Касвел фронтышто вашталтыш деч посна (фильм, 2022)

РУВИКИ — эрыкан энциклопедий гыч материал
Тергыме статья
Касвел фронтышто вашталтыш деч посна
нем. Im Westen nichts Neues
Постер фильма
Жанр сарзе фильм
Режиссёр Эдвард Бергер
Продюсер
Негызеш «Касвел фронтышто вашталтыш деч посна» роман (1929)
Сценарийын
автор-влакше
  • Лесли Паттерсон
  • Иан Стокелл
Тӱҥ
рольышто
  • Даниэль Брюль
  • Альбрехт Шух
  • Себастьян Хюльк
  • Феликс Каммерер
  • Арон Хильмер
  • Эдин Хасанович
  • Девид Штризов
Оператор
Монтажёр Свен Будельман[d]
Композитор Фолькер Бертельманн
Художник-постановщик Кристиан М. Гольдбек[d]
Дистрибьютор Netflix
Кужыт 147 мин[1]
Бюджет 20 млн США доллар [2]
Эл  Германий
Йылме-влак немыч йылме да француз йылме
Ий 2022
IMDb ID 1016150
Официал сайт
Тӱжвал видеофайл-влак
Logo YouTube por Hernando (2005-2011).svg Официальный трейлер

«Касвел фронтышто вашталтыш деч посна» (нем. Im Westen nichts Neues) — Э. М. Ремаркын тыгаяк лӱман романже почеш режиссёр Эдвард Бергерын войзымо немыч фильм.

Тиде фильм «Оскарым» пуэдыме церемонийыште Германийын эн сеҥышан фильмжылан шотлалтеш. 2023 ийыште «Касвел фронтышто вашталтыш деч посна» индеш номинацийыш пурталтын, тидын шотыштак «Эн сай фильмыш» (ты номинацийыште тиде икымше немыч фильм). Пытартышлан сарзе драме ныл премий дене палемдалтын. Тиде иканаште ныл «Оскар» премийым налше англичан огыл йылман ныл фильм гыч иктыже[3].

Сюжет

Икымше тӱнямбал сар. Немыч пропаганде да шке туныктышышт Канторекын ойлымыжо дене кумылаҥын, 17 ияш Пауль да тудын ик классыште тунемше йолташыже-влак Альберт, Франц да Людвиг ача-ава деч разрешенийым да метрикым ондален ыштат да фронтыш колтат.

Сарзе чынлык нуно шшонымышт гай огыл улмаш. У формо олмеш рвезе-влаклан колышо салтак-влак гыч кудаш налмым, чиен коштмым пуэдат. У салтак-влакын шинча ончылныштак лу дене еҥ кола. Ончыл верыш логалмек, икымше йӱдымак Пауль дене ик классыште тунемше Людвиг Бём кола. Касвел фронтышто, Ла-Мальмезонышто, теҥгечысе тунемше-влак кече еда шӱдӧ дене колымаш дене шинчаваш тӱкнат.

Икана полк кудло у салтак гыч шогышо ешартыш вий толмым вучен, но кӱлеш жаплан нуно толын огытыл. Пауль ден тудын йолташыже-влак Катын — Станислав Катчинскийын — вуйлатымыже почеш кычалаш каят. Кудалтен кодымо складым эртышыжла Пауль тудын ик кыдежыштыже самырык рвезе-влакым ужеш — нуно чыланат газ дене аярталтыныт.

А тиде жапыште, фронт линий шеҥгелне, армийын кушкын толшо йомдарымашыже дене нойышо да сарыште эргыжым йомдарыше немыч статс-секретарь Матиас Эрцбергер, союзник-влак дене тынысым ыштыме нерген мутланаш тӱҥалаш кӧндараш манын, Германийын кӱшыл командованийже дене вашлиеш. Фридрихс шкеже вашмутланымашлан тореш, вет тудлан сар — шкенжым ончыкташ да наградым наледаш йӧн. Подчинённый-шамыч дене мутланымаште тудо тыге шонкала: тудо вараш кодын тӱняшке шочын, вет Икымше тӱнямбалысе марте пел курым наре саржат лийын огыл, а сарзыеҥ кредалмаш деч посна илен ок керт. Фридрихс француз полыш толмешке атакыш каяш приказым пуа. Тиде йӱдым Эрцбергерын делегацийже Компьен чодыраш толеш, А Паульын полкшо француз-влаклан атакыштлан ямдылалташ фронтыш кая.

