Григорьева, Людмила Яковлевна
| Людмила Яковлевна Григорьева | |
|---|---|
 | |
| Шочмо кече | 22 сӱрем 1973 (52 ий) |
| Шочмо вер | |
| Эл | |
| Паша сомыл |
шанчызе педагог лингвист вуйлатыше |
Людми́ла Я́ковлевна Григо́рьева (шоч. 22 сӱрем 1973, Шап Унчо, Марий Автоном Совет Социализм Республик) — Российысе лингвист, педагог, В. М. Васильев лӱмеш Йылмым, сылнымутым да историйым шымлыше марий институтын вуйлатышыже (2023 ий гыч). Филологий шанче кандидат, доцент.
Марий Эл Республикысе кугыжаныш йылмыла дене Виктер комиссийын, Марий Эл Республикын вуйлатышыже пеленысе Марий Эл Республикын самырык-влаклан Кугыжаныш премийым пуымо шотышто Комиссийын йыжыҥъеҥже, Российысе шанче фондын проект-влак шотышто координаторжо[1].
Илыш корныжо
1973 ий 22 июльышто Марий АССР Морко кундем Шап Унчо ялеш шочын. Школ деч вара Марий кугыжаныш университетын историй-филологий факультетышкыже тунемаш пурен, тудым 1996 ийыште «Филолог. Марий йылмым да литературым, руш йылмым да литературым туныктышо» специальность дене тунем пытарен. Вара Марий кугыжаныш университет пеленысе «Европын, Азийын, Африкын, Америкын да Австралийын аборигенже-влакын (финно-угор и самодийский йылмыла) йотэлласе калыкын йылмышт» направлений дене аспирантурышто тунемын[2]. 2003 ийыште филологий шанче кандидат шанче степеньым налын[1].
Пашам ышташ студент пагытыштак тӱҥалын. 1995—1997 ийлаште Марий Эл Республикысе Политехнический лицейыште марий йылме ден литературым туныктен. 2000 ий гыч Марий кугыжаныш университетыште тыршен: ончыч финн-угор филологий вуйлатыше, вара кугурак туныктышо лийын, а 2006 ий гыч — финн-угор йылме-влак кафедрын доцентше (варарак — общий да финн-угор йылмышанче кафедр)[2].
2008 ий гыч Людмила Григорьева туныктымо пашам шуктымо годымак шанче пашаш ушнен, МарНИИЯЛИ-н йылме пӧлкан кугурак шанче пашаеҥжылан тыршаш тӱҥалын (кызыт — В. М. Васильев лӱмеш Йылмым, сылнымутым да историйым шымлыше марий институт). 2013 ийыште шанче секретарьлан, 2016 ийыште — директорын алмаштышыжлан шогалтеныт. 2022 ий 1 июль гыч В. М. Васильев лӱмеш Йылмым, сылнымутым да историйым шымлыше марий институтын директорын сомылжым шуктен[1], 2023 ий февральыште директорын должностьышкыжо пеҥгыдемденыт[3].
Людмила Григорьева марий йылмын диалектологийже да синтаксисше, тӱшка йылмышанче, финн-угор йылме-влакын сравнительно-исторический грамматикыже, кусарыме теорий да практике да когнитивный лингвистике дене 90 утла шанче да туныктымо-методике пашан авторжо да редакторжо[2][3].
Тыгай комиссий ден каҥаш-влак радамыш пура:
- Марий Эл Республикын кугыжаныш йылмыже-влак шотышто виктер комиссийжын;
- Марий Эл Республик вуйлатыше пеленысе сылнымут, сымыктыш, архитектур, шанче да технике шотышто Марий Эл Республикын Кугыжаныш премийже-влак шотышто комиссийын;
- Марий Эл Республикын самырык-влакын Кугыжаныш премийым пуымо шотышто Марий Эл Республик вуйлатыше пеленысе комиссийын;
- Марий Эл Республик вуйлатыше пеленысе геральдике каҥашын;
- Марий Эл Республикын туныктымо тӧнежлан ректор-влак каҥашын;
- Марий эл Республикысе Элгӧргӧ паша министерстве пеленысе мер каҥашын;
- РФ финн-угор калык-влак Ассоциацийын ревизий комиссийжын;
- МарНИИЯЛИ шанче каҥашын (председатель);
- «Финно-угроведение» журналын редакционный каҥашыжын (председатель)[2].
Палемдымаш
- ↑ 1 2 3 Назначена временно исполняющая обязанности директора Марийского научно-исследовательского института. Министерство культуры, печати и по делам национальностей Республики Марий Эл (1 сӱрем 2022). Тергыме кече: 24 идым 2025.
- ↑ 1 2 3 4 Григорьева Людмила Яковлевна. Марийский научно-исследовательский институт языка, литературы и истории им. В.М. Васильева. Тергыме кече: 24 идым 2025.
- ↑ 1 2 Людмила Григорьева назначена директором Марийского научно-исследовательского института. Министерство культуры, печати и по делам национальностей Республики Марий Эл (20 пургыж 2023). Тергыме кече: 24 идым 2025.