Ягельдина, Тамара Андреевна

РУВИКИ-ште тыгай тукымлӱм дене вес еҥ нерген статьям лудаш лиеш: Ягельдин.

Тамара Андреевна Ягельдина
Шочмо кече	22 ӱярня 1939(1939-03-22)
Шочмо вер	Изи Шокшем, Чылдемыр ял шотан илем, Шернур кундем, Марий Автоном Совет Социализм Республик, РСФСР, СССР
Колымо кече	16 идым 2012(2012-09-16) (73 ий)
Колымо вер	Йошкар-Ола, Россий
Гражданлык	СССР →  Россий
Паша сомыл	кӱслезе, педагог
Награде да премий

Тамáра Андрéевна Ягéльдина (22 ӱярня 1939, Изи Шокшем, Марий Автоном Совет Социализм Республик — 16 идым 2012, Йошкар-Ола) — совет да российысе семмастар, туныктышо. Марий АССР-ысе Курыкмарий вел Микрӓк йоча музык школын директоржо (1972—1997), Марий Элысе 1-ше №-ан калыкле президент школ-интернатын завучшо, туныктышыжо (1997—2012). Россий Федерацийысе тӱвыран сулло пашаеҥже (1993). Олык Ипай лӱмеш Марий комсомол премийын лауреатше (1972).

Илыш корныжо

1939 ий 22 мартыште Марий АССР-ысе Шернур район Изи Шокшем ялеш репрессироватлыме НКВД пашаеҥын ешыштыже шочын.

Т. А. Ягельдинан аважлан, кидыштыже вич йоча дене шкетын кодмеке, тунам нунын илыме Марий АССР-ысе Шернур посёлко гыч каяшыже логалын. 1939 ий шыжым аважын родыжо-влак нуным Йошкар-Олаш илаш наҥгаят да репрессироватлыме ешлан полшаш тыршат. 1943 ийыште Т. А. Ягельдинан ачаже ссылке гыч пӧртылын, 1968 ийыште чын лӱмжым пӧртылтымӧ.

Шочмо ялыште кыдалаш школым, а 1962 ийыште И. С. Палантай лӱмеш Йошкар-Оласе музык училищым тунем пытарен.

Туныктышо, 1972 ий гыч — Марий АССР-ысе Курыкмарий вел Микрӓк йоча музык школын директоржо. Тыште музык урок-влакым вӱден, икымше кӱслезе-влак ансамбльым чумырен, ансамбль шке усталыкшым Москошто Кремльысе погын-влакын полатыштыже ончыктен.

1997 ий гыч 1-ше №-ан калыкле президент школ-интернатыште (Йошкар-Ола): завуч, туныктышо. Ик гана веле огыл пӱтынь российысе да калык-влак кокласе конкурсын лауреатше лийше кӱслезе-влак ансамбльын вуйлатышыже.

1993 ийыште тудлан «Россий Федерацийысе тӱвыран сулло пашаеҥже» чаплӱмым пуымо. 1972 ийыште, Микрӓк самырык кӱслезе-влак ансамбльын вуйлатышыже семын, Олык Ипай лӱмеш Марий комсомол премий дене суапландаралтын. 2009 ийыште «Марий Эл ончылно суаплан» орденын медальже дене палемдалтын.

2012 ий 16 сентбрьыште Йошкар-Олаште колен.

Суаптар-влак

• Россий Федерацийысе тӱвыран сулло пашаеҥже (1993 ий 22 декабрь) — тӱвыра аланыште сеҥымашлан да шуко ияш лектышан пашалан;
• Марий АССР-ысе тӱвыран сулло пашаеҥже (1970);
• «Марий Эл ончылно суаплан» орденын медальже (2009);
• Олык Ипай лӱмеш Марий комсомол премий (1972) — кӱкшӧ шоктымо мастарлыклан да марий музык сымыктышым чапландарымылан (Микрӓк кӱслезе-влак ансамбльын вуйлатышыже).

Шарнымаш

1975 ийыште Микрӓк самырык кӱслезе-влакын ансамбльышт нерген «Юнга-фильм» студийыште 20 минут кужытан «Гусли поют о счастье» тӱсан фильмым войзеныт. Варарак тудо Кином йӧратыше-влакын пӱтынь ушемысе конкурсыштыжо II степенян Диплом дене да СССР тӱвыра министерствын Чаптаныкше дене палемдалтын.

Палемдымаш

Литератур

• Егоров Н. На экране — Юнга-фильм. — Йошкар-Ола, 1987. — 45 с.
• Терехова А. В. Ягельдина Тамара Андреевна // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 417. — 2032 экз. — ISBN 5-87898-357-0.
• Ягельдина Тамара Андреевна // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 841. — 872 с. — 3505 экз. — ISBN 978-5-94950-049-1.
• Терехова А. В., Эшкинина А. Г. Ягельдина Тамара Андреевна // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 517. — 606 с. — 1500 экз. — ISBN 978-5-905314-35-3.

Кылвер-влак

• Сернурская централизованная библиотечная система имени Кима Васина. Ягельдина Тамара Андреевна (1939—2012).