Вашмутланымаш годым Матиас Эрцбергер тулым чараш йодеш. Фердинанд Фош немыч-влаклан 72 шагатым шонкалашышт пуа. Тиде жапыште француз-влакын келшыкыштым каҥашыме деч посна налман, але сар умбакыже шуйна. Эрбергер изиш варарак кайзер Вильгельм II-ын престол гыч кораҥмыже нерген пален налеш, а вара фельдмаршал Пауль фон Гинденбург деч француз-влакын келшыкышт дене кӧнаш приказым налеш.

Тиде жапыште фронтышто немыч-шамыч кидаваш кредалмаште француз-влакын аралтыш линийыштым руалтен налыныт. Тушман, неле техникым кучылтын, кредалаш тӧча. Немыч-шамычлан чакнаш перна. Альберт йыр авырымашке логалеш. Тудо чаманаш йодеш да пленыш вончаш тӧча, но тушман-шамыч тудым йӱлатат. Альберт Паульын шинча ончылныжак кола, а тудыжо шке йолташыжлан нимо денат полшен ок керт. Кредалмаш умбакыже шуйна. Пуля деч утлаш тӧчен, Пауль воронкаш тӧршта да колышо гай коеш. Икмыняр жап гыч тиде воронкашкак француз салтак логалеш. Тудо шижынат ок шукто, кунам Боймер тудын деке куржын мия да кӱзӧ дене колышаш марте сусырта. Пауль колаш тӱҥалше салтакым ужынат, колынат ок керт. Тудым шыпланаш йодеш. А вара тудын деке мия, вӱдым пуа да сусыр вержым пидаш тӧча. Француз кола. Пауль тудын кӱсенже гыч ватыжын да ӱдыржын фотографийыштым луктеш. Немыч шинчавӱдшым кучен ок сеҥе, тудо шкенжым карга да пуштмо Жерар Дюваль деч титакшым кудалташ йодеш.

Шке частьышкыже пӧртылмекше, Пауль сусыргышо Тьяденым ужеш. Воктенже пырля служышо-влак сарын вашке пытышашыжым пайремлат. Нуно повар деч ешартыш шӱрым йодыт, но тудыжо ынеж пу: тудым 150 салтаклан ямдылен, а илыше кодшо 80-лан огыл. Пауль ден Кат Тьяденлан кочкышым кондат. Тудыжо, чот сусыргымыжлан кӧра кумыл волен, вилке дене вӱргорныжым шӱта да кола.

Вес эрдене Эрбергерын делегацийже тыныслыклан кидпалым пышта, тыныслыкше 11 шагат эрдене вийыш пурышаш. Фронтышто тидын нерген эше огыт пале. Но Кат колыштеш да иктешлымашым ышта: «Тыгай тымык. Соҥгыра улмемла чучеш. Нуно кидпалым пыштеныт, Пауль. Сар пытен. Пытен!». Пиалан Пауль ден Кат фермыш комбым шолышташ каят. Корнышто нуно сар деч вара мо лиеш манын шонкалат. Пауль ончыкылык ончылно тудлан шучкын чучеш манын чонжым почеш. Фермер эрге Паульым комбым шолыштмыжо годым ужеш. Немыч кочкыш дене пырля куржын утлен кертеш. Но нунын частьыш пӧртылшаш лишан рвезе нуным поктен шуэш. Тудо Катым мӱшкырышкыжӧ сусырта. Пауль йолташыжым шке ӱмбалныже шупшеш. Санастьыш шумеке, медик Кат колен манын ойла: «Арам толашенат. Тудо колышо. Вӱр шеме, мокшышкак логалын. Пиалже уке, эн мучаште вет!».

Фридрих сарым Германийын сеҥымашыже дене пытарынеже да 10:45-лан атакыш каяш кӱшта. Немыч-шамыч сеҥымашым палемдыше француз-шамыч ӱмбак штык дене куржыт. Ӧрткышӧ Пауль шуко француз салтакым пуштеш, но штык дене шкежат 11:00 икмыняр секунд шумо деч ончыч тупышкыжо колышашын сусырга. Колымыж годым тудо приказым колеш: «Тулым чарнаш! 11 шагат эр шуын! Лӱйкалаш огыл!». Кредалмаште Паульын утарыме, колышо-влакын медальоныштым погышо немыч у салтак Паульын лавыра дене леведалтше колышо капшым муэш.

