Анна Адреевна (2004).
Суаптар
- Марий Эл Республикын О. Ипай лӱмеш кугыжаныш премийжын лауреатше (2006);
- Марий Эл Республикын Тӱвыра, савыктыш да калык-влакын пашашт шотышто министерствын Чаптаныкше (2010);
- Марий Эл Республик Виктерын Чаптаныкше (2015).
Муро-влак
- Ончем шӱдырат огыл
- Куэрем весела, куку мура
- Тыленат кӧра
- Олма кӱэш кӱрлын возеш
- Мотор танем
- Ӱчым ыштен пашмам нальыч
- Мыйым тый шупшалат
- Шочынам тылат
- Пиал йӱдем
- Шошо шӱмыштем
- Шӱшпык муро
- Ом шоно
- Ош куэ
- Пиал дек кайыме корно
- Молан тыге лийшаш
- Суксо йӧратымаш
- Йӧраталын огыт сыре
- Бикини
- Вучем
- Олмапу
- Йӧратем у ий пайремым
Палемдымаш
- ↑ 1 2 Кидшер (2025-03-31), Якаева Ирина Геннадьевна, <https://kidsher.ru/ru/dossier/50662/>. Тергыме: 16 идым 2025.
- ↑ Ирина Якаева (неопр.). Яндекс Музыка. Тергыме кече: 6 шыжа 2025.
- ↑ Ирина Якаева on Apple Music (англ.). Apple Music - Web Player. Тергыме кече: 6 шыжа 2025.
- ↑ Ирина Якаева – слушать онлайн в хорошем качестве на МТС Музыке. МТС Музыка. Тергыме кече: 6 шыжа 2025.
 |
|---|
