Венедиктов, Вадим Николаевич

РУВИКИ — эрыкан энциклопедий гыч материал
РУВИКИ-ште тыгай тукымлӱм дене вес еҥ нерген статьям лудаш лиеш: Венедиктов.
Вадим Николаевич Венедиктов
Венедиктов Татарстан Республикысе ГБКЗ-ын сценыштыже концертыште дирижироватла, Озаҥ, 2006 ий 20 ӱярня
Венедиктов Татарстан Республикысе ГБКЗ-ын сценыштыже концертыште дирижироватла, Озаҥ, 2006 ий 20 ӱярня
Тӱҥ увер
Тичмаш лӱм
Шочмо кече 1937 ий 7 теле(1937-12-07)
Шочмо вер Кировград, Кировград район, Свердловск область, РСФСР, СССР
Колымо кече 2020 ий 5 ага(2020-05-05) (82 ий)
Колымо вер Волгоград, Россий
Эл  СССР→ Россий
Профессий дирижёр, музыкым туныктышо
Ыштыме жап 1958 — 2020
Коллектив Волгоградысе сылнысем театр, Волгоградысе сымыктыш да тӱвыра кугыжаныш институт
Награде Заслуженный деятель искусств РСФСР — 1986

Вадим Николаевич Венедиктов (1937 ий 7 декабрь, Кировград, Кировград вел, Свердловск кундем, РСФСР, СССР — 2020 ий 5 май, Волгоград, Россий) — совет да россий дирижёр, педагог. РСФСР сымыктышын сулло пашаеҥже (1986)[1].

Илыш корныжо

Вадим Венедиктов Кировград олаште шочын[2][1]. Музык школышто фортепианом шокташ тунемын[3], но тудым пытарымеке[4], Озаҥысе авиаций институтын моторный факультетышкыже тунемаш пурен, ик верлан 10 еҥ улман конкурсым эртен[5]. Венедиктовлан икымше курс мучашыште саркомат гоч Ленинградысе кӱшыл сар-теҥыз училищыш тунемаш пураш темленыт, тудо подводник-офицер паша нерген шонен[6]. Но тазалык комиссий Венедиктовым ты пашалан келшен толшылан шотлен огыл, тудын шинчаже тӱс ойыртемым пӱсын шижын огыл[6]. Ту кеҥежымак Озаҥысе химий-технологий институтын механике факультетышкыже тунемаш пурен, тыгак кугу конкурс гоч эртен. Химий-технологий институтышто тунеммыж нерген Венедиктов тыге ойлен:

«Мый кокытат пел курсым сайын тунемынам. Мыйым, мый шонем, пӱтынь институт пален. Мый вузын ик эн калык артистше лийынам: модынам да чыла факультет ден курсын каслаштыже мурызо-влаклан шоктенам... Мыйым самодеятельность чыла велыш шупшыштын. Мый эше эстраде оркестрыште шоктенам, тудым Георгий Яковлевич Ротт вуйлатен — тудо Вертинскийын йотэлысе концертмейстерже лийын. Тудо тунам Олег Лундстремын оркестрыште аранжировщик да Озаҥ филармонийын пианистше лийын. Тудым мый инструметовко, аранжировко шотышто шке икымше туныктышемлан шотлем»[6].

Туге гынат Венедиктов кумшо курсышто институтым кодаш пунчалым луктын[7] да тунемме ий покшелне, кунам пурымо экзамен-влак шукертак эртеныт, фортепиано специальность дене Озаҥысе сылнысем училищыш пурен[6][8], тунемын да училищым 1962 ийыште фагот класс дене пытарен[9][10]. 1966 ийыште Озаҥысе кугыжаныш консерваторийын оркестр факультетшым доцент Н. Г. Зуевичын фагот классыштыже тунем пытарен. Консерваторийым тунем пытарыме деч вара Натан Рахлинын полшымыж дене шукерте огыл чумырымо ТАССР симфоний оркестрыш фагот дене шоктызо семын пашаш пурен, ик ий гыч Рахлин Венедиктовым консерваторийыш уэш почмо опере-симфоний дирижирований классышкыже тунемаш налын[11], тудым Венедиктов 1972 ийыште тунем лектын[12].

Варажым Венедиктов Г. Тукай лӱмеш Татар кугыжаныш филармонийын эстраде квартетшым вуйлатен, Омскысо филармонийын симфоний оркестрын тӱҥ дирижёржын ассистентшылан ыштен. В 1976—1989 ийлаште Марий АССР Йошкар-Оласе музык театрын тӱҥ дирижёржылан, 1999—2000 ийлаште художественный вуйлатышылан тыршен[13].

1989 ийыште Венедиктов Волгоград сылнысем комедий театрыш тӱҥ дирижёр олмыш ӱжмашым налын, а вара «Волгоградысе опере антреприза» у проектым негызлен да вуйлатен, варажым тудым «Царицынская опера» у кугыжаныш театрыш савыреныт, негызлан тунам пеҥгыдем шушо антреприз труппым налыныт[1]. 2004 ий гыч «Царицынская опера» театрыште дирижёр-постановщикын олмыштыжо лийын[1].