Рольышто

  • Феликс Каммерер — Пауль Боймер
  • Даниэль Брюль — Маттиас Эрцбергер
  • Аарон Хильмер — Альберт Кропп
  • Альбрехт Шух — Станислаус Катчинский «Кат»
  • Эдин Хасанович — Тьяден
  • Девид Штрисов — генерал Фридрихс
  • Себастьян Хюльк — майор фон Бриксдорф

Производство

Netflix-ын йодмашыже почеш Studio Amusement Park студийыште немыч йылме дене войзымо фильм Эрих Мария Ремаркын «Касвел фронтышто вашталтыш деч посна» романешыже негызлалтын[4][5]. Сарым «предатель» семын да йӧршеш геройлын огыл ончыктымыжлан верч книгам нацист-влак 1933 ийыште чареныт да йӱлатеныт[6]. Тиде татлан немыч писатель Швейцарийыш эмиграцийыш каен шуктен[7].

Фильмын режиссёржо — Эдвард Бергер. Лесли Патерсон да Ян Стокелл дене пырля тудо сӱретлан сценарий денат пашам ыштен. 1930 ий да 1979 ий годсо фильм-влак деч вара тиде романын кумшо экранизацийже. Бергерлан немыч шонымашым шотыш налаш кӱлешан лийын: Сар деке мемнан шинчаончалтышна ойго да намыс дене, пустаҥмаш да титакым шижмаш дене палемдалтеш. Сайже нимат кодын огыл, ик чӱчалтыш геройлыкат. Мемнан историйнам, мемнан эртыше жапнам да сар велке мемнан ончымынам фильмын вӱден кайыше вийжым ышташ мылам кугу проблеме лийын»[8].

Съёмко 2021 ий 9 март гыч 24 май марте 52 кече жапыште эртен. Сцене-влакын кугу ужашыштым Чехийыште войзымо[9][10], тушто кумда траншеян да казарме-шамычан кугу съёмко площадке-шамычым ыштыме[11]. Прагыште съёмко Barrandov Studios студийыште, олан тӱрлӧ ужашлаштыже, тыгак тудын воктене эртен. Фильмын бюджетше США-н 20 миллион долларжым шоген[12][13].

Премьер

Фильмын икымше трейлерже 2022 ий сентябрь тӱҥалтыште ончыкталтын[14]. 2022 ий 12 сентябрьыште фильмым Торонтошто Тӱнямбал кинофестивалыште ончыктымо[12]. Европышто Бергерын режиссёр пашаже икымше гана 2022 ий сентябрь мучаште Цюрихысе кинофестивалыште гала-премьер семын ончыкталтын[15]. Немыч премьер 2022 ий 27 сентябрьыште Berlin Kino International-ыште лийын[16]. Моло ончышо-влак сӱретым немыч кинотеатрлаште 2022 ий октябрь гыч тӱҥалын ончен кертыныт[17].

Фильмын тӱнямбал премьерже[18] 2022 ий [[28 шыжа|28 октябрьыштеъъ Netflix платформышто лийын[17].

Теме ден амал

Роман деч ойыртем

Эрих Мария Ремаркын «Касвел фронтышто вашталтыш деч посна» романыштыже улшо историй тудын шке опытешыже негызлалтын, но чыла персонаж-влак шонен лукмо улыт[19]. Персонаж-влакым сӱретлыме южо проблеме Ремаркынак тымаорте лийын. Тудын персонажше-влак утларакше «тип» гай койыт, нунын ваш-ваш вашталтмышт сарын дегуманизацийлыме механизмыжым почеш. Полын отпуск жапыште шке ешыжым ужаш толмо главам кудалтен коден, фильм тиде тенденцийым вияҥда. Сарзе кучем дене вашлиймашат фильмыште моткоч шагал ончыкталтын[20].

Да мӧҥгешла, фильмыш чын персонаж-влакын окоп деч ӧрдыжысӧ сценыштым ешарыме, мутлан, Маттиас Эрцбергерын тыныслык переговоржо гайым. Тыгай пунчал-влак теве кушко конденыт: фильмыште историйлык событий-влакым ушештарымаш утыждене шуко, ойла Оливер Камензинд. Книгаште укеан ужаш-влак эсогыл историй шотыштат чын дене келшыдыме улыт[21].

Фионнула Халлиган палемден: роман гыч еш вашлиймашым переговорын пайдаже верч луктын кудалтымаш кужу фильмыш могай-гынат интригым ешараш полшен, да Бергер сар нерген чыла фильмынат тӱҥалтыш шонымашыжым эн тыглайын да умылаш лийшын пуа. Конфликт-влак нигунамат пытен огытыл, да сар нерген фильм-влакын рольышт эре айдемын «тушманым» пытараш тыршымыжым ончыктымаште лийын[22].

