Йорга Каче
| Йорга Каче | |
|---|---|
| Павел Леонидович Филиппов | |
 | |
| Шочмо кече | 1990 ий 24 вӱдшор (36 ий) |
| Шочмо вер | Марий АССР, Марий Турек район, Кугу Карлыган ял |
| Гражданлык |
 СССР Россий |
| Подданстве | Россий |
| Паша сомыл | мурызо |
| Пелаш | Майя |
| Икшыве-влак | Даниил, Эмма |
Йорга Каче (Павел Леонидович Филиппов) (шоч. 24 вӱдшор 1990, Кугу Карлыган, Марий Автоном Совет Социализм Республик) — марий мурызо. Павел изиж годсек музыклан шӱман кушкын. Мураш-кушташ кумылан улмыжым шекланен, рвезым верысе «Ӟардон» удмурт фольклор ансамбльыш налыныт[1]. Павел кажне гана репетицийыш, выступленийыш куанен вашкен, гастроль денат лектын коштын. Тыгодым спорт дене пеҥгыде кылым кучен, сайын тунемын.
Илышыже
Тунеммаш
Павел Филиппов 8-ше класс марте Карлыган кыдалаш школышто тунемын, вара Медведево район Руэм посёлкысо шуко профилян лицей-интернатыш информационно-технологический направлений дене тунемаш пурен да компьютер технологий дене тӱҥалтыш шинчымашым налын. Лицейыште налме келге шинчымаш Озаҥысе федерал университетыш экономике отделенийыш тунемаш йӧным ыштен (2008—2012). Тудын деч вара тунеммашым Россий Федераций виктер пелены Моско финанс университетыште шуен (2012—2014)[2]. Москош тунемаш кайымыж дене туштак илаш кодын[1]. 2022 ийыште шочмо Марий кундемыш пӧртылын.
Усталык
Йорга Каче Москош кайымыж деч ончычак кидышкыже гармоньым чӱчкыдын налын, руш, удмурт да татар йылмыла дене муро-влакым мурен. Вара шочмо марий йылмыж денат мураш тӱҥалын. Усталык аланыше кугу ошкыл марий мурызо Виктор Комаровын репертуарже гыч «Ну мо вара» палыме мурылан ремиксым ыштымыж деч вара лийын. Ондак ты мурым шочмо тӱвыра пӧртыштыжӧ мурен, вара видеош войзен да интернетыш луктын. Калык деч ятыр поро шомак пурен. Тидын деч вара ик муро почеш весе шочаш тӱҥалын. Икана лицейыште пырля тунемме йолташ ӱдыржӧ кумдан палыме Hi-Fi российысе группын «Ароматы ванили» мурын текстшым марий йылмыш кусарен да мурен ончаш йодын[1]. Но Павелын йӧршеш вес сем да аранжировко дене у муро шочын. Ты мурым тудо иканаште студийыш возаш каен. Жапын-жапын Павел шкежак мурым возкален, видеош войзен да интернет лаштыклаш луктеден. Ятыр мурыжлан шомакшымат, семжымат шкежак воза. «Марий Эл радион» эртарыме «Идалыкысе муро — 2022» фестивальыште Раисия Данилова лӱмеш «Илаш кӱлеш» премий дене суапландаралалтын. 2015 ий гыч «Чоным почын мурена» проектын чолга участникше.
Паша
2014 ий гыч виктарымаш системым ыштыше организацийыште пашам ышта. Кызыт интернет-рекламе пӧлка вуйлатышын сомылжым шукта[1].
Еш
Ватан. Пелашыже — Майя Филиппова. Кум ишыве: Даниил (2015), Эмма (2022) да Лера (2025)[1].
Марий Эл Радиошто йоҥгышо мурыжо-влак
Шкет мурымаш
- Марлан налам[3]
- Тый гына
- Ну мо вара
- Шолыштам[4]
- А йӱр йӱреш, ок чамане[5]
- Тарадам тарадам
- Курорт[6][7]
- Мый тыйым йӧратем
- Мый вучем
- Лыве ӱдыр
- Шарнет, йолташ
- Пиал деч посна
- Кайыш сылне кеҥеж
Дуэт дене
- Ок кӱл мо йӧратымаш (Володя Матвеев дене пырля)
- У ий муро (Володя Матвеев дене пырля)
- У ий пагыт толын (Юлия Смуглая дене пырля)
- Йӧраташ — пиал (Эльвира Трифонова дене пырля)
- Мемнан такмак-влак (Ирина Якаева дене пырля)
Палемдымаш
- ↑ 1 2 3 4 5 Популярный в Марий Эл певец Йорга Каче: «Когда легко, мне неинтересно», <https://www.marpravda.ru/news/religiya/populyarnyy-v-mariy-el-pevets-yorga-kache-kogda-legko-mne-neinteresno/>. Тергыме: 29 идым 2025.
- ↑ Йорга Каче - шулдыр пияш. udmdunne.ru. Тергыме кече: 29 идым 2025.
- ↑ Йорга Каче (руш.). Яндекс Музыка. Тергыме кече: 29 идым 2025.
- ↑ Йорга Каче | Last.fm. Тергыме кече: 29 идым 2025.
- ↑ Йорга Каче – слушать онлайн в хорошем качестве на МТС Музыке. МТС Музыка. Тергыме кече: 29 идым 2025.
- ↑ Йорга Каче - слушать песни онлайн бесплатно на Zvuk.com, музыка в хорошем качестве (руш.). Звук. Тергыме кече: 29 идым 2025.
- ↑ Курорт (руш.). Тергыме кече: 29 идым 2025.
Кылвер-влак
- Йорга Каче (руш.). Яндекс Музыка. Тергыме кече: 29 идым 2025.
- Йорга Каче on Apple Music (англ.). Apple Music - Web Player. Тергыме кече: 29 идым 2025.
- ВКонтакте | VK Видео (руш.). vkvideo.ru. Тергыме кече: 29 идым 2025.
