Васканова, Надежда Ивановна
| Надежда Ивановна Васканова (Алексеева) | |
|---|---|
 | |
| Шочмо кече | 23 теле 1972 |
| Шочмо вер |
|
| Колымо кече | 3 ӱярня 2025 (52 ий) |
| Колымо вер | |
| Эл | |
| Паша сомыл | мурызо |
| Награде да премий | |
Васканова (Алексеева) Надежда Ивановна (1972 ий 23 декабрь Марий Эл Республик Юлсер вел Карай ял — 3 март 2025 ий) — тӱвыра пашаеҥ. «Марий Эл Республикысе тӱвыран сулло пашаеҥже» (2013). Финн-угор эстрада мурызо-влакын "Югра-2000" конкурсын, Регион-влак кокласе "Ший памаш" муро конкурсын лауреатше.
1995 ийыште тӱвыра аланыште пашам ышташ тӱҥалын. Хормейстерлан, художественный вуйлатышылан, тӱвыра организаторлан, автоклуб вуйлатышыжлан тыршен, 2016 ий гыч 2025 ий 3 март марте – Пӧтъялысе тӱвыра пӧртын директоржо. Тӱшка пашаште тыршышыла, шке вийжым, мастарлыкшым да усталыкшым пӱтынек ойырен налме пашалан пуэн. Пырля пашам ыштыше кажне еҥым пагален ончен, сай мут да каҥаш дене полшен.
Надежда Васканова мурызо семын Марий Эл Республикыште гына огыл, тудын деч ӧрдыжтат чапланен. Ятыр гана муро программыж дене районлашке, республик мучко, Пошкырт, Одо кундемлаш миен коштын, тудын репертуарыштыже калык да эстраде муро-влак, самодеятельный да профессиональный композитор-влакын произведенийышт лийыныт.
2019 ий гыч Пӧтъял тӱвыра пӧртышто «Шинчаваш» сылнымут-сылнысем вашлиймаш циклым вӱден, Юлсер кундемысе, тыгак Марий Эл Республикысе уста-еҥ, интеллигент-влак дене палымым ыштен.
Надежда Ивановна шке пашажым куштылгын да кумылын шуктен: тудын деч посна районысо ик вашлиймашат, Республикысе ик тӱшка концертат эртен огыл. «Пеледыш пайрем», «Сабантуй», «Шокто, гармонь», «Чоткар патыр», ял ден урем пайремлаште Надежда Ивановна вучымо уна лийын, пайрем концертым да куштымо программым сӧрастарен. Усталык пашажым эре шуарен толын, сай кумыл дене илен. Тудо шке пашажым йӧратен, эре уым кычалын, мастарлыкым шуарен, тунемме семинар, совещанийлаш коштын, шке профессийысе шинчымашыжым эреак кумдаҥден шоген. Тидлан уста вуйлатыше да мурызо пашаште тӱрлӧ йӧным кучылтын, шке умылымашыжым мурышто гына огыл, фольклорыштат келгемден.
Вуйлатыше семын, тудо шке йырже шке кумылын мураш йӧратыше-влакым чумырен, муро гоч сылнылыкым йӧраташ туныктымаште кугу пашам шуктен шоген. Мурызо-влакын репертуарыштышт – Юлсер велысе калык муро да сем-влак гына огыл, эрвел, курыкмарий да виче вел марий сем йоҥген, шке семын серыше да профессионал семмастар-влакын пашаштымат кугу кумыл дене калык деке шуктен. У программым чумырымо годым Надежда Ивановна номер-влакым пеш тӱткын чумырен, марла тӱвыран верысе йӱла сем ойыртемжым арален кодаш тыршен, южгунам нуным уэмден да у сылне тӱс дене пойдарен.
Юлсер вел тӱвырам вияҥдымашке усталык надырым пыштымылан суапландаралтын:
- Марий Эл Республикын Тӱвыра, печать да национальность паша шотышто министерствын Чапкагазше (2005 ий),
- Марий Эл Республик Виктерын Чапкагазше (2008 ий),
- «Марий Эл Республикысе тӱвыран сулло пашаеҥже» чап лӱм (2013 ий).
2025 ий 3 мартыште колен[1].