Сар нерген ойлымаш

Фильм тӱҥалтыште ончыктымо пуштмо салтак, кӧн формыжым фронт линий шеҥгеке тудым вес салтак чиен кертше манын колтымо, сар циклым Пауль Боймерын колымыжо семынак иллюстрироватлыше элемент лийын. Фильмыште пиалан мучаш уке, палемда Сара Миллерым, чынже дене мучаш йӧршеш уке, молан манаш гын, ик салтак кола гын, тудын вержым, циклым шуяш манын, эре весе айлен налеш. Тыныслыкым ыштымаш кредалмашым мучашла ыле, но, кузе Бергерын фильмыштыже палемдалтеш, условий, властьым нацист партийлан руалтен налаш да варажым Кокымшо тӱнямбал сарым тӱҥалаш амалым пуэн, Германийын политике шотышто пеҥгыде огыл улмыжлан йӧным ямдыла ыле. Вес тукымласе салтак-влак угыч да угыч шоя идеологий да калыкле кугешнымаш дене коррумпироватлалтше системыш логалыт, воза Милнер[23].

Умылымаш

Rotten Tomatoes агрегатор-сайтыште фильмын критик-влакын 141 рецензийышт негызеш 10 гыч кокла шот дене 8,3 балл дене 91 % рейтингше уло. «Критик-влакын консенсусыштышт» тыге возымо: «Ик жапыштак пеш кӱлешан да шоҥгемдыме „Касвел фронтышто вашталтыш деч посна“ тӱткышым сарын шотдымылыкышкыжо фокусироватлен, классике сынан тӱҥалтыш материалын вийжым арален кода»[24].

Metacritic агрегатор-сайтыште фильмын рейтингше критик-влакын 28 рецензийышт негызеш 100 лийын кертше балл гыч 75 лийын, тидыже «тӱрыс ончалмаште сай ой-савыш улыт» манмым ончыкта.

Награде ден номинаций-влак

Шӧртньӧ глобус
Награде ден номинаций списке
Кинопремий Церемонийын кечыже Категорий Номинант(влак) Результат Источник
2023 Йот йылме дене эн сай фильм Касвел фронтышто вашталтыш деч посна Номинация [25]
BAFTA 2023 Эн сай фильм Касвел фронтышто вашталтыш деч посна Кышкар:Сеҥымаш [26]
Англичан йылман огыл эн сай фильм Касвел фронтышто вашталтыш деч посна Кышкар:Сеҥымаш
Эн сай режиссёр паша Эдвард Бергер Кышкар:Сеҥымаш
Кокымшо планан эн сай пӧръеҥ роль Альбрехт Шух Номинация
Келыштарыме эн сай сценарий Эдвард Бергер, Лесли Паттерсон и Иан Стокелл Кышкар:Сеҥымаш
Фильмлан эн сай сем Фолькер Бертельман Кышкар:Сеҥымаш
Эн сай оператор паша Джеймс Фрэнд Кышкар:Сеҥымаш
Эн сай визуал ӧрыктарыш-влак Маркус Франк, Камиль Джафар, Виктор Мюллер и Франк Петцольд Номинация
Эн сай грим ден причёско Хайке Меркер Номинация
Шындыше сӱретчын эн сай пашаже Кристиан М. Гольдбек и Эрнестин Хиппер Номинация
Костюмын эн сай дизайнже Лизи Кристль Номинация
Эн сай монтаж Свен Будельман Номинация
Эн сай йӱк Ларс Гинзель, Франк Крузе, Виктор Прашил и Маркус Штемлер Кышкар:Сеҥымаш
Эн сай кастинг Симона Бер Номинация
Оскар 2023 Эн сай фильм Касвел фронтышто вашталтыш деч посн Номинация [27]
Келыштарыме эн сай сценарий Эдвард Бергер Номинация
Йотэлысе эн сай художественный фильм Эдвард Бергер Кышкар:Сеҥымаш
Фильмлан эн сай сем Фолькер Бертельман Кышкар:Сеҥымаш
Эн сай оператор паша Джеймс Френд Кышкар:Сеҥымаш
Сӱретчын эн сай пашаже Кристиан М. Гольдбек, Эрнестин Хиппер Кышкар:Сеҥымаш
Эн сай йӱк Виктор Прашил, Франк Крузе, Маркус Стемлер, Ларс Гинцель и Стефан Корте Номинация
Эн сай визуал ӧрыктарыш-влак Франк Петцольд, Виктор Мюллер, Маркус Франк и Камиль Джафар Номинация
Эн сай грим ден причёско Хайке Меркер и Линда Айзенхамерова Номинация

