Заповедник-влакын тӱнямбал кечышт
| Заповедник-влакын тӱнямбал кечышт | |
|---|---|
 Абиску калыкле парк. Заполярьеште икымше швед калыкле парк | |
| Ышталтын | 2000 ийыште Пӱртӱсым аралыше тӱнямбал ушемын темлымыж дене |
| Палемдат | ий еда |
| Кече | 24 ага |
| Кылдалтын | 1909 ийыште Швецийыште калыкле парк-влакым ыштымаш дене |
Заповедник-влакын (сугыньвер) тӱнямбал кечышт — Пӱртӱсым аралыше тӱнямбал ушемын темлымыж дене ий еда 24 майыште тӱня мучко палемдыме пайрем. Заповедниклам аралыше-влакын профессионал пайремышт гыч иктыже.
Историй
1909 ий 24 майыште Швецийыште калыкле паркым ыштеныт. Тиде элыште Европышто эн ончыч калыкле парк да пӱртӱсым аралыме кумдык (резерват) кышкар шочын.
Заповедникын тӱнямбал кечыже Пӱртӱсым аралыше тӱнямбал ушемын темлымыж дене 2000 ий гыч кажне ийын палемдалтеш. Тӱҥ шонымашыже — пӱртӱсым да янлык-влакым аралымаш[1][2].
Российыште Заповедник да калыкле парк-влакын посна кечышт уло, тудым 11 январьыште палемдат. Тиде кече элыште икымше заповедникым — Баргузин заповедникым — ыштыме дене кылдалтын.
Пайрем йӱла
Тиде кечын парк ден заказник кумдыклаште пайремлан келшыше ончер-влак пашам ыштат, экскурсий-влак эртаралтыт, пӱртӱсым аралыме нерген лекций, фестиваль да вашлиймаш-влак лиедат.
Заповедник-влак
Заповедник — янлык да кушкыл тӱням, вӱдшуҥгалтышым, акрет курыкпомышым да тура кӱ курыкым аралыме шонымаш дене тӧртык почеш айдемылан тӱкалаш лийдыме кумдыкын але акваторийын ужашыже[3].
Тӱняште икымше заповедник Шри-Ланкаште мемнан эра деч ончыч III курымышто негызлалтын. Тунам Деванампиятисса кугыжа, лӱмын лукмо тӧртык почеш, шканже да шке тукымжылан арален кодымо шонымаш дене отрон южо кумдыкышкыжо шке тарзыже-влаклан лекташ чарен[4].
Пӱртӱсым аралыме тӱнямбал ушемын данныйже почеш, 2024 ийыште тӱняште 6555 калыкле парк да 119 элыште верланыше 630 утла пӱртӱс биосфер заповедник лийын[5].
Тӱняште эн кугу заповедник Африкыште верланен. Тудо кум калыкле паркым ушымо дене шочын — тиде ЮАР-ысе Крюгер калыкле парк, Мозамбикысе Лимпопо калыкле парк да Зимбабвесе Гонарежу калыкле парк. Пӱтынь кумдык — 35 тӱжем кв. километр[6]. Ик эн изи заповедник — Галичья Гора — Российыште верланен. Тудын кумдыкшо улыжат 2,3 км²[7].
Галерей
Серенгети. Танзанийын йӱдвел могырыштыжо верланыше калыкле парк
Баргузин заповедник. Россий (Бурятий)
Шри-Ланкан калыкле паркше
Вилпатту. Шри-Ланка. Тӱнясе эн тошто заповедник
Лимпопо транскалыкле парк. Тӱняште эн кугу.
Палемдымаш
- ↑ 24 мая отмечается Международный день заповедников. gorodirkutsk.ru. Город Иркутск.РУ (22 ага 2019). Дата обращения: 25 вӱдшор 2025.
- ↑ Заповедный мир "Ненецкий", 2023-05-24, <https://www.rgo.ru/ru/article/zapovednyy-mir-neneckiy>. Проверено 25 вӱдшор 2025..
- ↑ Что такое заповедник, и чем он отличается от заказника: примеры, <https://moya-planeta.ru/travel/view/chto_takoe_zapovednik>. Проверено 25 вӱдшор 2025..
- ↑ Национальные парки Шри-Ланки. travellanka.ru. Дата обращения: 25 вӱдшор 2025.
- ↑ Тамара Казарина, Заповедные места, <https://tass.ru/spec/national-park>. Проверено 25 вӱдшор 2025..
- ↑ В Африке создан крупнейший национальный парк, 2002-12-11, <https://ria.ru/20021211/280609.html>. Проверено 25 вӱдшор 2025..
- ↑ Международный день заповедников, 2019-05-24, <https://www.pnp.ru/social/mezhdunarodnyy-den-zapovednikov.html>. Проверено 25 вӱдшор 2025..
|
Ты материалын озаже «РУВИКИ» интернет-энциклопедий» АНО улеш. Моло сайтыште ты материалым «РУВИКИ» интернет-энциклопедий» АНО-н келшымыж дене веле кучылташ лиеш. |