Курчак театрын тӱнямбал кечыже
21 март — Курчак театрын тӱнямбал кечыже (англ. World Puppetry Day).
2000 ийыште УНИМА-н Курчак театр-влакын тӱнямбал ушемышт) XVIII Конгрессыште Магдебургышто курчак театрын кумдан палыме еҥже Дживад Золфагарио (Иран гыч) Курчак театрын тӱнямбал кечыж нерген шонымашым каҥашымашке луктын. Пайремым эртарыме вер да жап нерген дискуссий пеш чот талышнен гынат, 2000 ийыште тидын нерген пунчал лектын огыл.
Кок ий гыч гына, 2002 ий июнь тылзыште Атлантыште, УНИМА тӱнямбал каҥашын мутланымаштыже пайрем кече рашемдалтын.
Чумыр тӱнясе курчак театр-влак пайрем йӱлам 2003 ий 21 март кечын почыныт. Лач тиде жап гыч курчак театрым йӧратыше да профессионал-влак Курчак театрын тӱнямбал кечыжым пайремлат.
УНИМА-н президентше (2000–2004) Маргарета Никулеску курчак театрын чыла пашаеҥже-влакым 21 мартым курчак театрым чапландарыме йӱла кечыш савыраш темлен ӱжын: «Тек тиде кечын курчак-влак спектакльым модыт, мутланымаш, вашлиймаш-влак эртат, тек ты кечын ик эн тошто сымыктышын профессионалже ден тудым йӧратыше-влак иктеш ушнат! Тек йырым-йыр чыла еҥ-влак мемнан пайремыш ушнат! Тек чылан курчак театрыште лийыт!».
Тыгак ончо
Кылвер-влак
Официальный сайт УНИМА — Международного союза деятелей театра кукол