Цитате

Таҥастарен ончалза, кудо предложенийыште С. Чавайнын ойжо тӱрыснек кучылталтеш, а кудыштыжо ужашым веле налме?

Марий калыкын кугу писательже С. Г. Чавайн книгам алал кумылын йӧратен да кӱкшын аклен. Тудо возен: «Книга — волгыдо шинчан, чыламат раш ужеш, книгам шинчыдыме еҥ сокыр гай, пычкемышыште коштеш.
С. Г. Чавайн книга нерген моткоч чын каласен. Тудо книгам «волгыдо шинчалан, чыламат раш ужшылан» шотлен.

Весын ойлымыжо але возымыж гыч ужашым шкенан ойыш пуртена гын, тиде ужашым цитат маныт, авторын мутшо пелен шоген кертеш, тыгодым вияш ой лиеш. Да препинаний знак вияш оян предложенийысе семынак шындалтеш, мутлан: Миклай Казаков ик почеламутыштыжо возен: «О марий калыкем, чонет поро, яндар! Кава деч кумдарак, келгырак шонымет. Кумылет нӧлтын толжо онар курык нар, эше сылнын волгалтше пашаче лӱмет!»

Цитат авторын мутышкыжо предложений ужаш семын пурталтын кертеш да кавычкеш изи буква дене тӱҥалын возалтеш, мутлан: Миклай Казаков марий калыкын «кава деч кумдарак, келгырак шонымыж» нерген кумыл нӧлтын возен.

Цитат тичмашын ок пуалт гын, ой кӧргыштӧ каласыде кодымо ужаш олмеш кум точко шындалтеш, мутлан: Миклай Казаков возен: «О марий калыкем!.. Эше сылнын волгалтше пашаче лӱмет!»

Палемдымаш. Почеламутын ужашыже подлинник семынак пуалтеш гын, кавычке ок шындалт, мутлан: Миклай Казаков ик почеламутыштыжо возен:

О марий калыкем, чонет поро, яндар! Кава деч кумдарак, келгырак шонымет. Кумылет нӧлтын толжо онар курык нар. Эше сылнын волгалтше пашаче лӱмет!

Литератур

Васикова Л. П. Кызытсе марий йылме. Простой предложений синтаксис: Туныктышылан полыш. ‑ Йошкар-Ола: Марий книга издательство, 1987.— 144с.
Учаев З. В. Марий йылме. Йошкар-Ола. 1982, 29—106 с.
Учаев З. В. Марий йылме : Теорий : 5–9 класслан учебник. Йошкар-Ола : Марий книга савыктыш, 1993. 264 с.
Учаев З. В. Узловые проблемы морфологии марийского языка. – Йошкар-Ола, 2002. – 50 с.
Учаев З. В., Захарова В. С. Русско-марийский словарь. – Йошкар-Ола: Марийское книжное издательство, 1999. – 480 с.
Учаев З.В., Кузнецов В.В, Кузнецова Н.В. Марий йылме дене тÿҥ школлан примерный программе: V-IX класс / ̶ Йошкар-Ола: Марий туныктыш институт, 2013 - 64 с.
Учаев З.В., Малинина Р.А.. Марий йылме программе. V-XI класслан. Йошкар-Ола, ГОУ ДПО (ПК ) «Марий туныктыш институт», Йошкар-Ола, 2004. – 54 с.