Палемдымаш

  1. ↑ All Quiet on the Western Front (англ.). Toronto International Film Festival.
  2. ↑ No one noticed All Quiet on the Western Front. Now it’s Netflix’s best ever shot at the Oscars (англ.). The Independent (12 ӱярня 2023).
  3. ↑ Текст содержит перевод из немецкого раздела Википедии
  4. ↑ Manori Ravindran. Netflix Snaps Up Big-Budget 'All Quiet on the Western Front' Adaptation (англ.) // Variety. — 2020. — 10 December.
  5. ↑ Tigran Asatryan. Daniel Bruhl 'All Quiet on the Western Front' Netflix Movie: What We Know So Far (англ.) // What's on Netflix. — 2022. — 7 September.
  6. ↑ Scott Roxborough. TIFF: Edward Berger on Why It Was Important to Make a German-Language Version of ‘All Quiet on the Western Front’ (англ.) // The Hollywood Reporter. — 2022. — 10 September.
  7. ↑ Aygül Cizmecioglu. Erich Maria Remarque: The long legacy of 'All Quiet on the Western Front' (англ.) // Deutsche Welle. — 2022. — 24 September.
  8. ↑ Barbara Schuster. „Im Westen nichts Neues“ erhält vierwöchiges Kinofenster (нем.) // Blickpunkt:Film. — 2022. — 23 August.
  9. ↑ Reiner Bajo. Im Westen nichts Neues: Dreharbeiten für deutschen Netflix Film unter Regie von Edward Berger haben begonnen (нем.) // Netflix. — 2021. — 4 May.
  10. ↑ Andreas Wiseman. Netflix’s ‘All Quiet On The Western Front’ Underway In Czech Republic, First Look (англ.) // Deadline Hollywood. — 2021. — 4 May.
  11. ↑ Michael Meyns. Im Westen nichts Neues (нем.) // Programmkino.de. — 2022.
  12. ↑ 1 2 Netflix's 'All Quiet On The Western Front' Shoot Underway in Prague, New Cast Members Join (англ.). Variety (4 ага 2021). Архивлыме 4 ага 2021 ий.
  13. ↑ Die erste Verfilmung störte Goebbels mit Stinkbomben und weißen Mäusen (нем.). Die Welt (25 сорла 2022). Архивлыме 2 пургыж 2023 ий.
  14. ↑ Scott Roxborough. Daniel Bruhl in First Trailer for Netflix’s Anti-War Film 'All Quiet on the Western Front' (англ.) // The Hollywood Reporter. — 2022. — 6 September.
  15. ↑ Das ZFF kündigt erste Gala Premieren an (нем.) // Zurich Film Festival. — 2022. — 11 August.
  16. ↑ Jochen Müller. „Im Westen nichts Neues“ feiert Deutschlandpremiere // Blickpunkt:Film. — 2022. — 28 идым.
  17. ↑ 1 2 'All Quiet on the Western Front' Gets Theatrical and Netflix Release Dates (англ.). Collider (30 сорла 2022).
  18. ↑ 'All Quiet on the Western Front': Shooting for German Netflix Film Directed by Edward Berger Has Begun (англ.). Netflix. Архивлыме 4 ага 2021 ий.
  19. ↑ Björn Becher. Im Westen nichts Neues (нем.) // Filmstarts.
  20. ↑ Philipp Bühler. Im Westen nichts Neues (нем.) // kinofenster.de. — 2022. — 28 September.
  21. ↑ Oliver Camenzind. Im Westen nichts Neues: Anti- oder einfach nur Kriegsfilm? (нем.) // Filmbulletin. — 2022. — 17 October.
  22. ↑ Fionnuala Halligan. 'All Quiet On The Western Front': Toronto Review (англ.) // Screen Daily. — 2022. — 13 September.
  23. ↑ Sarah Milner. All Quiet On The Western Front Review: A Bleak, Beautiful, Anti-War Film (англ.) // /Film. — 2022. — 13 September.
  24. ↑ All Quiet on the Western Front (англ.). 25 Rotten Tomatoes (2022).
  25. ↑ Winners & Nominees 2023 (англ.). Golden Globes. Тергыме кече: 26 шорыкйол 2023.
  26. ↑ 2023 EE BAFTA Film Awards: The Winners (англ.). www.bafta.org (19 шорыкйол 2023). Тергыме кече: 19 пургыж 2023.
  27. ↑ 2023 | Oscars.org | Academy of Motion Picture Arts and Sciences (англ.). www.oscars.org. Тергыме кече: 26 шорыкйол 2023.

Кылвер-влак


"https://mhr.ruwiki.ru/w/index.php?title=Касвел_фронтышто_вашталтыш_деч_посна_(фильм,_2022)&oldid=1162144" гыч налме