Бурят йылмын кечыже
| Бурят йылме кече | |
|---|---|
 Бурят йылмын кечыжын тамгаже | |
| Тӱрлылык | Республикысе пайрем |
| Официал | руш. День бурятского языка бур. Буряад хэлэнэй үдэр |
| Ыҥ | шочмо йылмым аралаш да шаркалаш |
| Ышталтын | 2006 ийыште |
| Палемдат |
 Бурятий Республикыште |
| Кече | ий еда, шыжа тылзын 4-ше кугарняже |
Бурят йылме кече (бур. Буряад хэлэнэй үдэр) — шочмо йылмылан пӧлеклыме пайрем. Бурятий Республикыште икымше гана 2006 ийыште эртарыме. Бурят йылмын Бурятий Республикысе кугыжаныш йылме статусшо уло[1]. «Бурятий калык-влакын йылмышт нерген»[2], «Бурят йылмым Бурят Республикын кугыжаныш йылме семын полышым пуымо нерген»[3] тӧртык-влакым лукмо.
Кызыт тӱрлӧ увер дене 318000 гыч 36900 марте кутырышо шотлалтеш. Российысе кундемлаште — Бурятий Республикыште, Иркутск да Забайкал кундемлаште, бурят калыкын акрет годсек илыме верлаште, бурят йылме еш кӧргыштӧ, мер илышыште кучылталтеш. Бурятла книга ден газет, тунемме книга да тунемме методике савыктыш-влак лектыт, телевизор программе, сутка мучко «Буряад ФМ» радиоканал, да «Буряад ТВ» телевизор канал пашам ыштат, тыгак интернет-сайт, канал да группо-влак социал сеть да мессенжерлаште улыт.
Историй
Бурят йылме кечым тӧнежлышылан Бурятий Республикысе вуйлатыше, Бурятий Республикын Виктерже, Бурятий Республикын Калык Хуралже да Пӱтынь Бурятийысе тӱвырам вияҥдыше Ассоциаций шотлалтыт. Бурят йылмын кечыже икымше гана 2006 ийыште палемдалтын. Бурятий Республикын икымше Президентше Леонид Потапов Бурят Республике Виктерын «Республикысе Бурят йылме кечым пайремлыме нерген» 02.04.2007 ий 205-р №-ан кӱштымашыжым луктын[4]. Бурят йылме кече октябрь тылзын нылымше кугарнян, Бурят йылме тылзым мучашлыме семын эртаралтеш.
Пайремлымаш
Кызытсе жапыште йӱла почеш пайрем октябрь мучаште палемдалтеш, тудо республикыште ий еда увертарыме Бурят йылмын тылзыжым мучашла. Бурятий Республикын виктерже тылзе жапыште эртарышаш паша радамым, шыҥдарышаш проект-влакым ончылгоч чоҥен пеҥгыдемда. Пайрем кышкарыште рӱдолаште да районлаште тӱрлӧ мероприятий-влак эртат: викторине, палыше-влакын таҥасымашышт, лудмаш конкурс, сочинений, диктант, бурят йылмым да сылнымутым туныктымо шотышто методике разработко-влак каҥашалтыт, интернет-сайт-влак ямдылалтыт, челлендж-влак ышталтыт. 2024 ийыште Бурят йылмын тылзыжым Россий Федераций Президент В. В. Путинын увертарыме Еш идалыклан пӧлеклыме. Бурят йылме кечылан пӧлеклыме пайрем вашлиймаште Бурятий Республикым вуйлатыше бурят йылмым вияҥдыме пашаште тыршыше лауреат-влакым «Үндэһэн хэлэнэй үлзы хэшэг» — «Шочмо йылмын шнуй пӧлекше» премий дене суапландарыме пайремле йӱлам шукта.