Блогерын тӱнямбал кечыже
| Блогерын тӱнямбал кечыже | |
|---|---|
 | |
| Тӱрлылык | Профессионал |
| Официал | International Weblogger’s Day |
| Ышталтын | 2004 |
| Палемдат | ий еда |
| Кече | 14 июнь |
| Кылдалтын | блоггинг |
Блогерын тӱнямбал кечыже (англ. International Weblogger’s Day, тыгак InWeDay семын палыме) — ий еда 14 июньышто палемдыме пайрем. Кече пӱтынь тӱнясе интернет автор-влаклан пӧлеклалтын, нуным иктеш ушаш, блоггингым шке шонымым луктын каласыме да ойым вашталтыме йӧн семын вияҥден колташ ман ыштыме.
Профессий нерген
Блогер — тиде айдеме, кудо блогым вӱда, эреак шке возымыжым савыкта, шке шонкалымыжым, моштымыжым да шинчымашыжым аудиторийлан ончыкта. Блогым вӱдымаш хобби семынат, профессият лийын кертеш.
Профессионал блогер-влак шке блогыштышт тӱрлӧ йӧн дене оксам ыштен кертыт:
- Рекламе: рекламе баннерым ден контекст рекламе-влакым блогеш вераҥдымаш.
- Партнёр программе-влак: моло компаний-влакын сатуштым да суаплыкыштым шарымылан пашадар.
- Спонсорство: спонсор пост-влакым савыктымылан компаний деч полышым налмаш.
- Шке сатум да суаплыкым ужалымаш: книга, курс, консультаций да блогерын ыштыме моло сату. Профессионал блогер-влак чӱчкыдынак текстым возаш уста улыт, илышкыл сетьысе маркетингым да вӱдымӧ йӧным сайын палат.
Нуно контентым ыштат, тудыжо аудиторийым ушен да кучен шога, блогыш пурышо еҥ-влак статистикым иктешла да кугу сеҥымашыш шушашлан шке моштымыштым саемдышаш верч пашам ыштат[1].
Историй
Богерын тӱнямбал кечыжым ыштыме нерген шонымашым блогер-влак 2004 ийыште шочыктеныт, тыге нуно блогингыште тыршыше-влакым чылаштым иктеш ушаш шоненыт. Тӱҥалтыште ты шонымашым 40 утла элла гыч 500 наре блогер авалтен, 2004 ий 14 июньышто Блогерын икымше тӱнямбал кечыже эртаралтын[2]. 2007 ийыште тиде шонымашым моло блог оза-влакат авалтеныт, нуно шке лаштыклаштышт коллегышт дене келшыме нерген уверым савыктеныт[3].
Тиде пайремын тӱҥ шонымашыже — блогер-влаклан ик кечым ышташ, кунам нуно шке сеҥымашышт дене пайлалт кертыт, улшо йодыш-влакым каҥашат, да тыглаяк глобальный манме интернет-автор-влак тӱшкаште улмыштым палемдат. Тыгак тудын шонымашыже — интернетым да медиам вияҥдымаште блогер-влакын надырыштым шотыш налмаш, у авторым куштымо да нунын моштымыштым вияҥдымаш, блогерын ончыктымо кӱлешан темылан тӱткышым ойырымаш.
Пайремын икымше ийыштыжак нуно шке онлайн-дневникыштышт лӱмын ыштыме пост-влакым савыктеныт, а южо олалаште офлайн-вашлиймаш-влак эртеныт, кушто блогер-влак палыме лийын, шке проектыштым каҥашен кертыныт[4].
2000 ийла кыдалне Блогерын тӱнямбал кечыже блогосферыште ыҥан событий лийын. Тиде кечын блогер-влак пӱтынь тӱня мучко лӱмын ыштыме пост-влакым савыктеныт, шке шонымашышт да сеҥымашышт дене палдареныт, тыгак онлайн, да офлайн йӧн дене чумырымо вашлиймашлаште лийыныт.
Илыш-йӱла
Тиде кечын блогер-влак вашполышым пуымо шомакым возат, йӧратыме канал да ресурс дене палдарат, тыгак колыштшо, лудшо, ончышо-влак дене мутланат. Южо элыште пайрем лӱмеш офлайныште блогер-влакын вашлиймашышт эрта, туштыжо блогер контентым ыштыше коллеге-влак дене палыме лийын кертеш. Российыште тиде кечын блогер-влакын «чонан» вашлиймашышт эрта.
Блогерын тӱнямбал кечыж дене пырля тӱняште Блогын кечыжат уло (англ. Blog Day). Тудо 31 августышто пайремла[5].
Блогерын тӱнямбал кечыжым интернет-контентым ыштыше кеч-могай еҥ палемден кертеш, тиде тудын возымыжым лудшо еҥ чот деч, мом возымыж деч ок шого[6].
Тыгак ончо
Палемдымаш
- ↑ Международный день блогера. ast.ru (14 пеледыш 2023). Дата обращения: 29 ага 2024.
- ↑ «Международный день блогера» час общения. ФКУ «Цифровая культура» (14 пеледыш 2024). Дата обращения: 29 ага 2024.
- ↑ Международный день блогера. «Тюменская областная научная библиотека имени Дмитрия Ивановича Менделеева». Дата обращения: 29 ага 2024.
- ↑ Wayback Wednesday: International Webloggers Day 2004. Cosmic Observation. Дата обращения: 29 ага 2024.
- ↑ 14 июня отмечается Международный день блогера. Информационный портал «РЕВИЗОР.РУ» (14 пеледыш 2022). Дата обращения: 29 ага 2024.
- ↑ Международный день блогера в 2023 году — история и особенности праздника. «МИЦ «Известия» (13 пеледыш 2023). Дата обращения: 29 ага 2024.