Шӧрын тӱнямбал кечыже
Шӧрын тӱнямбал кечыже — Наций-влакын кочкыш да ялозанлык шотышто иктеш ушнымо организацийын (ФАО) увертарыме кечыже, шӧрын пеш кӱлешан, пайдале кочкыш улмыжым умылтараш шонымаш дене шочын[1]. Тиде пайремым 2001 ийыште палемдаш тӱҥалме, кажне ийын 1 июньышто эрта[2]. Шӧрын кечыже ты сатум лӱштен налше паша радамлан утларак кугу тӱткышым ойыраш кӱлмӧ шонымаш дене шочын[2]. 2000 ий гыч сентябрьын пытартыш вӱргечынже ФАО Школысо шӧрын тӱнямбал кечыжым палемда[3].
Историй
Шӧрын тӱнямбал кечыжым ФАО 2001 ийыште икымше гана палемден. Ту жаплан ятыр эл-влак ты кечым Шӧрын кечыже семын паленыт, садлан ты кечымак тӱнямбал пайремлан налаш темленыт[2].
Тиде кече шӧрлан утларак тӱткышым ойыраш да таза кочкыш сатун кӱлешлыкшым умылтараш, тудым ыштен лукмылан мутым кучаш да ыштен налме йӧным шот-радам дене вӱдаш кӱшта. Тидым ФАО-н шымлымыжат пеҥгыдемда: шӧр сектор ик миллиард утла еҥлан илен лекташ полша, тӱнямбалне куд миллиард утла еҥ шӧр сату дене пайдалана[4]. Шуко эл-влакын Шӧрын кечыжым ик кечын, 1 июньышто, пайремлаш келшымыштат ончыкта: тиде посна калыкле пайрем, шӧр пӱтынь планетым авалтыше кочкыш.
Шӧрын тӱнямбал кечыжым пайремлымаш
Шӧрын тӱнямбал кечыже 2016
2016 ийыште Шӧрын тӱнямбал кечыже 40 утла эллаште палемдалтын. Ты кечын еҥ-влак марафоныш да еш дене таҥасымашке ушненыт, шӧр лӱштымым онченыт, тунемме тӧнежлаште концерт, конференций, семинар, конкурс-влак эртеныт, шӧрым чапландарыше, пӱтынь калыкын тазалыкшылан пайдале улмыжым умылтарымаш паша ышталтын[2].
Шӧрын тӱнямбал кечыже 2017
Шӧрын кечыж лӱмеш 2017 ийыште 80 эллаште 588 вашлиймашым эртарыме, нунышт #WorldMilkDay социал кылыште 402 миллион гана ончыкталтыныт. Мероприятий-влак тыглай айдемылан шӧр фермылашке корным почыныт, оза-влак шӧрым школлашке яра колтеныт, окса надырым погеныт, фотоконкурс, спорт таҥасымаш, ярминга, куштымо шоу, кочмо, тамлыме шотышто конференций, ончер, тӱрлӧ шӧр кочкыш дене сийлымаш эртеныт[5].
Шӧрын тӱнямбал кечыже 2018
2018 ийыште Шӧрын тӱнямбал кечыжым 72 эллаште палемденыт, 586 вашлиймаш эртен. Фермер, тыглай пашазе, еш-влак, политик-шамыч, шеф-повар, диетолог-влак, эмлызе, шанчызе да спортсмен-влак шкеныштын шӧр коркаштым нӧлталыныт да нунын илышыштышт шӧр-торыкым кучылтмын пайдалыкше нерген каласкаленыт. #WorldMilkDay социал кыл (1 май-2июнь жап кумдыкышто) 80000 утла публикацийым луктын, 2 июнь гыч 2000 утла публикаций лийын. Глобальный кампанийын (#WorldMilkDay, #RaiseAGlass, 19 кусарыме да локальные хэштег дене пырля) ончыктымыжо 1,1 миллиард утла погынен, 291 миллионжо социал кылыште лийын[6].
Критике
Шӧр кечын кугун чапланымыжлан кӧра, 2017 ийыште "Кушкыл шӧрын тӱнямбал кечыже" шочын, тудо ий еда 22 августышто эртаралтеш[7]. Шӧрын тӱнямбал кечыж ваштареш улшо-влак йырым-йырысе йырвелым аралымашке, шӧр промышленностьышто вольыкым торжан кучымо, тидын айдеме тазалыклан эҥгекым кондымыжо нерген ойлат.
Палемдымаш
- ↑ News.lk. Today is World Milk Day. News.lk. www.news.lk. Тергыме кече: 4 пеледыш 2019. Архивировано из оригинала 1 пеледыш 2019 ий.
- ↑ 1 2 3 4 EST: 15th World Milk Day. www.fao.org. Тергыме кече: 4 пеледыш 2019. Архивлыме 7 шыжа 2018 ий.
- ↑ World School Milk Day Архивысе копий 30 пеледыш 2019 гыч (англ.)
- ↑ The Dairy Declaration of Rotterdam. www.fao.org. Тергыме кече: 4 пеледыш 2019. Архивлыме 12 пургыж 2022 ий.
- ↑ World Milk Day. Final Report of the World Milk Day (2017). worldmilkday.org. Тергыме кече: 4 пеледыш 2019. Архивлыме 2 пеледыш 2021 ий.
- ↑ World Milk Day. World Milk Day Final Report (2018). Тергыме кече: 4 пеледыш 2019. Архивлыме 2 пеледыш 2021 ий.
- ↑ World Plant Milk Day. World Plant Milk Day. World Plant Milk Day. Тергыме кече: 4 пеледыш 2019. Архивировано из оригинала 21 сорла 2017 ий.