Венедиктов шке Волгоградысе пӧртышын шымше пачашысе балкон гыч камвочмеке колен[14][15].

Пашаже

Венедиктов шуко гана Озаҥысе симфоний оркестр-влак дене ӱжмӧ дирижёр семын пашам ыштен (1966 ий гыч), Волгоградын (1988 ий гыч) — ты шотышто Европа эллашке гастрольлаште[3], Воронеж филармоний дене (1995 ий гыч), Саратов филармоний дене (1996 ий гыч), Самара филармоний дене (2004 ий гыч), тыгак Самара олан (1985 ий гыч), Татарстанын (1989 ий гыч) опер да балет театржын оркестр-влак дене — ты шотышто Голландийышке гастрольлашке (2003) коштын[3][16]. Тыгак ӱжмӧ почеш Белградын симфоний оркестр дене (1996) да Ирина Архипован фондшын темлымыж дене Корейысе симфоний оркестр дене (Кечывалвел Корей, 2004) пашам ыштен[3].

Йошкар-Оласе Музыко театрын оркестржым вуйлатыме жапыште Венедиктов марий семмастар-влакын творчествыштым кумдан чапландарен, концертыште Э. Сапаевын, К. Смирновын, Я. Эшпайын, Л. Сахаровын произведенийыштым йоҥгалтарен. Андрей Эшпайын возымыжлан пӧлеклалтше икмыняр усталык кас да премьер шоктымаш композиторын Венедиктов дене ятыр ий келшыме да усталык пашам пырля ыштымылан кӧра шукталтын[17].

«Волгоградысе опере антрепризе» проектын кышкарыште Венедиктов Дж. Россинин «Севильский цирюльник», Дж. Пуччинин «Тоска» да «Мадам Баттерфляй», П. И. Чайковскийын «Евгений Онегин» да «Иоланта», Р. Леонкаваллон «Паяцы», Ж. Бизен «Кармен», П. Масканьин «Ялысе чап» да Ф. Пуленкан «Айдемын йӱкшӧ» опер спектакльлан дирижёр-постановщик семын мутым кучен[1].

2000 ий гыч Волгоградысе муниципал музыко театрын спектакльлаштыже сем шотышто постановщик лийын. Тиде театрлан Венедиктовын ямдылыме постановко кокла гыч аклыше-влак Дж. Вердин «Травиата»[18][19] да Б. Синкинын «Амок» оперыжым, И. Кальманын «Мистер Икс» да «Монмартра фиалка», А. Журбинын «Биндюжник да Кугыжа» мюзиклжым, В. Коллон «Америкысе йӧратымаш» пашажым посна палемденыт[1][20]. Венедиктовын кугу вийым налше проектыште дирижёр-постановщик семын пашам ыштымыже 1995 ийыште Волгоградысе музыко комедий театрыште тӱрлӧ жанран репертуар дене Музыкальный театрлан тӱрлӧ жанрыште пашам ыштыше официал статусым налаш йӧным ыштен[19]. Вадим Венедиктов Волгоградысе музыко театр еш дене Курскышто, Орёлышто, Севастопольышто, Сочиште, Тулышто гастроль дене лийын[21].

Рӱдӧ телеканалын архивыштыже Венедиктовын шуко концерт да симфоний программым войзен кодымыжо аралалтеш[1].

Профессор Венедиктов тыгак Волгоградысе сымыктыш институтышто тыршен да 2000 ийыште тушто музык-семӱзгар сымыктыш кафедрысе студент-влак дене пырля симфоний оркестрым ыштымашке кугу надырым пыштен, кугу жап тиде оркестрым вуйлатен да дирижироватлен[22][23].

2019 ийыште Венедиктовын лӱмжӧ дене «Царицынская опера» театрын камере залжым лӱмденыт[24].

Суаптар ден чаплӱм-влак

  • РСФСР сымыктышын сулло пашаеҥже (1986)
  • Марий АССР Кугыжаныш премийын лауреатше (1979)[25][3]
  • Марий АССР сымыктышын сулло пашаеҥже (1980)[3][25]
  • Волгоград кундемысе Кугыжаныш премий
  • Почёт орден[26]

Ешыже

Эргыже — Алексей Венедиктов, Российын сулло артистше, Волгоградысе академий симфоний оркестрын тӱмырзӧ тӱшкан концертмейстерже, Волгоград оласе 8 №-ан Йочалык музыко школын туныктышыжо[27][28][29][30].

