Пианист

Пианист, пианистке — фортепиано дене шоктышо семмастар, шоктызо. Пианист-влак шкет шоктен кертыт, ансамбль але оркестр кышкарыште, тыгак моло семмастар-влаклан аккомпанироватлен кертыт. Шагал пианист концертыште шкет але ансамбль кышкарыште шоктышо лийыт, пианист-влак шукышт моло тӱрлӧ пашаш куснат: аккомпанироватлымаш, унагудо да ресторан-влакын фойештышт выступатлымаш, сем студийлаште паша, семым туныктымаш.

Пианистын профессионал моштымашыже тудын технике мастарлык гыч, шоктымо сылнылык ойыртемже да шоктымо сем-влаклан шке кумылым (интерпретацийым) пыштен моштымаш гыч шогат. Пианист-влак тӱшкаште мастарлык конкурс-влак улыт.

Шуко палыме композитор-влак, тачысе семмастар-влакын ойлымышт почеш, пеш уста пианист лийыныт. Мутлан, Вольфганг Амадей Моцарт, Людвиг ван Бетховен, Ференц Лист, Иоганнес Брамс, Фредерик Шопен, Шарль Валантен Алькан, Сергей Рахманинов да молат.