Палемдымаш

  1. ↑ 1 2 3 4 5 6 7 Ушел из жизни дирижер Вадим Венедиктов — Музыкальное обозрение. Тергыме кече: 10 ага 2020. Архивлыме 7 ага 2020 ий.
  2. ↑ По материалу интернет-издания «Кривое Зеркало». Тергыме кече: 11 ага 2020. Архивлыме 11 ага 2020 ий.
  3. ↑ 1 2 3 4 5 6 Диалоги с волгоградскими маэстро. Тергыме кече: 10 ага 2020. Архивлыме 10 ага 2020 ий.
  4. ↑ По материалу издания «Комсомольская правда Волгоград». Тергыме кече: 10 ага 2020. Архивлыме 11 ага 2020 ий.
  5. ↑ «Волгоградская Правда». Тергыме кече: 10 ага 2020. Архивлыме 10 ага 2020 ий.
  6. ↑ 1 2 3 4 В Волгограде ушел из жизни главный дирижер музыкального театра | Волгоградская Правда. Тергыме кече: 10 ага 2020. Архивлыме 10 ага 2020 ий.
  7. ↑ ГТРК «Волгоград-ТРВ». «Волгоград 24». Тергыме кече: 11 ага 2020. Архивлыме 24 шорыкйол 2022 ий.
  8. ↑ «Комсомольская Правда Волгоград». Тергыме кече: 10 ага 2020. Архивлыме 11 ага 2020 ий.
  9. ↑ Список выпускников Казанского музыкального училища на сайте училища. Тергыме кече: 10 ага 2020. Архивлыме 1 кылме 2019 ий.
  10. ↑ Список выпускников духового отделения Казанского музыкального училища на сайте училища. Тергыме кече: 11 ага 2020. Архивлыме 29 шыжа 2019 ий.
  11. ↑ Диалоги с Волгоградскими маэстро. Материал с сайта «Киберленинка». Тергыме кече: 10 ага 2020. Архивлыме 10 ага 2020 ий.
  12. ↑ Энциклопедия Волгоградской области. Тергыме кече: 10 ага 2020. Архивлыме 22 теле 2017 ий.
  13. ↑ Из истории Марийского государственного академического театра оперы и балета им. Э.Сапаева. Тергыме кече: 10 ага 2020. Архивлыме 11 сорла 2020 ий.
  14. ↑ По информации с сайта «Комсомольская Правда Волгоград». Тергыме кече: 10 ага 2020. Архивлыме 11 ага 2020 ий.
  15. ↑ По информации издания «Блокнот Волгоград». Тергыме кече: 10 ага 2020. Архивлыме 7 ага 2020 ий.
  16. ↑ По материалу издания «Волгоградская Правда». Тергыме кече: 10 ага 2020. Архивлыме 10 ага 2020 ий.
  17. ↑ Театр в Энциклопедии. Вадим Венедиктов. Тергыме кече: 21 ага 2020. Архивлыме 18 ага 2020 ий.
  18. ↑ Из истории Волгоградского музыкального театра. Тергыме кече: 10 ага 2020. Архивлыме 10 ага 2020 ий.
  19. ↑ 1 2 Биография на сайте Волгоградского музыкального театра.
  20. ↑ По материалу издания «Волжская Правда». Тергыме кече: 11 ага 2020. Архивлыме 11 ага 2020 ий.
  21. ↑ Трагически погиб волгоградский дирижёр Вадим Венедиктов | Новости Волжского — Волжская правда. Тергыме кече: 11 ага 2020. Архивлыме 11 ага 2020 ий.
  22. ↑ По информации с сайта Волгоградского государственного института искусств и культуры. Тергыме кече: 11 ага 2020. Архивлыме 11 ага 2020 ий.
  23. ↑ Некролог на сайте Волгоградского государственного института искусств и культуры. Тергыме кече: 10 ага 2020. Архивлыме 10 ага 2020 ий.
  24. ↑ Анжела Буцких. Венедиктовский зал встретил первых зрителей. События театра. «Царицынская опера» (21 пеледыш 2019). Тергыме кече: 14 теле 2021. Архивлыме 14 теле 2021 ий.
  25. ↑ 1 2 Марийский государственный академический театр оперы и балета им. Эрика Сапаева. Тергыме кече: 10 ага 2020. Архивлыме 11 сорла 2020 ий.
  26. ↑ Комсомольская Правда Волгоград. Тергыме кече: 11 ага 2020. Архивлыме 8 ага 2020 ий.
  27. ↑ Ирина Павлова. В Волгограде вспомнят маэстро Вадима Венедиктова. Культура. Сетевое издание «Волжская правда» (1 ага 2021). Тергыме кече: 14 теле 2021. Архивлыме 14 теле 2021 ий.
  28. ↑ Отдел духовых и ударных инструментов. Структура и органы управления образовательной организацией. Детская музыкальная школа № 8. Тергыме кече: 14 теле 2021. Архивлыме 14 теле 2021 ий.
  29. ↑ Указ Президента Российской Федерации от 17.01.2005 г. № 24 «О награждении государственными наградами Российской Федерации». Тергыме кече: 14 теле 2021. Архивлыме 14 теле 2021 ий.
  30. ↑ Волгоградский академический симфонический оркестр: Состав. Исполнители. Волгоградская филармония. Тергыме кече: 14 теле 2021. Архивлыме 14 теле 2021 ий.

Кылвер-влак

"https://mhr.ruwiki.ru/w/index.php?title=Венедиктов,_Вадим_Николаевич&oldid=1196219" гыч налме